Kreh pandiak akaok bilan 4, di jalan Điện Biên Phủ, Quan 3, rilo kadai kuan pablei di tapen jalan hu ngak bruk biak chreih chrai. Mala di tamra pacang, dom kadai taphia gauk parang pablei ginup janih kaya mbang duh ka urang ngak dalam bilik saong urang ngak bruk di jabat jeng ye di langiu.

Sa chruh radaih jhul pablei lisei huak kreh pandiak di tapen jalan. Di angaok paban parang dom janih yau ye salao meng inox padang caik dom janih kaya kan mbang huak… Taong abih jeng oh hu tuk piah gam, tok mejam meng sa blah nilon. Urang pablei tuak pasaing pabang mbaok min jhaok lisei candiuk kaya mbang meng tangin saoh. Tuk hu sua tangi tal ka bruk khik hacih kaya mbang di mala langik pandiak, ong Tiến – po radaih pablei, ndom meyai lac:

“Dahlak hulin pablei di ini ye pandiak ngak ka kaya mbang mbuan si me-ih jang dut haong bilan hajan. Kayua pandiak khang tukvak pablei panak katut, harei pablei tok 3 mon tuk, meng tuk mon 6 page tal mon tuk 9 meng padeih padei”.

Tui bac si Vương Anh Tài, Akaok jabat Y te Quan 11, dom baoh sang pablei salih ndap mbang di tapen jalan brei hu tut angan pagun sanya khik kajap hacih sa-at ndap kaya mbang saong karja piah ngak tui 10 tanut chuan di So Karo salamat Pandap mbang. Dom tanut chuan ini hu srap gap ndap nda pacang ndap mbang, paban tu garaong brei mek hu njuak tanut siam glaong, urang pablei brei hu harak gar pasang iek prein yava tui yaok tukvak, oh hu ruak njom pambak saong oh gaok tame pandap mbang bo oh hu rao tangin.

“Yaom lac meda hu khol dahlak hulin pasang iek min oh pasang iek hu abih dom urang pablei salih ndap di tapen jalan dalam ban. Bruk ini hu Jabat Y te pambuak haong Uy mban Mat tran Negar quan dang peih ngak, takik abih sa thun sa mbang ka di angaok yaok phuong. Bhian da-a dom urang di dom baoh sang pataom mai piah bac pasram sa mbang”.

Amuk  Phạm Khánh Phong Lan, Yam ndok So Pakaro kaya ndap mbang Ban raya Ho Chi Minh, brei mboh lac bruk pasang iek, dut iek ka bruk pakaro ndap nda kaya mbang ieu lac sa bruk njauk brei ngak gam gam. Dalam nan, pandap mbang pablei di tapen jalan hu brei thau lac sa dalam dom kapul mbuan njauk ruak saong njauk brei pasang iek tani tanat.

Dalam Ban raya Ho Chi Minh urak ini hu labaih 15.400 labik pablei ndap kaya mbang huak di jalan. Banah praong di dalam bruk ini lac pablei tui dom radaih jhul di jalan , kadai pablei pandap mbuan jhul nao labik karei, oh daok sa labik, jeng daok dalam bruk pasang iek.

So Pakaro kaya ndap mbang daok pambuak haong bhum palei padang peih ngak dom var bac pasram, srap gap ilamo jeng yau daong ndap nda ka kaya pablei piah patakik bruk oh hacih sa-at siam karo. Taphia nan, Ban raya Ho Chi Minh jeng padang tui dom bruk “jalan salamat pandap mbang” atau “jalan ban oh hu pandap mbang tapen jalan” di dom quan, huyen.

Urak ini di tukvak salih tapa bilan karei, langik tame pandiak praong, nyu kein lagaih ka anek ruak tamuh, ngak mbuan rah tabiak bruk ruak mek ndap nda kaya mbang manyum. kayua yau nan amuk Phạm Khánh Phong Lan ndom brei caik hatai pachreih lac:

“Rahra brei tuk halei jeng hadar bruk biak mbuan lac meyah hu hatai caong blei 1anih mbang huak di tapen jalan oh hu hacih sa-at ye juai mbang, juai blei, njauk blei dom labik pablei hacih sa-at. Takik abih urang pablei jeng brei caik hatai pabang mbaok, pabang tangin atau cuak pacang gam kaya mbang, tangi ye gam pan kaya mbang gam pan jien. Daok dom kaya mbang caik dalam tu atau dalam naong ye brei, gam tuk, cambaih laih, tani tanat”.

Dang di hatai caong khin mbang menyum samar drah kein lagaih saong dom bruk mbuan ruak mek meng kaya mbang pablei di tapen jalan, kadha khik kajap karo siam salamat kaya mbang oh lac sa janih bruk di dom jabat karja chuc nang. Urang pablei ndap nda kaya mbang huak jeng brei njauk caik hatai sahneng ngak tui tani tanat dom tanut pahacih sa-at ndap nda kaya mbang, gam saong di nan urang blei jeng caga ka drei ilamo piah oh blei dom panuac da-a blei meng dom labik pablei oh hacih sa-at ndap nda kaya mbang huak, daong ngakjeng sa labik pablei salih pandap mbang tapen jalan siam mekre saong salamat jang./.