Palei Lao Chải, xa Khun Há, huyen Tam Đường hu taong abih 100% dong urang bangsa Mong. Kayua hu sa labik gheih siam, langik tasik la-an bingi, karja palei jak ba mikva ngak sang pasiam danaok, pala bingu địa lan, tuh betong jalan, ngak sang homestay, khik ilamo gheih siam di dalam bhum palei. Meng palei kan kathaot dahlau, harei ini palei Lao Chải ngui cuk ao bahrau gheih siam, yaok thun raok taduan labaih 13.000 mbang tuai damuai mai jirah, ma-in iek.

Sa-ai kamei angan Quách Thị Hiền – urang jirah camreip juak takai mai tal palei Lao Chải mboh tatuak drei kayua gheih ghang yau kayau patau daok tamo meng kal dahlau mai di ini, taneh riya glai klo tamo gam saong hatai drap ar di urang bangsa palei drut hatai tuai damuai jirah. Sa-ai Hiền bui sambai lac: “Mbang akaok meti drei mai mboh biak la-an langaoh, rahra bhap bini di ini yau gauk hatian. Ilamo yau daok tamo ye patau kayau kal dahlau, sang danaok glai klo kayau patau gheih ghang hacih sa-at. Manuac urang njauk mai sa mbang di dalam raidiuk”.

Sa-ai Cứ A Ly, baoh sang urang ngak jirah bhap bini di palei Lao Chải khan brei thau lac, dalam palei hu 7 baoh sang ngak homestay. Meng di tuk ngak jirah bhap bini, jien mek tame di yaok baoh sang mboh laneng lanoi jang dahlau. Yau jirah di baoh sang sa-ai, yaok sa thun duah hu labaih 150 trieu dong. Sa-ai Cứ A Ly: “Sang dahlak buh jieng pasiam sang danaok saong raok taduan tuai damuai meng di thun 2021. Tal urak ini sang di dahlak hulin tuk halei jeng kuhria ngak yau habar brei siam di abih ka tuai damuai jirah di drei, khol dahlak kuhria ka tuai jirah meng mbang huak, ndih daok tani tanat. Langiu di nan sang dahlak jeng hu alat ragam jeng ye hu khan ao urang bangsa Mong piah ka urang jirah khin caong”.

Daok di tabung glaong labaih 1.500m dut tui mbaok ia tasik, palei Sì Thâu Chải, xa Hồ Thầu, huyen Tam Đường hu langik siam la-an langaoh, glai klo langik tasik gheih mata. Njauk sa labik brei ka urang jirah iek ma-in, iek glai klo ceik car, la-an bingi gheih ghang gam saong roh duah thau ilamo bangsa Dao. Palei hu 15 baoh sang ngak homestay, mada taduan raok meng 300 tal 400 urang tuai jirah ndih malam.

Ong Lù A Nghi, Po palei Sì Thâu Chải khan brei thau, hu langik tasik ceik glai gheih mata, mikva bhap bini di ini kham bac magru, paglaong yaom ngak yaom mbang ma-in hala jru manei di bangsa Dao taduan raok tuai damuai jirah, 5 thun blaoh, bhian dalam thun taduon raok labaih 10 ribau tuai jirah. Tuai jirah ndih malam dak harei dak ralo, daong ka urang palei duah hu jien takik di nyu labaih 100 trieu dong/dalam thun. Ong Lù A Nghi khan lac: “Bilan raok jirah di mikva bhap bini bangsa bhian tame puac thun saong akaok thun bahrau, yau nan ye khol dalak bhian pahacih palei pala ka gheih ghang hacih sa-at. Dom baoh sang ngak homestay, khol dahlak ramik sang danaok, gigah ndap nda taduan rok jirah mbang huak saong manei ia jru bangsa urang Dao merah”.

Gam hu langik tasik la-an bingi, Lai Chau ieu lac sa labik biak lagaih brei ka patagok bruk ngak jirah sinh thai bhap bini gam saong padeih padei khik prein yava. Tal ini bhum palei hu 13 palei mek hu angan labik jirah bhap bini pakat tinh.

Ong Trần Mạnh Hùng, Akaok So Ilamo, Sukan Padhit saong Jirah Lai Chau brei thau, Sarak 04 di Ban chap hanh Ndang bo tinh brei ka khik caga, patagok siam gheih di dom bangsa, gam saong patagok jirah tukvak 2021 - 2025 yam tapak tal tukvak thun 2030 padaok padang prein khang bahrau ka gah jirah bhum palei. Ong Trần Mạnh Hùng: “Di dalam tukvak anak tal tinh mada caik hatai ngak siam bruk dakvah, jak ba bhap bini tame gam saong karja piah padang, patagok dom yaom kom ilamo di jirah bhum palei. Meng di nan tinh brei pakhang, jak ba pataom prein yava gigah ndap nda kaya ngui. Dalam nan tinh njauk daong rahra bhap bini dalam bruk bac magru, pabak ilamo ka urang ngak jirah di dom labik jirah bhap bini rahra”.

Gam saong langik tasik ceik car glai klo siam gheih, Lai Chau daok ieu lac sa labik hu labaih 19 bangsa takik daok, ilamo hu ralo janih kadha. Bhum palei daok daong paralo bruk ngak ka urang bangsa takik, jeng sa prein khang piah daong khik ramik khik caga ilamo bangsa. Kein lagaih nan daong brei palei pala jirah bhap bini rahra jeng ye jeng sa jalan bahrau ngak mbang patagok kinh te karo kajap, daong rahra bhap bini ngak mbang patagok raidiuk./.