Ong Đỗ Tiến Sỹ - Ủy viên Trung ương Đảng, Tổng Giám đốc rayo sap ndem Việt Nam

1/ Likau salam Tổng Giám đốc Đỗ Tiến Sỹ! Ndua dhal phon ong hu mbaok piah javap jaleiy panuac sua tangi di Rayo sap ndom VN harei ini.

Angan ieu di Harei pataom papar sap pakat negar thun ini, lac “Sami samar salih bahrau – lagaih piah yam tagok”. Pathau Tổng Giám đốc, angan ini hu makna yau habar ngan haong bruk cakrok patagok di taneh aia saong di gah papar sap?

Angan ieu di harei pataom thun ini lac “Sami samar salih bahrau – lagaih piah yam tagok” meda lac nyu hu rilo makna. Ka sa lac meng bruk cakrok khang di khoa học công nghệ, papar sap hu bruk salih bahrau samar drah jalan ngak tabiak danak dak, jalan truyền dẫn tui jalan chuyển đổi số; salih jalan ngak, jalan taom gaok urang pang, patagok bruk ndom biai nao mai hong urang pang rayo piah jeng ayut sahabat, jaik taphia jang haong urang pang rayo di rilo gah, rilo labik.

Ka dua, meng bruk cakrok patagok khang di mạng xã hội yau urak ini, dom urang ngak papar sap brei ba drei tame palagaih piah yam tagok, brei mboh labik dang di papar sap dalam rai diuk. Kayua yau nan ye, chất lượng dom kadha hu mbaok tame pakacah thun ini hu buh tame rilo pren yava, akaok sahneng, ilamu ngan haong rilo kadha hu asal siam gheih, sahneng duah barau, brei thau dom bruk dalam rai diuk, brei mboh cambaih di abih yau bruk mesruh  cang Covid-19. Dom kadha báo chí hu mbaok tame pakacah mbang ini brei mboh rilo bruk, rilo gah dalam rai diuk, tapa papar sap hu ba chreih chrai ka urang pang rayo tuk pang dom kadha ndom ka manuac gheih bruk siam, kreh camin van klaak rup drei dalam jit prong Covid-19, gam haong nan brei thau dom jalan ngak siam, hadah krah, bruk njauk hatai pachreih tui di taong abih bhap bani dalam negar saong hatung hatai, bruk anit ranam di ayut sahabat dunya ngan haong taneh aia Việt Nam di khaol drei.

2/ Pathau Tổng Giám đốc, yaok mbang pataom papar sap jeng hu biak rilo bruk ngak hu makna ngan haong dom urang ngak báo ndom. Harei pataom papar sap pakat negar mbang ka XV – thun 2022 ini hu dom kadha hagait njauk caik hatai sangka, pathau ong?   

Harei pataom papar sap mbang ka XV – 2022 thun ini rah tabiak di ban raya Hồ Chí Minh nan lac sa Harei pataom papar sap biak karei tuk negar bahrau yam tapa dom harei bilan mesruh haong jit prong Covid 19. Dalam nan, TPHCM lac sa dalam dom labik hadah brei mboh jalan ba di Đảng, hatai jia di bhap bani saong dom gah pacang caga jit. Bruk kuhria caga ka Harei pataom papar sap mbang ini hu urang pal akaok Rayo kuhria caga biak tani tanat, haong bruk daong di TPHCM. Kayua yau nan ye, Harei pataom papar sap di ban raya mbang ini brei mboh pren khang di khaol drei dalam jayak jit praong tapa dom kadha báo chí di Rayo sap ndom VN tukvak tapa dalam nan hu papar sap. Ini jeng lac tuk piah ka dom urang ngak báo papar sap taom gaok gauk, klah rabha ilamu dalam bruk pathau khan, ngak bruk dalam tukvak rah rah tabiak jit ruak.

Meng 500 kadha hu mbaok tame pakacah nan lac biak prong, lac rilo di abih duk haong dom mbang pataom dahlau diah. Thun ini, dom kadha hu nao dalam brei thau bruk peih ngak sarak di Nyaom roya Đảng pakat negar mbang ka XIII, dom jak jeng gah KTXH di taneh aia, rilo kareh camin, manuac urang bahrau saong dom kadha bak bruk phản biện dalam rai diuk rah ra, jeng yau dom kadha mesruh veik, phê bình dom bruk oh ka niauk, dom bruk ngak suan... jeng hu dom jabat di Rayo saong dom rayo di 63 tỉnh, ban ba dom kadha mai pakacah thun ini. Min meda lac, yam tapa taong abih nan, jeng lac dom kadha brei mboh bruk mesruh pacang veik jit prong Covid-19 meng trung ương tal dom tỉnh ban, dom puk palei brei mboh biak cambaih. Abih di nyu lac, dalam dom bilan jaik di ini, nan lac bruk palagaih tui, salih bahrau, sami samar piah yam tagok jeng hu brei thau dalam rai diuk di rah ra khaol drei.

3/ Kuhria meng harei pataom papar sap pakat negar mbang akaok meti hu peih ngak di Hà Nội thun 1994 tal ini hu tapa blaoh 28 thun. Tukvak atah ini hu brei mboh pren khang saong bruk pambak prong di “harei pataom” bruk ngak prong di dom urang ngak papar sap yau habar, pathau Tổng Giám đốc?

Kuhria meng mbang akaok meti hu peih ngak di thun 1994 tal ini, Harei pataom papar sap pakat negar hu tapa blaoh jaik 30 thun ngan haong 14 mbang pataom, brei mboh bruk prong tagok di manuac urang saong bruk ngak di dom urang ngak papar sap dalam negar jeng hu patagok. Saong tui hatai sahneng mboh di kaol dahlak, Harei pataom papar sap hu biak biai jeng harei pataom di dom urang ngak báo ndom dalam negar. Tapa yaok mbang peih ngak, hu dom salih bahrau dalam bruk ngak, jalan peih ngak saong khaol drei uan tabuan lac dom kadha tapa yaok mbang hu tagok glaong, daong pabak hatai caong khin di dom urang ngak báo ndom meng trung ương tal puk palei saong jeng lac hatai caong khin di urang pang rayo. Dom klup kapul urang pang rayo dalam saong langiu negar tapa riyak papar sap di Rayo sap ndom VN jeng hu pathau khan gilac nan ye khaol dahlak mboh hu kadha ini.

  4/ Báo chí truyền thông jeng yau papar sap urak ini daok dang anak rilo cuang kandah, abih di nyu lac bruk meriak gauk haong mạng xã hội. Pathau ong, njauk lac bruk khoal drei yam tapa dom cuang kandah ini jeng lac jalan peih tabiak prong ngan haong dom urang ngak báo ndom piah brei mboh bruk ngak, labik dang di dom urang ngak papar sap dalam jaman ini?

Yau dom ayut jeng thau, urang pang rayo di khaol drei urak ini salih bhian randap pang rayo, urang oh daok la kandang anak radio piah pang danak dak papar sap yaok tuk gam, urak ini, urang caong khin pang papar sap di tuk halei jeng hu, labik halei jeng hu, tapa baoh phon tangin di drei. Saong jeng lac meng baoh phon tangin, mạng xã hội, urang pang rayo hu thau rilo thong tin meng mạng xã hội saong dom janih báo chí karei. Nan meda hu maong lac jalan piah ka papar sap cak rok patagok, min jeng lac cuang kandah biak prong piah ka papar sap njauk salih bahrau piah lagiah haong urang pang rayo.  

Min meng labik lac samar drah, oh njauk nhiễu riyak, oh hu fakenews, papar sap jeng lac labik njauk jia tame piah ka urang duah thau dom bruk njauk, bruk biak. Papar sap jeng lac jalan pang rilo di bhap bani, abih di nyu lac dom urang peih radaih, bhap bani daok di dom bhum palei, bhum ceik, pulao kaoh. Rayo sap ndom VN papar sap angaok mbaok taneh di taong abih 3 băng tần SW, MW saong FM, pabak langik riyak jaik 97% rahra saong labaih 91% mbaok haluk saong dom labik angaok pulao kaoh Việt Nam, pabak riyak dom labik trọng yếu angaok dunya yau Châu Á, Châu Phi, Trung Đông, sang sa bianh Châu Âu, Trung Mỹ saong vùng vịnh Caribe.  Tapa nan, thong tin di Rayo sap ndom Việt Nam hu nao tal dom bhum atah bayah, bhum pulao kaoh jeng yau ayut sahabat angaok dunya saong urang VN drei daok di negar langiu. Kayua yau nan ye, dom urang ngak báo papar sap oh padeih salih bahrau jalan saneng, jalan ngak, hu ngak brei cambaih laih tapa asal kadha, jalan ngak piah laghaih haong bhap bini urak ini, kayua lac công nghệ tok lac jalan piah daong, asal kadha gheih, hu chất lượng glaong saong pabak njauk asal kadha bo manuac urang daok sangka meng lac kadha praong piah papar sap khik takai hu dom urang pang rayo anit ranam di drei.

                 Biak thau dhal phol Tổng Giám đốc Đỗ Tiến Sỹ!