Thun 1990, kien truc su Nguyễn Hữu Thái nao daok ia langiu. Ong daok di Canada, Amirik, Frang saong nao pato ralo sang bac dai hoc di dunya. Min, hatai lac: Nao piah lac gilac mai, yau nan ye tuk dom anek praong dam dara, abih urang dalam baoh sang gilac mai Viet Nam. Kayua Bai Gaor-Ban Ho Chi Minh, labik ong tapa thun bilan dam dara masuh matak Amirik, labik ong dang mboh anak mata dalam jarah harei 30/4/1975: Bai Gaor hu peih paha.

Kien truc su Nguyễn Hữu Thái brei thau lac Ban raya Ho Chi Minh patagok drah samar, ralo baoh sang praong glaong ngak tui seni kien truc meng kal, daok khik ilamo di pasak ban raya. Bruk ini oh njauk halei jeng ngak hu:

“Labik halei njauk khik ye khik. Labik halei brei ka sang danaok glaong tagok ye brei ka nyu tagok. Min ngak yau habar ka lagaih sang klak sang bahrau. Ban raya hu jiva di nyu ye khik ilamo meng kal Bai Gaor hu ilamo di jaman dahlau di pasat ban raya”     

Labaih 300 thun, Bai Gaor-Ban raya Ho Chi Minh ieu lac bhum taneh daok “mada”. Yaom dam dara di nyu peih khang ka banraya dalam dom jaman jarah. Dalam nan, hadei di peih paha, kurang sap janih, Ban raya Ho Chi Minh jeng nao dahlau dalam bruk ngak tui “khin sahneng, khin ngak, khin dang halan rup” di urang pan akaok ban raya.

Di dalam salih bahrau, Ban raya Ho Chi Minh dang khang angan labik Pasak praong di nagar. Mayah 10 thun meng di thun 1975 tal 1985, taong abih bruk ngak hu mek hu tagok 2,7%/thun ye dom thun salih bahrau (meng 1986 tal 2010), GRDP tagok 10,5%/thun. Jien mek tam yaok akaok urang di urang Ban raya Ho Chi Minh do 2,4 mbang dut tui akaok manuac dalam nagar.

Di bilan 4 ini, ralo danak praong taong yaom uak drei tagok di Ban raya Ho Chi Minh gam gam saong nagar hu peih ngak. Dalam nan, Labik ban jirah tasik Cần Giờ gam taneh praong 2.870 ha kayua Kapul Vingroup peih ngak harei 19/4 hu brei yaom lac sa danak dak praong asal pasak, oh bhian mboh dalau, lagaih saong jalan patagok kinh te tasik di Ban raya Ho Chi Minh. Ini lac jalan brei ka urang rahra Cần Giờ hu ralo bruk ngak mbang, patagok raidiuk. Muk Phạm Thị Nhung, urang daok di ban sit Cần Thạnh jie lac:

 “Harei hadei danak dak tame tasik ini mada brei Cần Giờ sa binguk. Cần Giờ urak ini hu jalan patagok siam. Bhap bini rahra biak chreih sambai”

Ban raya Ho Chi Minh jeng daok marat samar peih dom bruk ramik jabat ka siam kalagaih tui Sarak 18 di Mban Chap hanh Trung uong Ndang. HĐ Bhap bini Ban raya Ho Chi Minh ngak tui sarak pagam tinh Ba Ria - Vung Tau, tinh Binh Duong dan saong Ban raya Ho Chi Minh piah jeng sa baoh ban raya praong mala tapak pakat nagar, mek angan Ban raya Ho Chi Minh. Hadei di ba patame, Ban raya Ho Chi Minh jeng sa ban “ban karei”. Ong Nguyễn Văn Nên, uy vien Mentri Chinh tri, Bi thu Ban uy Ban raya Ho Chi Minh brei thau lac:

“Piah ngak bruk praong nan drei njauk ba abih prein hatai jai njauk pataom prein pataom rup tanggung javap, dang anak ndang, anak bhap bini rahra, pambak tal jaka, urang pan akaok, urang ngak, brei ka sa hatian sa tung sa jalan tapak nao tal jayah. Khol drei hu sa baoh saneng glaong di abih ieu lac brei ka taneh ia Nagar, bhap bini dan saong Banraya Ho Chi Minh”

Brei ka bruk pahasa Ban raya Ho Chi Minh saong Binh Duong dan Ba Ria -Vung Tau, Taong bi Thu Tô Lâm brei panuac: Ban raya Ho Chi Minh bahrau lac sa akaok kapal akaok radaih, ieu lac prein khang patagok ka bhum Dong Nam bo, Tay Nam bo, Tay Nguyen jeng ye Nam Trung bo, min mai meng bruk ginum prein di tinh, ban gah mraong tui prein khang gah taneh riya, urang ngak nong ngak kong, logistics, jirah, ilamo jeng sa janih prei praong khang abih brei padak khang ka Ban raya Ho Chi Minh bahrau./.