Xa Phan Hòa hu labaih 2.400 baoh sang saong hu jaik 9.700 urang, mikva daok di 3 palei dalam nan hu: Palei Panat, Palei Ia Mamih, Palei Dik. Bruk duah jien di mikva rilo mai meng bruk ngak nong, dalam nan bruk pala padai ia hu ngak rilo abih.

Camreip njauk ndem tal bruk jak ba gauk padang palei pala bahrau hu peih ngak meng rilo thun tapa. Nao tagok meng kan kathaot, rahra bhap bini rilo ngak mbang pambak tame bruk ngak nong pala drak duah jien tame. Kayua yau nan ye, bruk padang palei pala bahrau, bhum palei gaok biak rilo kan kandah. Min tapa bruk kham merat di karja palei, danak dak padang palei pala bahrau hu ngak ka mbaok meta bhum Phan Hoà salih bahrau. Dom danak dak jalan, gom hadah, sang bac, balai hu buh jien tame ngak, ngak ka mikva chreih chrai, jien mek tame kuhria yaok urang hu tagok glaong. Bruk kuhria hu brei mboh dom baoh sang kathaot rilo gah di xa trun daok mala 50 baoh sang, meblah 2% taong abih baoh sang dalam xa, baoh sang hu mbang hu ngui ginup meda dak harei dak tagok. Dalam xa hu 3 palei jeng hu mbaoh tangin brei angan palei ilamo di rilo thun ini mai.

Lac sa bhum palei gaok rilo kan kandah dalam bruk pala drak raong glang kayua kurang ia, tal ini dom kraong ribaong hu pabak ginup ia tame mblang hamu. Langiu di nan, bruk pandar dom ilamo khoa hoc ky thuat hu ngak saong daok daong ka mikva dak harei dak yuak hu rilo padai. Thun 2024, taong abih taneh pala pajaih padai hu labaih 6.300ha, padai yuak hu labaih 41.600 tan. Dalam nan, padai ia hu labaih 41.200 tan, daok veik lac phun tangei lai.

Dalam thun 2024, xa Phan Hoà patui veik khik kajap dom tanut padang palei pala bahrau. Langiu di nan, mikva di ini daok mbang tui 2 danak dak lac trun kathaot karo kajap saong danak dak patagok kinh te xa hoi bhum bangsa takik saong bhum ceik. Dom bruk kuhria di dom danak dak hu daong ka bhum palei padang rilo danak dak, bruk patruh eik patrun kathaot mboh trun ralo thun hadei takik jang thun dahlau.

Thun 2024, xa Phan Hoà hu daong padang 3 baoh sang ka urang kathaot saong hu jao ka dom baoh sang dahlau Tet Nguyen dan. Ngak bruk brei oh daok baoh sang taik tahak tui jalan ngak di Rajaei, karja palei pambuak haong dom gah kapul nyaom pasang iek, taong yaom, daong ka dom baoh sang kan kandah dalam tukvak anak tal. Bá Hoàng Anh Tuân, Akaok Uy mban Bhap bini xa Phan Hoà, huyen Bắc Bình, tinh Binh Thuan brei thau: “Urak ini karja jeng buh jien tame ngak jalan mbak jeng lagaih piah ka rahra, palei pala jeng biak uan. Salah blaoh jalan mbak mikva ngak mbang jeng hu ginup hu meda, lagaih lo. Palei pala urak ini jeng patagok bruk ngak mbang, hamu taneh padai tangei urak ini jeng lagaih siam abih, sang thei jeng hu ginup hu meda, bruk ngak mbang jeng tani tanat.”

Thun 2024, dalam xa hu 6 jalan hu rahra ngak, Karja daong hu atah 1,4km, jien ngak labaih 1,2 ty dong. Langiu di bruk daong jien, dom baoh sang rahra daok alin taneh piah ka jalan praong laneing lanoi, lagaih jang dalam bruk nao mai. Jalan praong pambuak ban sit Phan Rí Thành haong xa Phan Hoà tayah trak, urak ini hu pasiam pakajap saong brei peih radaih. Daok hu jalan bahrau, mikva dak hảei dak chreih chrai. Ong Khê Văn Thành, Palei Ia Mamih, xa Phan Hoà, huyen Bắc Bình, tinh Binh Thuan: “Mikva jeng mboh hu bruk sangka di Ndang saong Karja, hu pasiam raidiuk, abih di nyu nan lac hu pasiam jalan mbak hacih sa-at, sang danaok gheih kajap laneing lanoi. Dom sang bac, balai y te jeng hu patui veik buh jien tame saong padang labik ka dom jabat, abih di nyu nan lac jabat xa, jabat palei saong jabat kong an. Sang danaok Cam drei ye ngak mbang hu patak pataom ngak mbang padang hu baoh sang siam gheih laneing lanoi piah duh ka bruk ngak mbang di yaok baoh sang.”

Kinh te patagok, bruk khik ramik yaom kaom ilamo di bangsa hu patagok, brei mboh cambaih laih di bruk mikva ba gauk rik daong jien, prein padang sang magik saong kalan bahrau, praong laneing lanoi, pabak hatai caong ka urang tui agama di mikva dalam saong langiu bhum palei.

Mai xa Phan Hoà harei ini, rilo baoh sang padang lầu bahrau glong gheih ghang hu mikva buh jien tame ngak, ngak ka mbaok meta palei pala dak harei dak siam gheih. Tapa nan brei mboh, bruk kham merat rilo di karja saong rahra bhum palei.

Ngan haong asal kadha mek rahra ngak gok, sangka patagok kinh te, paglaong raidiuk rahra, ngan haong dom ilamo dalam bruk padang palei pala bahrau, meng rilo thun tapa, urang jakar saong rahra xa hu rilo urang Cam diuk rai Phan Hoà huyen Bắc Bình iek praong hatai kham merat khik kajap saong paglaong dom tanut, pamaong tal chuan palei pala bahrau paglaong.

Long Thiệu – Diên Dũng - Thông Lý