Sa-ai Nguyễn Hoài Hận, umo 35 thun, urang Dang akaok ging ngak ahar di sa khach san di labik Côn Đảo brei thau, asar jrai di Côn Đảo hu biak rilo, nan thun 2020 sa-ai Hận blei asar jrai di rahra angaok kaoh pulao piah ngak ahar meng baoh asar jrai. Thau ka hatai caong nan, sa-ai Hận padang labik ngak asar jrai HANI BAKERY saong parilo ndap nda yau ye: ahar qui asar jrai pahe socola, pahe tui jalan menh kal, mứt asar jrai… Dom ndap nda meng asar jrai di labik hu rilo jabat, sang bac, rahra saong tuai damuai takre, blei ngak ndap alin. Tal ini, kuhria rah tapa yaok harei labik pablei hu labaih 30kg ahar rilo janih, tagok 3 mbang dut haong harei bahrau ngak tabiak. Sa-ai Hận daok duh hatai sahneng, kayua tuai blei dak harei dak ralo nan tukvak anak tal pandap tamo oh hu ginup piah ngak ahar saong sa-ai daok duah jalan piah pasiam:“Pandap tamo lac sa bruk duh hatai di labik ngak ahar. Urak ini hu pambuak tal dom urang ngak hacih sa-at jalan mbak, sang bac pataom blei asar jrai khik piah dahlau. Pambuak haong dom urang daok di dom kaoh pulao taphia piah pataom blei baoh jrai piah ba mai mek asar, meyah lac blei baoh jrai hu mek asar dahlau ye biak kan. Caong khin karja huyen Côn Đảo saong ka bruk pathau khan piah ka urang thau rilo jang”.

Dua ndap nda OCOP “Ikan Darei sa pandiak Côn Đảo” saong “Mực sa pandiak Côn Đảo” jeng hu ngak tabiak saong hu mbaoh tangin meng raidiuk ngak mbang di rahra Côn Đảo. Sa-ai Hoàng Thị Dung, po labik pablei salih Phúc Tường, hu 2 ndap nda OCOP ini khan lac, ame sa-ai lac urang hu 30 thun ngak bruk nao tasik, hu ilamo tabiak tasik nan bruk pilih ruah hadang, mực, ikan that bangi pato gilac ka rilo rairah dalam baoh sang. Tal thun 2020, ndap nda di labik ngak mbang ini hu brei angan OCOP 3 patuk. Sa-ai Dung brei thau, tal ini ndap nda ikan darei sa pandiak hu pablei meng 500-700 kg/bilan, mực sa pandiak hu labaih 1 tan/bilan, tagok meng 30-405 dut haong dahlau tuk mek hu angan OCOP: “Labik ngak mbang brei kham merat paglaong ndap nda ikan darei sa pandiak saong mực sa pandiak Côn Đảo tagok 4 patuk saong pagun sanya khik hu asar siam bangi. Piah ngak hu bruk kuhria ini, labik ngak mbang brei patagok trang thiet bi ngak mbang, ngak ndap nda hu jalan kuhria, jalan ngak njauk haong tanut 4 patuk. Urak ini, labik ngak mbang oh ka hu sang ngak ndap nda, tok ngak tui jalan meng kal saong bambu anak mblang sang”.

Ong Lê Anh Tú, Bi thu Huyen uy Côn Đảo brei thau, tukvak anak tal bhum palei hu ba ndap nda OCOP tame dom palei ngak bruk meng kal hu patagok jirah, padang bruk jirah rivang bein phun jrai, ba drei tame ngak ia mesin krang, paglaong yaom kaom ndap nda OCOP dalam jirah. Côn Đảo kham merat hu 10 - 15 ndap nda OCOP bahrau, paglaong ndap nda hu blaoh tagok tanut OCOP 4 patuk, dak harei dak brei mboh angan OCOP Côn Đảo dalam darak pasar: “Côn Đảo brei mboh, ndap nda OCOP oh lac sa janih daong parilo jien mek tame blaoh nyu daok daok yaih khan ilamo, jirah di bhum palei. Kayua nan, dalam tukvak anak tal, Côn Đảo brei patagok rilo ndap nda OCOP bahrau yau ye: patagok keo asar jrai, ia njec tasik, taiy thao moc bhum palei ba mai sa yava “nghe nhan kaoh pulao”…dom ndap nda nan jeng pandap alin ka tuai damuai yaok mbang hu mai jirah di kaoh pulao Konlon”.

Côn Đảo ieu lac sa labik bhum palei hu takik ndap nda OCOP di tinh Ba Ria - Vung Tau, gam tui di nan Côn Đảo daok hu takai yaom nao karo kajap dalam bruk padang, ngak jeng ndap nda. Pambak tame kein lagaih hu dahlau lac glai saong tasik, dalam harei hadei, ndap nda OCOP di Côn Đảo brei hu angan karei di drei, pagun sanya lac sa ndap nda hu angan di kaoh pulao gheih ghang, daok tamo abih di Dong Nam A ini./.