Sang nai Lê Thị Tuyền Nhung daok di xa Trung Hiếu, huyen Vũng Liêm ieu lac sa di dalam 1.328 baoh sang hu brei daong padang sang meng akaok thun tal ini di Vinh Long. Dom baoh sang taduon mek sang mbang ini ieu lac dom baoh sang daok di dalam sarak karja, baoh sang kathaot dan saong baoh sang urang bangsa takil. Nai Lê Thị Tuyền Nhung ndom mayai lac:

“Karja daong ka adei 60 trieu dong, dalam sang buh tame 20 trieu tra, blaoh kapul dam dara daong ka drei, jaoh pasei, daong pok ho simeng cakong kiak veih bih ralo jien jeng ye mboh bui sambai sang danaok padang ngak salah blaoh ka adei.”

Tui Kapul urang patacei danak dak yah sang tanje, sang taik tahak di tinh Vinh Long, danak dak tuk halei jeng sa hatai saong gauk gam saong majam chinh tri dan bhap bini; patagok rup di urang pan akaok, patacei, hatai kham marat di Kapul patacei abih pakat. Bruk pilih ruah, iek glang, duah mek urang taduan mek hadiah brei di sarak karja njauk hukum njauk adat. Bruk taong yaom, iek glang, pachreih, lang yah kandah kan ka bhum palei hu drah samar njauk lagaih. Bruk dakvah, jak ba tantu tal dhua; tal ralo janih kadha. Tal tuk bhap bini paham thau cambac lac bruk ngak, makna di danak dak, urang chreih ngak tui, gam nao tui dan saong daong ba rup tame bruk ngak.

Bruk jak ba ralo janih prein yava, pambuak gilang jien karja nagar, jak ba gam gauk ngak xã hội hóa saong rik daong di bhap bini, daong tame ngak dang ngak jeng ye brei karo di danak dak. Tinh Vinh Long daok jak dom kapul dam dara rik daong tame bruk ngak padang sang, piah patrun jien buh tame di danak dak. Sa-ai Trần Công Khánh, Bi thu Tinh kapul damdara Vinh Long brei thau:

“Ngak tui danak dak jalan ngak di Kapul patacei bruk yah sang taik tahak sang kadai sang nerah di karja tinh ye Kapul Tinh ndoan dam dara peih ngak pakat mintri tui ralo btuk ngak njauk lagaih, dalam nan pataom prein daong harei ngak ka dom sang jeng ye jak ba dom urang ngak mbang bleih salih daong jien piah daong tame bruk ngak danak dak. Tui di nan hu pakat mintri chreih kham marat ba tame ralo danak dak, tapak tame bruk njauk bruk siam bruk tapak daong hu 25 baoh sang dan saong labaih 200 harei ngak.”

Ong Trần Thanh Lâm, Phaok akaok UB Mat tran Negar Viet Nam tinh Vinh Long brei thau lac, dalam yaok labaih 1 ribau baoh sang barau jao ka 497 baoh sang hu urang klak rup ka katmang, urang gauk ralo saong liet si hu rang klak rup, 790 baoh sang urang kathaot, jaik kathaot dan saong 41 baoh sang urang bangsa takik. Tong abih jien di nyu bih 86 ty dong:

“Di masa meng anak khol akau akan daok taong yaom ieik glang chung njauk barau tamuk tabiak sang kathaot, sang jaik kathaot, sang jaik kathaot tamuh tabiak tuh ngak mbang. Urak ini ka mboh, cang mbiah bilan 6, bilan 7 khol kau daok mada ngak tui.”

Bi thu Tinh uy Vinh Long ong Trần Tiến Dũng, Akaok Kapul patacei hu brei thau lac, langiu ngak blaoh danak dak yah bih sang taik tahak ka rahra bhap bini urang karja di dalam majam chinh tri di tinh Vinh Long daok paglaong kham marat peih ralo bruk ngak mbang, piah ka bhap bini urang ngak duah hu jien ralo jang, chul khang bruk iek glang prein yava, bac magru, piah ka bhap bini taduan mek hu kein lagaih siam makre di sarak Ndang saong karja./.