Thun bac bahrau 2022-2023 tỉnh Bình Thuận hu jaik 310.000 anek saih di 3 pakat bac

Di labik Sang bac Tiểu học Phan Hoà 2, xã Phan Hoà, huyện Bắc Bình, tỉnh Bình Thuận, labik hu jaik 600 adei anek saih lac urang Cam daok bac. Dalam thun bac 2021-2022 meng bloh, yaom lac jit ruak COVID-19 rah tabiak srau kadau, sang bac daok hu dom kan kandah tavak tavaiy, min meng bruk jum pataom gauk, sa hatung hatian haong gauk saong bruk kham merat di kapul urang jakar, dom gru pato, dom nhân viên haong anek saih di sang bac nan ye sang bac mek hu rilo jak jeng njauk pok meyaom.

Tui nan, sang bac khik hu ginup abih anek saih, lac 556 adei, bac salah danak dak tal bac hu 99,8%, bac salah danak dak pakat tiểu học (tal 5) hu 100% … Gru Lâm Phúc Thịnh, Hiệu trưởng Sang bac Tiểu học Phan Hoà 2 brei thau, sang bac hu caga ginup abih, meng labik bac, pandap pato, abih di nyu lac tapuk giáo khoa ka tal bac 3 duh ka danak dak pato pakai phổ thông bahrau: “Peih ngak tui sarak di Sở, jabat pato magru jeng hu caga jalan ngak cambaih laih…”

Dom thun tapa, tỉnh Bình Thuận tuk halei jeng sangka buh jien tame ka bruk pato pakai di bhum bhap bini bangsa takik. Tal urak ini, dalam tỉnh hu 5 Sang bac Bangsa gam bac gam daok hu padang ngak khang kajap di 17 xã harat urang bangsa takik, khik ka dom adei anek saih di labik ini hu bac saong daok veik mbang huak, ndih daok. Thun bac 2022 -2023, Sang bac Phổ thông Bangsa gam bac gam daok tỉnh Bình Thuận hu 938 anek saih bangsa takik. Anai gru Lưu Thị Mỹ Dung – Phaok Hiệu trưởng Sang bac Phổ thông Bangsa gam bac gam daok tỉnh brei thau, dalam thun bac bahrau ini, rilo labik dalam sang bac hu ngak pasiam, yau ye: mblang bein sang bac, salih bahrau taong abih  papan ndih di dom adei, abih di nyu lac pasiam Nhà đa năng di sang bac. Taphia bruk pasiam sang bac, tal bac, ký túc xá, sang bac jeng biak caik hatai sangka dalam bruk pacang caga jit ruak, abih di nyu lac jit ruak COVID-19 haong ruak đậu mùa khỉ. Anai gru Dung daok brei thau lac: “Caga ka thun bac bahrau dalam tuk jit ruak jeng daok rah tabiak srau kadau, sang bac hu tacei pato dom cei gru, anai gru dahlau di abih brei kakei anek saih caik hatai tal bruk pacang caga jit, brei cuk pataih pacang mbaok gam gam, tuk tame sang bac dom adei oh daok ngak tui  5 paka di Mintri Y tế tra, bo eng drei brei thau pacang ruak, takik taom gaok haong menuac langiu, tuk tame sang bac jeng brei takik tabiak gah langiu, yaok tal bac, yaok bilik bac jeng hu klaok jru  sát khuẩn saong gru pato njauk pruh jru pametai anek ruak dalam bilik bac di drei.”

Tui Sở pato megru tỉnh Bình Thuận, urak ini dom sang bac, tal bac di bhum bhap bini Cam dalam tỉnh Bình Thuận hu padang ngak siam mekre, pabak ginup bruk pato saong bac ka anek bhik urang bangsa takik.

Thun bac 2022 – 2023, gah pato megru Bình Thuận hu ba tabiak dom bruk ngak praong, yau ye: patagok dom jalan ngak khik kajap salamat sang bac, peih bruk pasang iek, taong yaom anek saih tui quy định, patagok chuyển đổi số saong pandar công nghệ thông tin dalam pato saong bac.

Bruk sangka buh jien tame padang ngak di dom pakat karja haong bruk abih drei di dom cei gru, anai gru, anek saih bangsa takik di Bình Thuận daok chreih chrai yam tame thun bac bahrau haong dom kadha hu ba tabiak, rik daong paglaong chất lượng pato pakai di tỉnh./.      

Urang lang: M. Phuong – 05/09