Di sang bac THPT Trần Đại Nghĩa, quận Cái Răng dom harei akaok bilan 11 hu chreih chrai jang meng bruk 120 anek saih, lambaok ka 500 anek saih dom tal bac 10 hu mbaok tame mbang brei thau ka prein yava urang menek daok ranaih saong kuhria caga njaom mbak HIV, viêm gan B saong giang mai meng amaik tapa anek.

BS.CKI Trần Thị Thu Hồng saong BS Nguyễn Thúy Hằng - CDC Cần Thơ hu khan brei thau dom salih karei rup pabhap di likei saong kumei, salih karei gah hatung hatian, pacang plaih rapeik rapai, brei thau ka tình dục salamat, dom kan kandah di bruk metian anek langiu hatai caong, duah thau ka ruak HIV, ruak viêm gan B, giang mai jeng yau jalan pacang ruak, jalan caga njom mbak meng amaik tapa anek… brei ka dom anek saih thau. Adei Trần Thanh Hữu, anek saih tal bac 10 A1, sang bac THPT Trần Đại Nghĩa brei thau: “Lac anek saih, lac likei kumei jeng brei thau dom jalan pacang caga, gam haong nan, khan brei thau dom jalan ngak nan tal yaok urang piah ba gauk pacang caga. Tapa nan, jit ruak hu samar lahik abih.”

Meng bilan 10 tal ini, CDC Cần Thơ pambuak bruk haong 16 sang bac THPT pathau khan tapak brei anek saih thau ka prein yava urang metian saong caga njaom mbak HIV, viêm gan B saong giang mai meng amaik tapa anek di sang bac. Langiu di nan, meng akaok thun bac tal ini, dom sang bac Đại học, Cao đẳng dalam ban jeng hu peih rilo mbang pakacah brei thau ka HIV meng rilo jalan ngak chreih chrai. Lac urang hu mbaok tame pakacah pathau khan, ayut Phan Thông Huy Bảo, sinh viên thun camereip Sang bac Đại học Kỹ thuật - Công nghệ ban Cần Thơ khan lac: “Adei hu mbaok tame bruk pakacah ngan saong kadha brei thau ka ARV – nan lac jru pacang bruk cakrok  virus dalam rup, jeng yau daong khik ramik virus dalam darah di tanut biar di abih.”

Dom thun jaik ini, dom menuac njaom HIV/AIDS bahrau dalam rahra dak harei dak ranaih. Nan ye, bruk pabak ilamu ka dam dara, urang daok ranaih, abih di nyu lac anek saih, sinh viên lac dom menuac hu labik dang biak praong dalam dom kham merat pacang caga njaom mbak HIV/AIDS dalam bhap bini.

Thạc sĩ Dáp Thanh Giang, akaok Khoa Pacang caga HIV/AIDS - CDC Cần Thơ ndom lac, dom bruk pathau khan dalam thun 2023 hu daong ka dom sinh viên, anek saih hu thau njauk, thau cambaih ka HIV. Gam haong nan, yaih khan, pabak brei dom bruk pambuak tal danak dak pacang caga HIV/AIDS, abih di nyu lac dalam nyaom urang likei tình dục đồng giới (MSM) – lac nyaom urang daok tagok samar ka dom menuac njaom ruak: “Anak tal, danak dak jeng biak caik hatai ba tangin tame pacang MSM. Piah ngak hu, brei hu bruk sangka praong meng dom gah pambuak tal, lac: Sở pato megru, Sở Lao động, thương binh saong xã hội; dom sang bac Đại học – Cao đẳng, sang bac THPT; dom kapul nyaom bhap bini, ieu lac nyaom CBO piah ba gauk pambuak bruk haong danak dak.”

Pamaong tal bruk palahik abih jit ruak AIDS di thun 2030, CDC Cần Thơ daok brei ngak dom bruk tacei pato saong dut iek HIV. Abih di nyu lac, dom quận, huyện meda pandar công nghệ thông tin dalam bruk pacang caga HIV/AIDS, dalam nan hu bruk pataom veik, pablak tame dom phần mềm, dom khau tin pambuak tal khik ramik HIV/AIDS; đồng bộ dữ liệu ka taong ruak HIV/AIDS haong hệ thống khik ramik khau tin sang iek ruak; padang dữ liệu HIV/AIDS pataom veik, pandar công nghệ thông tin dalam bruk khan brei thau aval, pasang iek saong pabak bruk y tế dalam pacang caga HIV/AIDS./.