Thau cambaih bruk padang ngak palei pala bahrau lac paglaong raidiuk di bhap bini, trun bruk glaong - biar di palei palei pala saong thành thị, rilo tinh ban kham merat ngak siam dom bruk patrun kathaot khang kajap pambuak haong danak dak bruk ngak negar ka padang ngak palei pala bahrau. Ong Lê Em - Phó akaok UBND xã Tân Hòa, huyện Tân Thạnh, tỉnh Long An brei thau: “mayah bhap bini oh hu bruk ngak tani tanat ye mbuan laik tame dom tệ nạn xã hội,... Kayua yau nan ye, xã sangka daong palagaih ka dom urang oh hu bruk ngak tame dom tal pato bruk ngak ka urang ngak di puk palei, hadei di nan yaih khan bruk ngak atau daong phun jien piah cak rok patagok bruk ngak mbang, pablei salih. Yaok thun, xã hu pambuak haong dom gah peih 1 tal pato bruk ngak ka urang ngak di puk palei”.

Sang hu 4 anek, diuk pasang saai Trương Mạnh Truyền (daok di palei Tây Bắc, xã Tân Hòa) gaok rilo kan kandah. Piah daong ka sa-ai, xã hu brei diuk pasang saai tame tal pato jhik manyim công nghiệp saong yaih khan bruk ngak di Hợp tác xã (HTX) May gia công Tường Xuyên ngan haong jien mek tame di 2 diuk pasang lac labaih 12 trieu dong sa bilan. Saai Mạnh Truyền khan lac: “dahlau deih, sang lac sang jaik kathaot, oh hu taneh pala drak, jien mek tame meng bruk nao ngak pah, nan ye bhian kurang anak kurang likuk. Urak ini, diuk pasang dahlak hu tabiak truh kathaot, hu jien mek tame tani tanat meng bruk jhik gia công saong hu jien piah pah taneh ngak padai”.

Piah mek hu chuan xã palei pala bahrau, dom puk palei brei ngak salah taong abih 19 asal kadha, dalam nan hu kadha ka sang kan kathaot. Bruk ini caik ka dom puk palei brei kham marat piah trun kan kathaot khang kajap pambuak haong padang ngak palei pala bahrau. Akaok jabat Lao động - Thương binh saong Xã hội huyện Bến Lức - Nguyễn Thanh Xuân brei thau: “Thau lac pato bruk ngak ka urang ngak di palei lac jalan piah trun kathaot khang kajap, huyện bhian pasang iek hatai caong bac bruk ngak di dom labik, tui jalan pato pakai pambuak haong labik daok caong hu menuac ngak, oh pato tui jalan drei hu blaoh. Kayua yau nan ye, dom gah pato bruk ngak patagok hu siam lagaih, ba bruk ngak, tagok jien mek tame, pasiam raidiuk di rahra daok di palei pala, yau ye bruk pasiam veik jamriak ngak nong, thú y, khik caga phun pala, ilamo pala phun lahaong… Meng akaok thun tal ini, huyện peih hu 3 tal pato bruk ngak ka urang ngak di puk palei, ngan haong labaih 80 urang hu mbaok tame.”.

Tukvak tapa, huyện Tân Thạch hu jao tanut trun kathaot cambaih laih ka yaok gah, yaok labik min ieu kakei dom labik oh nduac tui thành tích kayua lac ngak yau nan meda gaok tal kein laba, raidiuk di dom urang dalam sang kathaot, sang jaik kathaot. Tal urak ini, dalam huyện hu 11/12 xã mek hu tanut chuan palei pala bahrau, dalam nan hu 3 xã mek hu tanut chuan palei pala bahrau paglaong. Thun 2023, huyện kham marat padang ngak xã Nhơn Hòa mek hu tanut chuan palei pala bahrau saong xã Kiến Bình mek hu tanut chuan palei pala bahrau paglaong.

Hadei di tuk hu xã jak ba padang ngak sang anit ranam saong yaih khan bruk ngak, saai Siêu A Quang (daok di xã Kiến Bình, huyện Tân Thạnh) halain hatain vak harak likau tabiak truh sang kan kathaot piah caik veik bruk daong brei ka dom sang kan kandah jang. Saai Quang khan lac “tuk tabiak daok karei, diuk pasang dahlak tok hu dua plak tangin saoh, jien mek tame meng ngak pah. Meng hu xã daong brei masaiy laba lap piah cak rok patagok bruk ngak mbang, yaih khan bruk ngak saong daong ngak sang, urak ini, raidiuk hu tani tanat, khol dahlak likau tabiak truh sang kan kathaot”.

Meng bruk jum pataom gauk, kham merat di Đảng bộ, karja saong bhap bini dalam tỉnh, urak ini, sang kan kathaot dalam tỉnh trun daok 1,3%, rik daong padang ngak jak jeng taong abih 161 xã mek hu tanut chuan palei pala bahrau, dalam nan hu 28 xã mek hu tanut chuan palei pala bahrau paglaong. Bruk ini dak brei mboh lac bruk pato bruk ngak, ba brei bruk ngak, patrun kathaot hu rik daong praong dalam bruk padang ngak palei pala bahrau di dom tinh, ban./.

Urang lang: Thu Thảo