Ban raya Ho Chi Minh hu 17 baoh gilang khik drap ar, dalam nan 6 baoh muyim gilang di ta-eng urang. Yaok baoh gilang hu parang, khik piah dom angan gah sajarah, my thuat, mesuh metak, ao dhai, urang kamei… Kayua hu rilo gah nan yaok baoh gilang khik drap ar jeng kham merat patagok kein lagaih di drei piah dui pachreih tuai damuai mai jirah rivang saong ba yaom kaom ndap nda mai jaik jang haong menuac urang.

Lê Thị Hạ, sinh vien bac thun sa di Sang bac ĐH Hùng Vương, mai tal baoh gilang khik drap ar Sajarah Ban raya Ho Chi Minh brei thau, ini lac mbang akaok meti Hạ nao gilang di Ban raya. Dahlau nan Hạ hu maong iek di angaok mang xa hoi saong pang khau tin tapa yut cuai:

“Adei mboh baoh muyim gilang parang tui yaok tukvak sajarah, dak harei thaik thaot dak gheih ghang, tantu jang. Tuk jirah rivang tapak, adei mboh labik ini laneing lanoi saong gheih ghang jang.”

Amuk Nguyễn Khắc Xuân Thi, Phaok Yam ndok baoh Gilang khik drap ar Sajarah Ban raya Ho Chi Minh brei thau, urak ini labik ini daok khik piah labaih 44.000 ndap nda meng jaman dahlau tal jaman Patao raja Nguyễn, gam haong rilo ndap nda ilamo di dom bangsa gah Meraong negar saong dom negar dalam Asia. Langiu di brei pandar jamraik ngak kong piah pasang iek ndap nda, Gilang daok jhul khang ilamo ngak kong dalam bruk parang yau pagam jamraik hu mata thau pang binguk, ma QR di dom labik parang piah tuai damuai jirah rivang meda hu duah thau maong ieik cambaih laih.

Jaik di tal, baoh Gilang khik drap ar brei ngak dom he thong ta-eng langyah tui dua sap bahsa (Viet – Anh Engrik) piah yaih khan 18 bilik parang urak ini daok hu. Tui amuk Thi, bruk brei thau khau tin hu baoh gilang sangka iek praong, dahlau abih di nyu hu di angaok intenet piah jaik taphia haong urang sit thun umo:

“Thun dahlau, tame harei pahadar 45 thun padang, baoh Gilang khik drap arba tabiak paok brei mboh angan bahrau, hu rahra, abih di nyu nan lac rai rah sit thun umo hu mai rilo, hu tukvak hu labaih 2 trieu mbang mai jirah/bilan. Gam haong dom bruk parang online ye ini jeng lac bruk ngak truyen thong siam lagaih.”

Dom baoh gilang di ta-eng baoh sang urang khik drap ar di Ban raya Ho Chi Minh daok daong rilo tame bruk khik ramik saong patagok yaom kaom ilamo. Yaom lac ta-eng urang menuac, min dom gilang hu rilo ndap nda hu yaom glaong, karei oh mbuan si mboh.

Rilo abih meda khan tal yau ye Gilang khik drap ar Ao dhai Viet Nam, Gilang Y hoc meng kal Viet Nam, Gilang Đỗ Hùng (Quan 1), Gilang Biet dong Sai Gon,… Dalam nan, Gilang Ao dhai kayua urang thiet ke Sĩ Hoàng padang tabiak, lac sa dalam dom gilang ta-eng urang akaok meti di Ban raya Ho Chi Minh, parang ao dhai meng jaman akaok meti di nyu tal jaman bahrau urak ini. Yaom lac rah tapa rilo kan kandah, gilang ini tal urak ini jeng patui veik patagok meng bruk pagam haong bruk jirah rivang.

Tui amuk Lê Tú Cẩm, Akaok Kapul Drap ar Ilamo Ban raya Ho Chi Minh, majam gilang di Ban raya Ho Chi Minh hu ngak bruk biak cati catang dut haong dalam negar. Amuk pagap yau, baoh gilang inem mek jaman masuh ieu lac sa di dalam dom baoh gilang hu tuai damuai mai jirah biak rilo saong siam lagaih, tuk ndom mayai tal dom duas dalam mesuh metak, dom inem caik gilac, nan gilang ini hu biak rilo rahra sangka tal oh lac tuai damuai dalam negar bo daok lac tuai damuai negar langiu. Atau Gilang khik drap ar Ho Chi Minh – dhan chi nhanh Ban raya Ho Chi Minh jeng lac sa labik piah mai oh kurang hu ngan haong tuai damuai tuk mai tal ban raya angan Wa Ho. Amuk Lê Tú Cẩm ndom meyai lac:

“Yaom mada lac hu baoh gilang ngak bruk hu siam lagaih, hu gilang khik drap ar daok gaok kan kandah, min maong yaom gilac, sa majam gilang pakat karja saong di ta-eng urang di Ban raya Ho Chi Minh jeng hu dom rik daong rilo ka bruk khik ramik saong patagok drap ar ilamo.”

Yaom lac ril daong rilo tame bruk pambak dom yaom kaom ilamo bangsa, min dom gilang di ya-eng urang jeng daok gaok rilo kan kandah dalam bruk patagok suai atah. Langiu sarak daong meng karja, lap ka jien je, biak khin hu urang ngak bruk lagaih piah dom gilang ini meda patagok jang veik bruk di drei dalam bruk khik ramik saong patagok drap ar./.