Oh daok kuhria ka bruk pruh ia dom ka ginup, drak khak tuk halei, atau dom harei jalval oh tabiak rivang bein hu, ong Lê Văn Thành daok di xa Ea Yông, huyen Krông Pắc urak ini sahnang hatai kayua taong abih tanut tathah, hatai caong tuh pruh ia, tukvak pala drak…jeng hu caik dalam jalan raok majam jak saong hu kakei tapak tapa phone. Ong Thành brei thau meng tuk meda pasang iek tanut tathah saong pandar tuh pruh ia meng atah, bein durian labaih 3 ha di ong tuk halei jeng hijau siam, yaom lac langik oh lagaih: “Hu ilamo ngak kong jamraik bahrau ini rahra mbuan si ngak jang, hu si pandar drei meng thau dalam taneh drei kurang hagait, drei njauk buh khak hagait, ia hu ginup halei piah mbuan pala drak ka njauk jang”.

Daok amuk Hroda Ayun daok di xa Ea Kênh, huyen Krông Pắc brei thau, baoh sang amuk dak harei dak salih meng bruk pala kaphe tui jalan klak tapa bruk pala kaphe tui jalan hadah jak bahrau. Dom bruk pala drak hu pata-eng ngak yau ye: majam raok brei tanjaoh ia, ta-eng drak khak otomatik, majam pasang hadah meng gom pin ia harei… hu daong ka mikva patakik prein sangka, patakik ia, khak drak, ndap nda pala drak. Tui amuk Hroda Ayun, yaom lac jien buh tabiak ngak bruk ini meng akaok meti jeng glaong mbiah, min ba mai jak jeng biak siam lagaih: “Ngak kaphe hadah krah jak oh lac daong patakik tathuak nerak athak sang kareih camin blaoh nyu daok pacang khik taneh, halau ia saong alam moi truong sinh thai. Rahra gam mek hu siam glaong gam pacang khik hu prein yava di drei saong bol bhap rahra.”

Di bruk ngak praong jang, HTX Meyit meyao ngak nong hacih sa-at huyen Krông Pắc hu pandar ilamo ngak kong taka so labaih 200 hecta durian Vietgap di urang daok dalam kapul hop tac xa. Ong Mai Đình Thọ, Akaok Kapul dui ba HTX brei thau, bruk pambuak ung dung ilamo kong nghe lek taka so oh lac paglaong yaom kaom ndap nda bo daok ba tabiak yaom kaom bahrau ka durian meng bruk ngak cambaih laih yaok bruk ngak. Tal ini, Hop tac xa brei pagam QR ka yaok bein piah pasang iek di angaok lek taka so, daong brei thau baoh mai meng halei, labik pala saong brei angan ka yaok phun durian. Tapa di nan, gam paglaong hatai je haong tuai damuai, gam paglaong yaom kaom ndap nda.

Gah ngak nong urak ini jeng lac sa gah hu ngak rilo dalam bruk ngak mbang duah jien di Dak Lak, hu labaih 35% GRDP. Kayua nan, gah ngak nong di tinh hu pathau khan, daong urang ngak nong saong gah ngak mbang pablei salih ngak salih lek taka so dalam bruk ngak mbang, pablei salih, pablei ndap nda. Tal ini, rilo rahra hu ngak dom jalan pala drak bahrau, paglaong bruk pasang iek bruk pala drak. Min, piah paglaong jang vek siam lagaih di bruk salih lek taka so dalam gah ngak nong, tuk vak anak tal, ong Nguyễn Thiên Văn, Phaok akaok UB Bhap bini tinh Dak Lak brei thau: “Tinh daok peih dom sarak daong, dalam nan hu pandar ilamo kong nghe glaong, salih taka so dalam bruk padang angan, padang angan taka bhum pala pagam haong ma vach, pandar kong nghe lek taka so. Meng nan daong ka yaom kaom angan ndap nda dalam tinh Dak Lak dak harei dak hu labik dang, jeng yau mek hu yaom kaom, ba mai kein lagaih ka urang ngak nong saong gah ngak mbang pablei salih.”

Salih lek taka so daok dak harei dak brei mboh siam makre dalam bruk paglaong yaom kaom ndap nda kaya nong, peih praong darak pasar pablei saong jhul tagok cakrok kinh te palei pala di Dak Lak. Bruk pambuak gauk khang kajap di karja, gah ngak mbang pablei salih saong rahra ieu lac asal kadha piah pasang sa gah ngak nong bahrau, karo kajap saong pambuak gauk khang tame mblang praong dunya./.