Hadei di tuk jeng Tiến sĩ, saai Hoàng Tiên hu daa tame ngak bruk di Viện khoa học song công nghệ Hàn Quốc (KITECH)

Lộ Nữ Hoàng Tiên ndih tapui tabiak dalam boh sang hu 8 adei saai. Yaom lac sang biak kan kandah, min, saai kham merat bac megru, song tuk halei jeng mek hu angan anek saih naih joi dalam luac 12 thun. Saai Lộ Nữ Hoàng Tiên khan veik: “Dahlau deih sang adei kan l, amaik ame hu rilo anek…”

Thun 2010, Hoàng Tiên pakacah tame sang bac Đại học Khoa học Tự nhiên, Đại học Quốc gia ban raya Hồ Chí Minh, gah Hóa Lý. Ni jeng lac, tuk vak kan kandah di abih dalam jalan bo saai hu nao tapa. Saai Hoàng Tiên khan lac, oh thau hadom mbang khin klak bac piah nao ngak, kayua, anit ka amaik ame ndoa naong trak, min meng hatai khin bac tal labik tal dhua, piah dong ka sang tabiak truh kan kathaot , lac pren khang dong ka saai yam tapa kan kandah, oh kadun likuh. Nan ye, saai hu tamat Đại học song điểm biak glong song hu ngak bruk di Pasak roh duah vật liệu cấu trúc nano song phân tử (INOMAR) di Đại học Quốc gia ban raya Hồ Chí Minh. Hadei di nan, saai bac paglong tagok song jeng Thạc sĩ gah Hóa Lý di thun 2016. Ong Lộ Phú Thượng – ame di saai Lộ Nữ Hoàng Tiên, Khu phố Mỹ Nghiệp, ban sit Phước Dân, huyện Ninh Phước, tỉnh Ninh Thuận lac: “Rambah lo, min biak kha, ngak mbang pah yaok janih… “

  Thun 2018, saai Hoàng Tiên taduan hu pok jien bac Nghiên cứu sinh di sang bac Đại học Khoa học song Công nghệ Hàn Quốc, saai tagok jalan nao Hàn Quốc bac megru. Tapa tuk vak kan kandah, glaih glar, tal kreh thun 2021, saai hu jeng Tiến sĩ gah Hóa Lý song điểm xuất sắc, hu vak tame Bảng vàng lưu danh di sang bac Đại học Khoa học song Công nghệ Hàn Quốc. Ong Từ Công Bánh – daok di Khu phố Mỹ Nghiệp, uan tabuan ndom lac: “Hoàng Tiên bhian cong khin ndom song amaik ame lac kham merat bac daa… “

Hadei di tuk jeng Tiến sĩ, saai Hoàng Tiên hu daa tame ngak bruk di Viện khoa học song công nghệ Hàn Quốc (KITECH). Saai khan lac, drei dok veik di Hàn Quốc ngak bruk, piah hu rilo ilamu jang , hadei di nan, duah jalan mai veik taneh ia, tame pato di dom sang bac Đại học dalam taneh ia, piah patoa veik ilamu, pabak pren yam tagok ka dom ayut sinh viên hu hatai takre roh duah ilamu. Adei Ngư Ngọc Lan – tal 12A1, sang bac THPT An Phước, huyện Ninh Phước mboh hadah mbaok meta tuk ndom ka Hoàng Tiên: “Tapa dalikan di saai Hoàng Tiên, adei mboh hadah mbaok meta…”

Yam tapa cuang kandah, glaih glar, Hoàng Tiên hu yau hatai khin di drei, jeng sa urang kamei Tiến sĩ camereip abih dalam bhap bini Chăm di Ninh Thuận, ngak brei hadah mbaok meta ka boh sang song abih but pajaih. Oh ka padeih veik di labik nan, anai kumei ranaih umo Lộ Nữ Hoàng Tiên dok roh duah hadei di Tiến sĩ, piah bac megru song patagok gah roh duah, song hatai cong khin rik dong pren yava di drei ka taneh ia, palei negar./.

Urang lang: Hani Pha – 11/07