Tukvak tapa, gah ngak nong An Giang hu patagok khang dalam bruk peih ngak rilo jalan ngak nong pandar brei salih lek taka so, ngak bruk salih cambaih laih meng bruk ngak tabiak-ngak ndap nda-pablei ndap nda kaya ngak nong.

Ngan haong gah pala drak, urang ngak nong hu pandar ahaok par dalam bruk drak pajaih, drak khak, pruh jru pacang khik phun padai dalam bruk ngak padai… Bruk pandar ngak kong ilamo jamraik glaong tame bruk, hu pasiam saong patakik gak kan kandah di meng langik tasik kan si caga, paglaong asar siam saong yaom kaom di ndap nda ngak nong, ba mai kein lagaih ka bruk ngak mbang.

Ong Nguyễn Văn Khanh, xa Phú Thành brei thau ka bruk pandar ilamo jamraik dalam bruk ngak nong di baoh sang: “Ilamo ngak kong pruh jru pacang khik padai meng ahaok par ye nyu njuel ka prein yava manuac urang, yang ka 2 lac nyu pruh njauk ginup jru jang dut haong drei pruh meng tangin. Mac jamraik nyu lai jru biak njauk. Nyu lagaih veik lac dalam bilan hajan, angin yau ini, drei pruh tok dalam mon dom pluh minit lac blaoh paje, jru pruh padai nyu samu”.

Daok ngan haong bruk raong kaya dalam ia. Rilo labik raong athur, menuk ada praong hu gak saong daok ngak pandar var ro khang, hu majam ngak la-an mbiah, gair mbang saong gair manyum ia ta-eng pabak pandap mbang menyum; pasang iek hu pataom tame smart phone piah pandar meng atah. Abih di nyu nan lac dalam gah raong glang kaya dalam ia mikva hu pandar ilamo jamraik bahrau tame ngak ikan tra pablei tabiak langiu negar.

Ong Nguyễn Minh Khôi, Yam ndok Dui ba Kongti co phan ikan pra Viet-Uc brei thau, piah paglaong asar siam ka drei ikan pra, Kongti hu buh jien tame ngak he thong raong bih meng otomatik.“Tapa dom bruk pandar salih lek taka so dalam bruk pala drak, jeng yau dalam bruk dui ba; ka tal tukvak urak ini, pajaih nyu cakrok samar jang labaih 30-40% dut haong rairah meng akaok meti. Daok dom asal kadha karrei yau ti le diuk saong asar ralo ukan jeng hu pasiam tapa yaok rairah". Ong Khôi lac yau nan.

Bruk pandar ilamo jamraik bahrau, salih lek taka so dalam bruk ngak nong hu ngak meng rilo thun ini, ngan haong 625 jamraik par piah pandar dalam bruk drak pajaih, drak khak, pruh jru pacang khik padai, pabak 40% taneh pala padai. Labaih 700 bruk daong patagok bruk ngak mbang pagam haong gah ngak nong pandar ilamo jamraik bahrau …Langiu di nan, dom bhum palei daok padang dom fanpage piah yaih khan ndap nda OCOP, ndap nda karei pagam haong patagok yulit. Langiu di nan gah ngak nong pagam haong dom gah hu pambuak peih ngak, pandar bruk salih lek taka so pataom tame padang dom janih gigah, pandar pasang iek raong glang, jamraik komputer phan men du lieu pajaih kaya dalam ia… Meng nan, hu ba mai siam lagaih ka rahra. Ong Tôn Thất Thinh, Phaok yam ndok So Ngak nong saong Alam tinh An Giang brei thau: "Tapa bruk salih lek taka so hu tagok meng 10-30% dut haong jalan ngak bruk meng kal dahlau. Ini lac bruk peih akaok meti, bruk biak hu makna piah gah ngak nong patui roh duah, pilih ruah, peih praong dalam tukvak anak mai tal, ba gah ngak nong di tinh patagok tui jalan bahrau, siam lagaih saong karo kajjap".

Meda ndom lac salih lek taka so lac “anek kir” ka bruk patagok karo kajjap gah ngak nong, kayua yau nan meng anak tal, gah ngak nong di tinh An Giang brei patui bruk jhul khang bruk salih tui jalan sangka iek praong gah ngak nong hadah krah, ngak bruk karo salamat, duah thau mai meng halei; ndap nda ngak nong hu ba tagok labik thuong mai ndien tu; piah iek yam tal gah pataom pablei, pablei tabiak tui jalan bahrau saong karo kajap./.