Di dalam dom kaya ngui brei pataom mek angan “Sambo Bar Tay Nguyen”, Urang dang ngak hu angan Nguyễn Việt Hùng ba janih pak marai len meng tangin piah ngak jeng sambo ban bingula pataih khan bai. Yaok blah nyu mada karei di gauk, gam tui bingula marah bhong, juk, putih karei karei pambuak ilamo bangsa Kinh saong bangsa Randaiy. Urang dang ngak angan Nguyễn Việt Hùng khan brei thau, labaih 20 thun ndam gam saong mrai mayim pataih, ong manyim pak hu yaok rituh janih, yaok ribau blah pataih khan bai, min dom kaya ngui Sambo bar Tay Nguyen gam tui bruk ngak bahrau “yau hatai” blaoh ong khin payua tal urang bangsa Randaiy daok di tinh Dak Lak.

“Ilamo Randaiy ralo daok di dalam dom kaya pataom pataih khan bai di dahlak. Di truh dalam glao hatai di akau, dalau abih ieu lac hu urang bangsa Randaiy. Ban putih ieu lac bingu kopi cà phê di puac thun oh var hu di dalam hatai meng jaman daok uranaih, tuk kapal haok pabiar chraok trun Dak Lak, langik tasik yau ye putih bih, ban mbong potih bak bon ceik Tay Nguyen drei yau ye gilac nao jaman uranaih meng kan diah”.

Di angaok jalan dah krah di bruk ngak tabiak kaya ngui khan pataih hu dom adei sa-ai di mbon palei mayim papan. Nyu jeng mai tui dom palak tangin gheih ghang di urang bangsa hu jeng dom kaya brei pataom khik ramik ilamu di dom yaok bangsa. Muk H Yam BKrông, daok di mbon Tơng Jú, xa Ea Kao, ban Buôn Ma Thuột, tinh Dak Lak khan lac, bruk bluh yava raidiuk barau tame pataih khan bai daong brei jalan nao karo kajap brei ka bruk kik ramik jeng ye patagok ilamu drap ar ini.

“Drei ngak pataih jih dalah yau nan ye rup drei tuk halei jeng caong khin jih dalah pataih khan bai di bangsa Randaiy ban Buôn Ma Thuột jeng ye dalam tinh Dak Lak, jeng ye abih khan bai pataih jih dalah Tay Nguyen hu patagok khang jang, nao tui jalan bahrau, min tapi oh brei klak ilamo bangsa. Meng bingula bangsa brei patagok piah ka pataih khan bai Jih dalah Tay Nguyen hu ralo janih mbaok saong hu patagok khang, daong paralo bruk ngak mbang brei ka mikva ngak tabiak jih dalah”.

Bahrau meng blaoh, danak dak khan ao meng jih dalah hu brei peih ngak di tinh Dak Lak pataom hu ralo kumei siam binai, urang yaih makrei saong dom urang ngak tabiak kaya ngui cuk hu ba jalan brei ka bruk yaih khan jeng ye brei paraong angan ilamu drap ar ini, daong pok praong pok glaong bruk ngak manyim pataih jih dalah di bhum palei. Tui muk Nguyễn Thụy Phương Hiếu, Phaok Yam ndok So Ilamo, Pahat padhih saong Jirrah Rivang tinh Dak Lak, mayah hu dak jeng harei peih ngak danak dak mada siam brei ka bruk pambuak jalan blei salih ndap nda kaya ngak meng jih dahlah.

“Sở dan saong jabat dang peih danak dak caong khin peih ngak yaok thun. Yaok mbang peih ngak mada hu angan, hu janih kadha karei karei di gauk piah pok praong pok glaong urang ngak jih dalah, daong urang manyim pataih khan bai pablei hu ndap nda, piah ka urang dah krah ndap nda brei ngak hu kaya ngui barau jang jeng ye brei khan bai pataih jih dalah oh sa janih di angak khan ao blaoh nyu daok mboh di dom janih karei brei pok yaom urang ngak nyu”.

Bruk ba pataih khan bai jih dalah tame gilang kaya drap ar khan ao bahrau mada daong ka nyu mai dak jaik jang manuac urang pandar nyu, daong papraong bruk khik ramik ilamo pataih khan baijih dalah, paglaong bruk mayim dan saong urang manyim. Langiu di nan, piah ka kan bai pataih thổ cẩm patagok karo kajap, njauk brei hu hatai ba tame ngak yau gauk, padang jalan ngak siam makre meng bruk pato padei bruk ngak, bruk neh bruk padah thaih thaok bingula, bruk padang angan tal bruk khik siam ndap nda pataih khan bai jih dalah bhum palei./.