Sa Đạ Chais, huyen Lạc Dương tinh Lam Dong, atah di ban Da Lat labaih 60km tui jalan nagar 27C gah ba mbaok tasik. Bol lin meng kal ong Kơ Să Ha Tam, umo 83 thun, urang bangsa K’ho daok di palei Tu Poh, xa Đạ Chais brei thau, rilo urang di mbon palei ini hu klak rup di angaok taneh ini saong hu angan tame Balai pahadar di huyen. Ong drut druai khan tal dom kadha di umo daok dam biak rilo rambah tuk raong ba padauk urang jakar, ngak pambuak bruk saong pabak siu piah duh ka bruk taong kalin labik masuh khamang.

“Drei tahanek ye brei caik hatai tahanek ka tani tanat, brei brei iek piah oh brei athak par tagok, mboh hu athak ye ahaok kol khamang nyu mboh blaoh nyu cuh phao trun, tahanek raong bol lin nyu yau nan. Drei ngak pambuak bruk tuk umo 18,19 thun, daok ngak urang lakei dam halan tian nao pabak siu ye tuk umo 20 thun. Tuk daok ngak ngak lakei dam halan tian, gaok kan kandah abih lac gaok tuk B52 plaik mbom sa talei labik daok. Njauk ndom mayai lac drei jeng metai dalam tukvak nan paje, tuk nan gaok ahaok par plaik mbom ngak metai 7 urang dalam kapul”.

Biak hadah mbaok ka tukvak daok dam hu mbaok tame bruk taong khamang piah peih paha taneh ia, bol lin meng kal ong K’Dĩnh, umo 82 thun, urang bangsa K’ho, daok di xa Lộc Nam, huyen Bảo Lâm ndom lac, bruk klak rup drei di dom rairah dahlau daok daong ka taneh ia urak ini dak harei dak siam gheih.

“Rahra tame bruk katmang, rik daong padai brah raong bol lin. Yaok baoh sang hu ngak danak dak rik kacao brah buh tame khang, ieu lac khang raong bol lin. Hatai di rahra lac yau nan tal tuk peih paha negar. Meng harei sron mbon salamat ye raidiuk di rahra jeng hu patagok jang, siam mekre, kham merat ngak mbang. Urak ini jalan mbak biak lanein lanoi piah nao mai, rahra haong Karja ba gauk ngak, Karja buh jien tame padang jalan mbak praong laneing lanoi, dak harei dak gheih jang. Ndom biak, rah urak ini tok pataom tame ngak meda min”.

50 thun hadei di harei peih paha, dom bhum bangsa takik di tinh Lam Dong halei halei jeng hu salih bahrau. Ong Bon Yô Soan, Phaok Akaok Uy mban Mat tran Negar Viet Nam tinh Lam Dong brei thau, urak ini dom baoh sang kathaot rilo gah dalam tinh tok daok mala 2%, dalam nan baoh sang kathaot urang bangsa takik mala 5,5%. Patagok hatai gul pataom, mikva dom bangsa takik daok patui veik ba gauk padang palei pala ginup meda.

“Urak ini rahra thau salih phun pala athur raong, thau pandar dom ilamo KHKT bahrau ba tame dalam bruk ngak mbang. Dahlak hulin sahneng dalam tukvak anak tal hu salih siam jang ngan haong rahra dalam tinh Lam Dong dalam nan hu rahra bangsa takik”.

Meteh abap blaoh tapa, dom bhum taneh mbom siu kal dahlau urak ini hu jeng dom xa palei ngak nong bahrau patagok. Mikva dom bangsa di tinh Lam Dong daok je tame taneh ia yam tame tukvak patagok bahrau./.