Nguyễn Việt Anh, anek saih tal bac 12, sang bac THPT Võ Thị Sáu, quận Bình Thạnh, TP.HCM tut angan pakacah tame dom khối ngành kỹ thuật di Đại học Bách Khoa (Đại học Quốc gia TP.HCM) haong Đại học Sư phạm Kỹ thuật. Việt Anh kuhria tame 3 mbang pakacah, lac mbang pakacah bắt buộc tamat THPT, mbang pakacah chứng chỉ sap Anh haong mbang pakacah taong yaom prein bac di Đại học Quốc gia TP.HCM. Việt Anh ndom lac, dom mbang pakacah ini mboh hu rilo saong jaik abih dom sang bac pandar ngak, nan ye oh huac rilo: “Urak ini adei daok pataom taong abih prein ka bruk bac veik piah pakacah IELTS, piah hu lagaih jang ka bruk pilih ruah tapak meng học bạ. Daok pakacah taong yaom prein bac ye adei oh nao bac  thêm di gah langiu, prein bac di drei tal halei ye pakacah tal nan.”

TS Nguyễn Quốc Chính, Yam ndok Khảo thí saong taong yaom prein pato pakai Đại học Quốc gia TP.HCM ndom lac, tuk caong tame mbang pakacah halei piah tame đại học, anek saih njauk duah thau asal kadha di bài pakacah saong adat tame pakacah piah caga ka nyu lagaih. Abih di nyu lac, yaok bài pakacah pamaong tame bruk hagait, tukvak ngak bài lac hadom, jalan ngak yau habar, pandar jamriak hagait tuk nao pakacah…

Pagap yau, anek saih tame pakacah taong yaom prein bac di Đại học Quốc gia TP.HCM ye brei thau lac pakacah ini piah taong yaom prein bac, oh pandar anek saih bac kanal bo meda hu pabak brei dữ liệu piah ngak bài.

TS Nguyễn Quốc Chính jeng hu kakei anek saih lac, njauk pilih ruah dom mbang pakacah karei bo rilo sang bac tut angan pandar bruk pakacah nan piah pilih ruah tame bac, trun meneing trak damak saong tukvak pakacah: “Njauk duah thau gah halei pandar bruk pakacah nan piah pilih ruah. Sa anek saih njauk pataom tame  sa, dua mbang pakacah lac rilo ye, jhui pataom tame pakacah rilo mbang kayua nyu oh pabak hu bruk drei pilih ruah.”

Tui dom chuyên gia tư vấn, urak ini yaom lac hu rilo jalan pilih ruah tame đại học, rilo mbang pakacah karei, min anek saih njauk thau cambaih drei tame sang bac halei, gah halei, jalan pilih ruah halei piah pilih tame pakacah ka nyu lagaih. Bruk pakacah rilo mbang lac oh kein hagait jang saong anek saih njauk caik tukvak bac piah pakacah tamat THPT.

PGS.TS Huỳnh Thanh Hùng, quyền Hiệu trưởng sang bac Đại học Nông lâm TP.HCM brei thau, bruk hu dom mbang pakacah karei lac jalan piah ka dom sang bac pilih ruah hu menuac bac ka nyu lagaih, meng nan, dom sang bac palagaih ka anek saih hu rilo jalan piah tame đại học, cao đẳng. Yaom lac yau nan, anek saih jeng jhui lahik rilo tukvak tame dom jalan pakacah oh lagaih, bo brei thau taong yaom prein bac di drei:“Dom anek saih jhui pakacah rilo. Kayua tuk nao pakacah, drei brei bac veik, ba tal var klaak bruk bac di drei. Dom adei njauk sahneng kuhria pilih ruah jalan ka nyu lagaih piah pakacah hu siam.”

Bruk hu rilo mbang pakacah karei meda daong peih rilo jalan ka anek saih tame đại học. Min dom sang bac njauk pambuak gauk pagalong chất lượng di dom mbang pakacah piah ba gauk pandar bruk pakacah, plaih ngak ka anek saih duh hatai yau urak ini./.