Xuân Lộc, bhum taneh hu angan lac “Pabah mbang kavait tasei”, lac sa labik hu makna biak praong brei ka bruk mesuh kalin di Mỹ saong karja Sai Gon dahlau daih. Di Ban Long Khánh (hadei ini hu neh tabiak meng huyen Xuân Lộc, tinh Dong Nai), mbang mesuh metak kalin kan di Xuan Lộc – Long Khánh hu rah tabiak.

Ong Phạm Quốc Thân, Akaok Kapul dahlau daih di Kapul Bol lin meng kal di Ban Long Khánh, drut druai hadar hadar, mbang mesuh 12 harei melam peih paha Xuân Lộc – Long Khánh (meng harei 9/4 tal 21/4) lac tukvak rambah abih di raidiuk bon lin di ong.

Min, kayua khat lahik praong saong bruk mesuh metak daok rah tabiak srau kadau, pakat angaok hu pandar kadun, salih tapa gam ngak pakurang prein yava di kol khamang gam, vang vil, gam pacang cakak bol lin daong pandap mbang mbom siu. Ong Pham Quốc Thân hadar gilac:

“Kateik geik tuk drei vang pacang cakak khamang daong pabak pandap mbang mbom siu, blaoh kateik geik di bol lin tapen tasik taong tame peih paha Phan Rang – Phan Thiết ngak ka kol khamang kuhria tal jalan klak balai bo nduac”. 

50 thun tapa, krung meng kal ka mbang mesuh metak di Long Khánh jeng daok tamo di dalam glo akaok ong Nguyễn Tá Dẫn, Phaok akaok dahlau daih di Trung doi Pasang iek, tieu ndoan 28 dac cong, Su ndoan 7, Quan doan 4. Anak di dom mbang mesuh metak praong, ong Dẫn ngak bruk pasang iek, roh duah bhum taneh Long Khánh.

Meng melam 20 tal page harei 21/4, bol lin khamang kadun nduac tui gah Vung tau. Kapul di ong pambuak haong bol lin bhum palei taong cakak di Mbuan ceik Con Rắn saong mek hu urang dang Akaok tinh Long Khánh. Hadei tuk jayah peih paha Long Khánh – Xuân Lộc, ong Dẫn hu salih mai ngak bruk di bhum palei, tok diuk saong chreih chrai ngak bruk karja di khu pho. Ong Nguyễn Tá Dẫn brei thau, yaom lac gilac mai haong raidiuk yau bhian, min hatai di sa urang bol lin meng kan dahlau jeng daok tamo di dalam hatai ong:

“Tal ini di khu pho padang hu kadung jien Hatai anit ranam, thei thei jeng ngak tui. Rilo adei sa-ai bol lin njauk rambuac meng kal jeng buh jien mbang tui sarak di drei piah rik tame kadung jien, daong ka dom baoh sang biak kan kandah”.

Dom rairah hu pajeng tabiak saong praong tagok dalam sron mbon salamat di Ban Long Khánh yau anai gru Hà Thị Minh Thảo, gru pato di Sang bac THCS Hồ Thị Hương, tuk halei jeng iek praong saong thau dhar phol bruk halan tian klak rup drei praong glaong di dom rairah dahlau.

Anai gru Thảo ndom lac, dalam 50 thun daok di ini saong maong mboh bruk salih bahrau di ban Long Khánh, anai dak mboh hadah mboak tuk hu rik tame bruk patagok di bhum palei.

Ngan haong sa urang gru pato, urang pabam anek menuac ka harei hadei, nai gru Thảo thau ka bruk khik ramik saong pato ka urairah hadei hu hatai thau dhar phol saong dom urang halan tian klak rup drei, piah ka dom adei bac magru nao tui sajarah praong glaong meng kal di Long Khánh:

“Hatai kham merat di dahlak hulin lac pato dom adei ka hatai anit ranam bhum palei Long Khánh. Gah pato megru hu dom mbang pakacah duah thau ka sajarah cakrok patagok di Long Khánh. Dalam sang bac, khol dahlak hulin sangka iek praong bruk padang peih dom danak dak duah thau ka halau agha, dom inem mek sajarah di bhum palei”.

Dom krung meng kal ka mbang mesuh metak di Xuân Lộc – Long Khánh di dom bol lin meng kal jeng daok diuk hamiat hamiat. Rairah hadei di Long Khánh harei ini daok khik ramik saong patagok bruk nan, cih vak veik dom blah sajarah praong glaong rairah dahlau hu buh prein padang jeng./.