Tuk Tết Nguyên đán meng bloh, Bà Rịa Vũng Tàu hu biak rilo tuai mai ravang me-in, padeih padei

Tui yaok pataom, meng harei 1/2 tal harei 6/2 (lac meng harei 1 bingun tal harei 6 bingun Tết), Bà Rịa Vũng Tàu hu labaih 420.000 tuai mai tal, jien mek tame hu 358 tỷ đồng, rilo jang 81% duk haong tukvak ini thun bloh, dang ka 2 dalam taneh ia, hadei di Tây Ninh ka tuai damuai saong jien mek tame. Labik dui pachreih tuai mai tal Bà Rịa Vũng Tàu jeng lac langik lahei bingi, tasik mekre. Sa urang tuai mai meng Tây Ninh brei thau: “Lavik paje dahlak oh mai ravang me-in Bà Rịa – Vũng Tàu, dahlak mboh tasik di labik ini biak hacih sa-at, hacih jang biak rilo duk haong dom thun dahlau”

Meda mboh lac, dalam tuk pasiam veik kinh tế hadei di jit praong, ini lac kadha bui sambai ka gah du lịch di ban tasik. Amuk Trần Thị Thu Hiền, Phaok Yam ndok Sở Du lịch tỉnh Bà Rịa – Vũng Tàu brei thau, jit ruak daok hu pasang iek, min jhui var sangka, nan ye bruk pablei pandap online, sàn pablei salih điện tử du lịch meda tagok hu siam lagaih. Piah taduan raok tuai chip hadei di Tết saong dalam bilan 1, dom doanh nghiệp du lịch daok hu dom jalan ngak piah dui pachreih tuai damuai: “Langiu di bruk ba tabiak dom pok dui pachreih, Sở du lịch jak ba dom doanh nghiệp ramik pasiam veik labik, paglaong dom bruk ngak di drei piah duh ka tuai hu siam di abih. Caong lac tuai mai tal Bà Rịa – Vũng Tàu hu rilo, bo rilo meng tapa jalan pablei salih điện tử, ini lac bruk gah du lịch daok caong. Urak ini hu dom harak pambuak bruk saong dahlak caong lac hu jak jeng”.

Tui ong Phạm Ngọc Hải, Chủ tịch Hiệp hội Du lịch Bà Rịa – Vũng Tàu, dalam 7 bilan kreik pabah mbang piah pacang caga jit, dom doanh nghiệp du lịch hu tukvak pasang iek veik lac drei daok daok di labik halei, daok hu hagait saong caong hu hagait piah peih pabah mbang taduan raok tuai damuai? Hatai sahneng ka du lịch di rahra hu salih karei hadei di jit praong saong doanh nghiệp jeng yau nan. Urang salih jalan taduan raok tuai meng bruk ramik ngak pasiam labik, paglaong bruk duh, pamere: “Bà Rịa-Vũng Tàu daok dalam tuk biak mbuan lagaih piah taduan raok tuai. Bhum Đông Nam Bộ haong Tây Nam Bộ jalan mbak nao mai urak ini biak siam, nan ye labaih 30 triệu menuac di bhum ini tantu labik nao tal meda lac Bà Rịa – Vũng Tàu. Kayua hatai sahneng di thun 2022 lac jalan nao du lịch nyu karei jang dahlau daih, brei patrun patakik dom tour saong pataom tame dom kapul tuai sit, baoh sang saong tuai mai pataom mbaok dalam nyaom biai. Tuk dom kapul tuai ini pandar radaih di drei ye labik nao tal lac du lịch tasik, padeih padei, nan lac du lịch di Bà Rịa – Vũng Tàu”.

Gah du lịch Bà Rịa-Vũng Tàu caong lac, tuk jit ruak hu pasang iek, gam haong langik tasik siam lagaih hadei di mbang padeih Tết Nguyên Đán, ye ban tasik daok lac labik nao tal biak siam di tuai du lịch./.

Urang lang: Mousa Phương – 19/02