Di labik mikva urang bangsa Châu Ro daok di puk palei Tân Thuận, xa Long Đất, jaik abih rahra jeng thau amuk Nguyễn Thị Xuân (daok ieu lac amuk Bảy Xuân) – Akaok Gah ba brei puk palei saong ieu lac sa urang hu angan, tuk halei jeng jaik taphia urang bangsa Châu Ro.

Amuk Bảy Xuân brei thau, amuk tuk halei jeng caong khin hu daong ngak yau habar brei salih bahrau hu raidiuk ka rahra, abih di nyu dalam nan hu lac dam dara uranaih. Thun 2022 amuk jeng Akaok Gah ba bruk puk palei saong lac sa urang hu angan di dalam bhap bini:

“Kayua mikva kurang bac magru yau nan ye ilamo sahneng kuhria biak kan kandah. Meng dahlau mabuh ruak hakik oh thau nao tal sang iek ruak, tok nao tal dom ong gru taong bhut kamalai, tal dom thun 2017-2018 jeng daok dom bruk ngak oh njauk oh lagaih. Min, meng thun 2021 tal ini ye mikva bangsa takik ngak tui jalan siam, klak abih dom bruk je tame oh lagaih. Urak ini menek, ruak hakik lac nao tal sang iek ruak, dom hatai je oh lagaih hu klak abih”.

Oh lac sa janih hu pathau khan dil samu dom jalan thuan di Ndang, sarak di Karja, urang hu angan di palaei daok salih bruk ngak mbang kan klak, pandar dom ilamo khoa hoc ky thuat tame bruk ngak mbang pala drak.

Sa-ai Đào Văn Tâm, umo 50 thun, daok di palei Lồ Ô, xa Đá Bạc, huyen Châu Đức brei thau, dahlau daih mikva bhum taneh Lồ Ô tok ngak padai sa mbang dalam thun. Piah patagok bruk pala drak, asar siam ka ndap nda ngak nong, karja saong urang hu angan je dalam bhap bini hu pachreih mikva buh jien tame jamraik mac brei salih kabao, lamo, ba ia tame hamu piah ngak padai sa thun hu 2 mbang. Kayua ngak yau nan mikva hu jien mek tame, kinh te hu tagok siam mboh di mata:

“Thun 2000 mikva di ini ngak padai sa thun sa mbang, oh tal oh ganap piah mbang. Hadei ini mikva mang sanang hatai mesraiy jien karja blei mac jamraik chai padai, mac jamraik li-ua ba tame pala drak. Drei ngak mboh nyu hu siam lagaih yau nan ye pato tacei ba ka mikva ngak tui, tal ini mikva thau ngak padai 2 mbang dalam thun meng labaih 25 thun blaoh”.

Amuk Đào Thị Dương, umo 63 thun, urang hu angan dalam bhap bini urang bangsa Châu Ro daok di palei Lồ Ô, xa Đá Bạc, huyen Châu Đức brei thau, tuk karja peih praong jalan meng ban sit Ngãi Giao ba tame xa Đá Bạc, jalan nao tapa palei Lồ Ô saong baoh sang amuk lac baoh sang akaok meti kaoh alin taneh ngak jalan.

Mboh amuk Dương dang akaok ngak dahlau, rilo baoh sang urang bangsa Châu Ro dalam bhum palei jeng kaoh klak phun kayau, bingu hala piah rik taneh ngak jalan.

Ong Đỗ Chí Khởi, Phaok Akaok UB Bhap bini huyen Châu Đức brei thau, urang hu angan je hu buh hatai jai prein yava meng panuac ndom, bruk ngak di drei, jeng sa talei pambuak hu makna daong pathau khan jalan di ndang, sarak, hukum di Karja mai tal bol bhap rahra samu dil saong siam lagaih:

“Gam saong bruk padang karja, harei ini mikva urang bangsa jeng hu mbaok tame bruk pasang iek, tacei ba. Abih di nyu nan lac, di dom sang bac hu dom urang dang akaok urang bangsa Châu Ro, daok ngak bruk rahra ye dom urang nan jeng hu mbaok tame dom pasak ilamo. Daok di pakat huyen ye mikva jeng hu urang jakar mbang tui sarak, tuk dom urang nan hu mbaok tame ye dom sarak hu peih ngak siam tal rahra”.

Meda ndom mayai lac, rilo thun tapa urang hu angan je dalam bol bhap rahra bangsa takik tinh Ba Ria – Vung Tau lac sa asal kadha hu makna dalam bruk patagok di mikva urang bangsa takik di bhum palei. Bruk patagok bruk di dom urang nan brei rik tame ngak dom jalan patagok kinh te – xa hoi, paglaong raidiuk daok dang, me-in ka mikva saong khik ramik ilamo bangsa./.