Sa var pathau khan, brei thau ka adat hukum, kayua Đồn Biên phòng Nhơn Hưng, Bộ đội Biên phòng An Giang peih tabiak di phường An Phú, ban sit Tịnh Biên, hu labaih 100 menuac hu mbaok, rilo meng lac urang Khmer. Di dom var pathau khan, haong asal kadha saong jalan ngak biak gheih, nan ye mikva chreih chrai tui pang. Langiu di nan, mikva daok hu ba tabiak dom panuac tangi sua ka dom bruk drei oh ka thau cambaih piah urang jakar javap jalei. Đại đức Chau Khi, dang akaok baha Tà Ngáo, phường An Phú, ban sit Tịnh Biên khan lac:“Bộ đội Biên phòng jeng hu mai ini pathau khan ka mikva bangsa Khmer biak rilo: ka adat hukum, ka bruk nao mai tapa negar…; yau ye dahlau daih nao mai tui hatai, daok urak ini nao mai tapa negar brei hu passport. Bộ đội Biên phòng  pathau khan ka Sư biak rilo gah adat hukum, urak ini Sư mai pathau khan veik ka phật tử thau piah ngak njauk tui adat hukum”.

Thượng úy Trương Hoàng Khang, Akaok Kapul jak ba bhap bini, Đồn Biên phòng Vĩnh Nguơn, Bộ đội Biên phòng An Giang brei thau, tuk peih var pathau khan, kapul bhian pambuak bruk pathau khan cambuai haong dom jalan pathau khan karei yau ye tờ rơi, tờ gấp… tacei pato dom asal kadha praong njauk pathau khan. Thượng úy Trương Hoàng Khang daok brei thau lac:“Kapul jak ba di kol dahlak hu padang rilo jalan ngak, peih rilo var pathau khan di palei, haong rilo bruk pathau khan tal bhap bini, abih di nyu lac bhap bini daok di bhum taphia negar. Kapul jak ba bhap bini hu pathau khan ka dom adei sa-ai kamei, kayua yaok adei sa-ai kamei jeng lac sa urang pathau khan, piah meng nan dom adei sa-ai kumei meda khan brei thau dom khau tin, dom adat hukum tal abih menuac sia daok jaik taphia”.

Tui panuac khan di Bộ Chỉ huy Bộ đội Biên phòng An Giang, kadha praong njauk ndom tal dalam bruk khan brei thau ka adat hukum dalam tukvak tapa, oh lac pathau khan tapak bo daok pablak tame dom bruk ngak di dom gah, dom kapul nyaom tapa dom mbang taom gaok ndom biai di bhum taphia negar. Abih di nyu lac, pakat ủy, akaok dom đơn vị patagok hu kein lagaih bruk ngak di dom kalup kapul daong bruk adat hukum di dom xã, phường, ban sit taphia negar. Tapa bruk ngak di dom kalup kapul hu daong paglaong akaok sahneng di bhap bini, daong ka mikva mboh hu bruk ngak di drei ngan saong quyền ngak po bhum taphia negar di taneh ia.

Thượng tá Nguyễn Văn Hiệp, Chính ủy Bộ chỉ huy BĐBP tỉnh An Giang brei thau, taphia bruk patagok khik iek jalan tapen negar, cột mốc saong kham merat pathau khan ka adat hukum tal bhap bini, Bộ đội Biên phòng An Giang jeng daok pambuak bruk khang kajap haong pakat ủy đảng, karja, ban, ngành, kapul nyaom bhum taphia negar, padang dom bruk cakrok kinh tế, ba bruk ngak ka mikva. Tapa nan, mikva tabiak truh kan kathaot, yam tagok dalam raidiuk. Thượng tá Nguyễn Văn Hiệp brei thau:“Harei harei, tapa bruk ngak di palei, dom đơn vị padang jalan ngak, pambuak bruk haong pakat ủy, karja palei, peih pathau khan pataom sa labik praong dalam bhap bini; pambuak bruk haong mặt trận, kapul nyaom saong dom gah piah peih dom bruk pakacah duah thau adat hukum, danak dak daoh tamia saong pablak pathau khan adat hukum. Tapa dom urang hu angan je dalam mikva bangsa, agama piah pathau khan adat hukum”.

Meda ndom lac, bruk an ninh chính trị, siam mekre sron mbon salamat angaok jalan taphia negar di tỉnh An Giang hu tani tanat. Yau nan min, bruk ngak di dom kol tội phạm jeng daok mbuan ba tal dom srau kadau… Kayua yau nan ye, piah ka bruk pathau khan adat hukum daok tagok hu kein lagaih, Đảng ủy, Bộ chỉ huy Bộ đội Biên phòng tỉnh, pakat ủy dang akaok dom đơn vị jeng daok brei kham merat jang, piah daong paglaong akaok sahneng ngak njauk tui adat hukum ka bộ đội saong mikva bhum taphia negar, khik caga quyền ngak po bhum taphia negar di taneh ia./.