Ieu lac sa di dalam dom hợp tác xã bhian pala baoh durian Dak Lak, HTX Dich vu Ngak nong Tân Lập Đông, huyen Krông Búk, yaok thun pablei tabiak darak pasar labaih 950 tan baoh durian. Ralo di nyu urang blei salih blei tame piah pablei tapa darak pasar nagar Cina. Thun 2024, jien mek tame meng pablei baoh durieng di HTX hu labaih 66 ty dong, daong ka rilo urang dalam HTX patagok glaong rai diuk di drei. 

Thun ini, mikva daok patui bruk caong khin eik glang sangka phun pala ka nyu siam, tame bilan paik baoh hu rilo. Yau nan min, dom adat hukum bahrau di nagar Cina brei ka bruk bruk pasang iek tui asal Cadimi saong asal kanyik O dalam baoh durieng blei tame meng langiu negar daok ngak ka rilo urang pala duh hatai. Ong Nguyễn Hữu Chiến, Akaok HTX Dich vu Ngak nong Tân Lập Đông brei thau, oh ka hu pato pasram atau paba brei khan cambaih laih halei ka dom asal ini, jang yau jalan pasang iek taong yaom, jalan ngak yau habar:

 “Ndom ka asal kanyik O, khaol dahlak biak tatuak drei saong jeng oh thau nyu mai meng halei. Bruk ini gam pambak tame Jabat khik iek karja samar duah mboh makna di bruk kandaong labaih asal ini, meng nan peih ngak dalam hop tac xa, blaoh ka meng pambak prong tabiak dalam bhap bani. Urak ini, mikva oh thau nyu kandaong tavak meng tanak halei. Biak oh thau jalan ngak yau habar”.

Tui Tien si Phan Việt Hà, Phaok Akaok Jabat Ilamu padang glai Tay Nguyen, durian ieu lac sa janih di dom phun pala daok cak rok patagok khang di Dak Lak, ba mai yaom kinh te glaong. Yau nan ye, bruk pambuak gauk di urang ngak tabiak saong urang ngak mbang blei salih, HTX, kapul pambuak bruk to hop tac oh ka catang; dom baoh sang urang pala kayau oh ka pandar jru pacang khik phun pala saong khak drak njauk di njauk cara. Ini ieu lac sa dalam dalam dom kadha ba tal bruk kandaong labaih asal jru cavao, abih di nyu nan lac khan brei thau dahlau ka Cadimi. Tien si Phan Việt Hà ndom mayai lac: tal tuk njauk dak padang tanut asal ilamu ka durian saong salih bahrau jalan pala ngak.

"Dom bruk kadha ini njauk hu langyah tui jalan cak rok patagok khang kajap saong suai lavik. Pagap ye, njauk pasiam taneh hadei di taong yaom mong iek hu njom mbaak kanyik O atau Cadimi halei oh. Insitu roh duah meda pambuak bruk haong Kapul nyaom Durian piah padang ngak danak dak cara kadha pala drak suai lavik. Njauk tal tuk mikva saneng tal bruk pala durian tui jalan khang kajap, plaih nduak tui pacuh paralo baoh dalam tukvak katut panak blaoh tamuh dom kanjah jhak hadei di nan”.

Ong Vũ Đức Côn, Akaok Kapul nyaom Durian Dak Lak brei thau, anak dom caong khin dak harei dak glaong meng darak pasar, ye ilamo nan lac “gai taik peih” piah ka gah ndap nda kaya durieng yam tapa cuang kandah. Kapul nyaom hu mboh tangin pambuak bruk saong gah Pasak insitu Ilamu Ngak glai Tay Nguyen piah roh duah, panduan jao dom ilamo dalam bruk pala ngak durian vaktu 2025 - 2030.

 “Khaol dahlak dak padang danak dak pambuak bruk gam samar drah gam suai lavik. Anak mata tal meda mek brei ieik grauk labik dalam tỉnh piah taong yaom ka bruk njaom mbak Cadimi saong kanyik O, meng nan brei thau ka makna di bruk kandaong labaih dalam ndap nda. Atah lavik, khaol dahlak njauk dak padang yaom tanut chuan di pak ala saong samar patabiak piah pasang iek yaom asal di nyu”.

Tui sarak adat brei ka bruk blei tame dak harei dak catang, dalam nan hu bruk mai meng darak pasar nagar Cina, gah pandap durieng Dak Lak jang yau di Viet Nam njauk salih tui meyah oh khin ta-eng drei ngak lahik pren khang. Piah ngak hu bruk nan, oh njauk sa janih thau pambak tame ilamu di urang pala blaoh daok njauk hu bruk tame mbaok di dom urang ilamo, di jamariak ngak kong bahrau. Gam saong nan lac hatai kham merat meng dom mintri kajar dhan phun dalam bruk padang ngak dom jalan ngak piah langyah ka nyu tantu cambaih laih bruk kandaong labaih asal pakuak dalam dom janih pandap panda kaya ngak nong urak ini./.