Tal tukvak masa ini, Long An ngak salah blaoh 7 danak dak, labaih 1.800 baoh sang. Dalam tuk di rilo bhum palei karei daok gaok kan kandah ka phun jien ye di Long An, dom kan kandah bo gah ngak mbang pablei salih, gah buh jien tame daok gaok lac sarak buh jien, kadung jien taneh hacih sa-at, tukvak ngak harak gar brei pandar…

Piah pachreih hu gah buh jien tame, ong  Nguyễn Xuân Quang – Akaok HĐQT Kongti Co phan dau tu Nam Long, sa di dalam dom labik hu rilo ilamo peih padang sang daok rahra ndom lac, tinh Long An brei padang tanut ka mbaok taneh, yaom kaom pablei njauk haong yaok bhum palei; dui katut tukvak srap gap buh jien saong buh jien tame, plaih ngak palai jien padai; klah rabha ha tang ky thuat, xa hoi di dom danak dak piah patakik jien buh tabiak saong pandar dom phun jien mesraiy laba lap, kadung jien patak pataom di gah ngak mbang pablei salih saong rahra… Ong Quang ndom mayai lac: “Harak gar ka bruk buh jien tame, tukvak buh jien tame lac asal kadha ngak kan kandah, srau ngan haong gah ngak mbang pablei salih meng nan ini mai. Harak gar peih sang daok rahra gam kan gam biak suai. Tukvak tagok lac jien buh tabiak jeng tagok tui. Suai di thun akaok meti ye jien tagok 10%, suai di thun ka dua ye yaom tagok veik 20% tra. Mboh cambaih laih lac nyu ngak kan kandah tal yaom pablei saong khat lahik ka kein lagaih di gah buh jien tame.”

Ong Dương Long Thành, Akaok HĐQT Kongti Co phan Sáng daok Taneh riya Thắng Lợi, Long An ndom mayai lac, Long An jeng daok rilo asal kadha kan kandah yau ye: kurang kadung jien taneh hacih sa-at, srap gap ieu da-a dom gah buh jien hu mbaok tame; biak karei gauk di yaom kaom padang saong yaom kaom pablei salih, ngak ka darak pasar labaih min oh pabak hu hatai caong sang daok yaom lap; bruk ngak harak gar daok srau, jien laba mesraiy ka urang blei sang daok. Ong Dương Long Thành ndom meyai mayai lac: “Meyah hu kein lagaih ye sarak brei daong ka gah ngak mbang pablei salih dui katut hu tukvak panak peih ngak. Khol dahlak hulin caong abih lac co che saong bruk peih ngak. Khol dahlak hulin jeng khang hatai pandar karja tinh maong iek tapa piah dui katut gilac dom bruk meng 1 thun trun daok 6 bilan yau dahlau daih, kuhria meng tuk gah buh jien hu taneih hacih sa-at ba tame, mbaoh tangin ka gah buh jien ka tal tuk hu harak brei padang…”

Ong Đặng Hoàng Tuấn, Yam ndok So Padang tinh Long An, brei thau: piah kein lagaih jang ka gah buh jien, tinh hu ndom biai ka chuyen mon piah karja palei pasiam cuc bo quy hoach piah peih ngak tui njauk adat. Gam tui di nan So Padang tinh Long An jeng maong iek piah brei ngak dalam danak dak piah langyah asal kadha jien buh tame saong yaom kaom pablei di dom danak dak.

 “Rilo meng lac gah buh jien tame urak ini likau patagok glaong tal, dahlau daih ye rilo danak dak hu brei padang tok 3-4 tal. Urak ini brei padang glaong jang, hu danak dak labaih 10 tal saong hu danak dak tagok labaih 20 tal. Bruk salih piah patagok hieu suat pandar mbaok taneh, labik tapa nan patakik jien buh tabiak, patrun yaom kaom… Yau nan ye hu njauk lagaih haong urang hu jien mek tame biar hu hatai caong ka sang daok di rahra.”

Meng ini tal puac bih quý 3, thun 2025, kuhria rah tapa yaok bilan Long An brei peih ngak sa danak dak sang daok ka rahra. So Padang tinh Long An patui vek pataom tame bruk taoh talaih dom kan kandah ka bruk peih mbaok taneh, dom harak gar ka jien buh tame, padang, taneh riya,… piah jhul samar bruk buh jien tame saong peih ngak dom danak dak hu ginup dalam thun 2025, dak harei dak salah blaoh bruk hu jao dalam thun 2026 saong dom thun hadei./.