Tuk halei jeng tui iek khau tin pambuak tal jalan pagam saong ramik pagap takre karja, urang ndang angan Nguyễn Văn Lập, daok di xa Hòa Thắng, ban Buôn Ma Thuột, tinh Dak Lak mboh bruk ini biak yau ye mbang salih bahrau. Ong saong rilo urang rahra jie lac, bruk salih bahrau ini brei peih tabiak bruk patagok ka taneh ia dalam harei hadei.

“Bruk quy hoach saong bruk patagok kinh te brei peih praong jang, brei kein lagaih piah jhul tagok dom jalan sahneng bahrau, rahra hu pambuak praong jang, ndom biai bac magru haong gauk rilo jang, saong raidiuk ilamo meda jeng hu rilo jang.”

Ngan saong amuk Ngô Thị Minh Trinh, Phaok Bi thu Thuong truc Huyen uy  Krông Pắc, tinh Dak Lak, bruk tamat padeih danak dak di karja hanh chinh pakat huyen, amuk saong kapul urang jakar, urang sa pakat brei gok kan kandah rilo abih. Min, bruk ramik takik karja lac sa bruk njauk ngak, hu kein lagaih ka taneh ia, rahra yau nan ye yaok urang jakar, urang ndang di huyen thei jeng thau cambaih laih ka bruk di drei.

“Tukvak bahrau ngak jeng hu duh hatai, suh sah lac bruk oh plaih hu. Min tapa dom bruk khan lang, salih, tani tanat, ye urang jakar, urang ndang saong urang ngak bruk karja hu thau tani tanat bruk hu makna di jalan, meng nan sa hatai ngak tui kayua bruk patagok di taneh ia.”

Tui bruk pagam pakat xa hu brei tapa di Nyaom biai mbang ka 11 Mbang chap hanh Trung uong Ndang mbang ka XIII, dom karja palei pakat xa hu trun labaih 70%, lac brei hu 3 xa pagam jeng 1 xa. Dom urang jakar ndang di Dak Lak jeng mboh lac, luac tukvak ngak bruk ye oh plaih hu dom kan kandah meng akaok meti hadei bruk pagam, meng bruk randap daok dang, labik daok tal labik ngak bruk bahrau atah di gauk. Min, hatai ba rup ngak dahlau saong bruk ngak di urang jakar, urang ndang di ini hu ngak hatai je saong hatai chreih chrai ngak tui jalan ngak biak karo kajap. Amuk Cao Thị Thúy Nga, Bi thu Ndang uy xa Tân Lập, huyen Krông Búk, tinh Dak Lak, brei thau:

“Khol dahlak hulin parilo urang jakar mai labik ngak pakat palei, piah ngak siam jang dom bruk duh ka rahra – njauk haong jalan sahneng “Urang jakar lac duh bruk ka rahra”. Yaom lac tuk brei ngak rilo bruk, min gam hatai thau ka bruk di drei glaong, khol dahlak hulin tuk halei jeng thau lac: daok sa harei ngak urang jakar ye daok ba abih tung tian ka bruk ngak di drei brei ka rahra.”

Urak ini, dalam tinh Dak Lak hu 180 labik karja pakat xa (dalam nan hu xa, phuong, ban sit), hadei tuk ramik kuhria daok tok 45 labik karja, trun labaih 75%. Tui ong Nguyễn Hoài Dương, Akaok Mbang Pathau khan saong Jak ba Tinh Dak Lak, bruk ramik ini oh sa janih daong bruk brei patakik jabat karja, ramik bruk gilac ka urang jakar blaoh daok lac sa kein lagaih piah rabha pakat, rabha bruk khang jang ka pakat xa. Meng nan, karja jaik rahra jang, duh ka rahra hu kein lagaih saong siam lagaih jang.

“Tukvak blaoh tapa, dom bhum palei saong dom gah hu dak yam ramik gilac karja saong tal ini taong abih bruk daok nao njauk jalan. Tukvak meng anak mai tal, khol dahlak hulin daok patui bruk jhul khang bruk pagam tinh, klak pakat huyen, pagam pakat xa. Ini lac sa jalan ngak biak njauk, njauk haong bruk rah tabiak di langiu, daong langyah dom kan kandah urak ini saong paglaong siam gheih dom kein lagaih urak ini saong paglaong siam lagaih di yaok bhum palei, daong patagok kinh te – xa hoi pagam saong khik kajap quoc phong, an ninh karo kajap.”

Ngan haong bruk “ Dak padang gilac karja palei dua pakat oh lac sa bruk ramik ka gah karja, blaoh daok ieu lac sa bruk salih drei khang dalam ilamo dui ba saong ngak bruk karja”, ye bruk njauk hatai meng angaok trun ala – meng pakat uy, karja tal yaok urang jakar, urang ndang saong rahra daok di Dak Lak lac “anek kier” khik kajap ka bruk pagam rah tabiak hu lagaih siam saong karo kajap./.