Jaik mon 6 mesup, yaok ratuh menuac daok la jeng talei atah di jabat BHXH ban Thủ Đức, TP.HCM cang mek laik tame ngak harak suak mek  jien BHXH 1 mbang. Rilo menuac mai mbang ka 3, ka 4 kayua dom mbang dahlau mai hadei urang nan ye oh daok laik, atau hu labik labaih kurang oh njauk dalam sổ BHXH. Dom urang ngak brei thau, dom menuac mai ngak harak mek sổ bảo hiểm takik jang biak rilo duk haong dom harei akaok bilan.

Amuk Nguyễn Thị Minh Hòa – Yam ndok BHXH ban Thủ Đức khan lac, menuac ngak dalam jabat di drei biak glaih galr haong dom harak gar biak rilo saong bhian ngak langiu mon ngak bruk. BHXH ban Thủ Đức hu ramik caik 2 bàn tacei pato ka dom menuac mai ngak harak likau suak mek BHXH sa mbang, langyah brei thau ka dom kein laba tuk khik veik BHXH saong dom khat lahik tuk taduan mek jien daong sa mbang:  “Bruk urang mai mek sổ BHXH 1 mbang rilo yau urak ini ye kol dahlak biak suh sah. Thau lac tuk urang ngak mai mek BHXH 1 mbang lac kayua urang biak kan kandah. Kol dahlak biak caong urang ngak hu dom rami ramik piah kham merat yam tapa tukvak kan kandah ini saong khik veik BHXH piah hu mbang jien hưu trí tuk taha”.

Bruk tapa prein di jabat BHXH brei mboh bruk kan kandah di urang ngak, saong jeng ngak ka oh takik doanh nghiệp suh sah kayua dom urang ngak lavik thun, hu tangin gheih ngak, likau padeih bruk piah mbang jien daong sa mbang daok tagok rilo. Kuhria meng akaok thun tal harei 30/11, TP.HCM hu 99.615 urang ngak harak likau mbang BHXH sa mbang, rilo jang 460 urang duk haong tukvak ini thun blaoh, biar jang thun 2020 jaik 14.000 urang.

Tui ong Trần Dũng Hà, Phaok Yam ndok BHXH TP.HCM, dom menuac suak mek BHXH sa mbang thun ini hu tagok min oh hadom, tok tagok rilo di sa tukvak halei nan. Yau di puac bilan 11, akaok bilan 12 meng bloh tuk dom doanh nghiệp biak gaok kan kandah, brei urang ngak padeih meneing saong takik pilih ruah menuac bahrau. Urang ngak oh duah hu bruk ngak, bo lac tukvak jaik Tết, urang oh daok duah hu jien nan ye pilih ruah suak mek BHXH sa mbang. Tuk ini, oh hu jien halei karei lingiu di jien bảo hiểm bo urang hu. 

Urak ini, ban raya hu 46 labik taduan mek harak hồ sơ di bưu cục saong 22 labik taduan mek di BHXH dom quận huyện piah ka urang ngak thau saong pilih ruah labik lagaih, oh cang nao tal jabat bảo hiểm labik drei daok. Ong Trần Dũng Hà khan lac, rilo menuac suak mek BH sa mbang meda ba tal rilo bruk oh siam, camereip abih lac urang suak mek oh daok hu mbang jien bilan padeih hưu tuk abih umo ngak bruk, patui di nan lac bruk rilo menuac suak mek meda ngak kan kandah tal sarak di Karja ka bruk khik kajap an sinh ka rahra: “Hu dom kuhria iek bruk pilih ruah BHXH 1 mbang haong pilih ruah lương hưu, meyah pilih ruah lương hưu ye dalam 5 thun meda taduan hu pok jien samu haong pok jien taduan mek BHXH 1 mbang. Pilih ruah BHXH 1 mbang, urang ngak oh hu Bảo hiểm Y tế, daok meyah khin hu BHYT ye eng drei buh jien kadung tabiak blei, bo quyền lợi ye oh glaong samu”.

Makna puac abih di bruk blei BHXH lac tuk taha, urang ngak hu jien lương hưu, hu jien mek tame. Yau nan, tuk urang ngak daok ranaih, pilih ruah jien daong 1 mbang lac daok pandar pok jien patak pataom ka harei hadei dalam tukvak urak ini. Yaom lac gaok kan kandah, min meyah urang ngak kham merat jang hasit ye tuk taha, meda hu jien mek tame, oh pagam pambak tame anek bhik, oh diuk meng bruk daong di xã hội, di karja./.