Tal urak ini, tỉnh Bà Rịa - Vũng Tàu hu 36/47 xã hu pandap OCOP, 89 pandap hu pok brei angan pandap OCOP meng 3 patuk tagok, dalam nan 62 pandap 4 patuk, 5 pandap hu prein tagok 5 patuk.  

Ong Trần Tài, Yam ndok Công ty TNHH Bimau đông trùng hạ thảo Việt Nam brei thau, Công ty taong yaom huyện Châu Đức lac labik lagaih ka doanh nghiep peih praong bruk ngak mbang, cak rok patagok dalam, hu bhum pandap tamo biak rilo.

Piah hu pandap mek hu tanut OCOP ye taong abih dom jalan ngak meng công nghệ, pandap tamo piah ngak, raong cấy phôi tal ngak tabiak saong sản xuất hu pasang iek biak catang. Tal urak ini, doanh nghiệp hu 3 pandap OCOP mek hu tanut chuan 4 patuk, 70% pandap pablei di dom kênh parabha. Ong Trần Tài ndem lac: “Tuk mek hu OCOP ye kanja bhum palei hu daong yaih khan, tuai damuai hu hatia jia tame, pandar pandap rilo jang, dom tuai tagok rilo jang. Darak pasa pablei lẻ labaih 30%, 70% daok veik pablei tui kênh parabha, bruk ini ngak pachreih bruk cak rok patagok di doanh nghiệp hu khang jang”.

Ong Nguyễn Tấn Bản, Akaok UBND huyện Châu Đức brei thau, piah patagok kein lagaih, prein khang di bhum palei, thun ini huyện meda cak rok veik 12 pandap mek hu tanut chuan OCOP, dalam nan hu 8 pandap mek hu 4 patuk. Tukvak anak tal, huyện daok brei daong ka urang nong, hợp tác xã, doanh nghiệp padang angan je, padang tabiak jalan sahaneng,… ngak tabiak pandap panda hu chất lượng, angan je di darak pasa: “Tukvak anak tal, huyện hu dom sarak piah pambuak haong dom doanh nghiệp, abih di nyu nan lac dom tour, gah rivang main piah yaih khan pandap di dom kênh piah ngak habar ka pandap OCOP di huyện Châu Đức brei mboh bruk pambuak gauk, patagok yaom glaong di urang nong, bluh tame dom pandap panda hu chất lượng yam tabiak darak pasa dalam saong langiu taneh ia”.

Pandap panda hu mbaok tame danak dak OCOP di tỉnh Bà Rịa - Vũng Tàu hu tagok gah chất lượng, hu rilo mẫu mã, kadung papaok, khik kajap gah tem, nhãn mác, asal kadha di nyu. Doanh nghiệp, hợp tác xã saong labik ngak tabiak, pablei salih mboh hu dom kein laba di danak dak OCOP nan ye kham merat, halan hatian hu mbaok tame. Meng nan, dom pandap panda hu mbaok tame danak dak OCOP hu biak rilo janih saongdaok tagok jang. Ong Trần Thanh Huyền, Akaok Jabat Ngak nong saong patagok palei pala huyện Đất Đỏ ndem lac: “Thun 2023, huyện Đất Đỏ daok pato tacei, daong ka mikva padang ngak harak gar, pasang iek bruk pok brei angan veik ka 5 pandap OCOP, ini lac dom pandap angan je di huyện. Pak ini meda patui veik daong ka mikva yaih khan tagok dom sàn pablei salih online, yaih khan di dom Nyaom darak pasak, abih di nyu nan lac yaih khan dom pandap OCOP tal tuai rivang ma-in”.

Jalan daok pamaong tal di tỉnh Bà Rịa - Vũng Tàu tal thun 2025, cak rok patagok takik di nyu meng 20 tal 24 labik yaih khan saong pablei pandap OCOP. Thun 2023, tỉnh pataom tame cak rok patagok labik yaih khan saong pablei salih pandap OCOP di ban Vũng Tàu saong ban Bà Rịa. Meng thun 2024 tagok nao meda cak rok patagok takik di nyu 1 labik di yaok palei. Yaok thun, tỉnh peih takik di nyu 2 danak dak yaih khan pandap pambuak haong dom bruk pataom ma-in, dom harei pataom, danak dak du lịch di tỉnh, piah jhul khang bruk duah jalan pablei dom pandap OCOP mek hu tanut chuan meng 3 patuk tagok, pandap dalam angan pasak di tỉnh, pandap ngak kong palei pala hu angan je./.