Di kapul pambuak bruk Mỹ Nam 2, xa Mỹ Quý, huyen Tháp Mười hu 66 baoh sang hu ngak padai siam glaong tathuak nerak biar gam haong cakrok hijao haong taneh praong labaih 100 hecta. Ngan haong bruk tacei ba di gah karja chuc nang dom urang dalam kapul hu pandar njauk jalan pala drak, pandar tok sa janih pajaih ka mblang hamu, pajaih hu pala trun jaik 50%, pandar samu jamraik, ngak padai ia padai thu pablak gauk.

Ong Nguyễn Thanh Binh brei thau, pala drak tui jalan di sarak rahra patakik pajaih tuk drak padai, patakik khak drak, jru pametai halak haling, padai yuak hu, asar siam di padai tagok dut haong jalan pala drak meng kal. Bruk hu makna lac paglaong jien mek tame ka rahra, daong patakik tathuak nerak sang kreih camin dalam bruk pala drak.

“Maong yau ngak tui danak dak ini kan jang dut saong dahlau, meng nan ngak tui jalan klak, palai jien buh tabiak ngak bo oh yuak hu rilo. Padai 50 harei, yuak kuak hu rilo dut haong dahlau, 2 bilan hu pruh 2 mbang jru, mbang dahlau huac nan 7 var pruh sa mbang, 1 bilan pruh 3-4  mbang, jien buh tabiak palai rilo, urak ini ye hu patrun rilo. Ngak tui danak dak njauk pruh ye pruh, oh njauk pruh ye oh pruh”.

Ong Bùi Phước Thành, urang daok dalam kapul ngak padai brei thau, tuk bahrau hu mbaok tame danak dak ye rilo urang daok caga ka bruk siam lagaih di nyu min tapa bilan yuak padai ye hu brei mboh bruk siam lagaih di sarak, ini lac jalan ngak njauk lagaih ka gah padai brah.

“Tuk akaok meti jeng daok oh ka ba abih tung tian ngak, min tal tuk tame bruk ye ye mboh hu rilo bruk siam piah ka drei bac megru, mek hu ilamo. Bruk ini lac mikva brei hu cih vak gilac asal kadha ngak hamu di drei, piah thau ka jien padai buh tabiak ngak, jien mek tame hu dom saong jien laba hu dom. Jeng hu urang jakar mai daong duah mboh halak haling ka meng pruh jru, yau meng kal, pruh sa adit sa mbang, urak ini hu halak ka meng pruh”.

Danak dak hu pambuak tal jalan sahneng ka bruk ngak mbang di urang ngak nong jeng yau bruk pato tacei ngak mbang di urang jakar bhum palei. Rahra hu salih jalan sahneng ngak mbang pala drak tui jalan meng kal tapa jalan karo kajap, pamaong tal tathuak nerak biar, parilo jien mek tame saong pacang khik alam langik. Gam haong nan, di dom bhum palei urang jakar gah jamraik ky thuat hu tacei ba rahra pala drak tui jalan kuhria piah ba mai siam lagaih. Ong Đoàn Văn Vượng, xa Thanh Lợi, huyen Tháp Mười brei thau.

“Pagap ia hu tuk tathah tuk thu pablak gauk, tui jalan ngak ky thuat di pakat angaok ba trun, trun khak jru urak ini hu ngak meng kong nghe, rahra drei tok buh jien tabiak piah ka ilamo kong nghe 4.0 ahaok par nyu ngak abih. Tapa jalan ngak jeng hu iek tal peih ngak jalan huu co, sinh hoc ye rahra di ini jeng njauk hatai haong gah pakat angaok ngak tui jalan huu co, sinh hoc”.

Bruk siam lagaih di danak dak brei mboh, gam saong nan lac bruk hu mbaok tame di gah ngak mbang pablei salih hu peih jalan hu makna ka bruk ngak tabiak padai brah tui jalan karo kajap saong tani tanat, bruk ini daok daong ka bruk kuhria patagok karo kajap gah ndap nda padai brah dalam tukvak anak tal, daong tame jalan ngak padang angan brah Viet Nam./.