Ong Mai Xuân Du, HTX raong glang Hoà Hiệp, huyện Xuyên Mộc brei thau, bruk padang angan hu mikwa di dalam HTX ieik praong. Urang kapul HTX mboh lac, raong glang sit tukik mada kan si pambuak haong darak pasar praong, pambuak haong urang blei salih praong yau nan ye urang ngak nong njauk pambuak haong gauk pataom jeng tasi mong meng anek raong, ndap brei ka nyu mbang, bruk ieik glang, jru cawao ieik ruak…: "Piah padang angan brei ka ndap nda raong glang ye urang ngak nong njauk padang jeng mong tasi pambuak haong gauk dalam danak dak raong glang, rami ramik ndap mbang raong glang tani tanat, jru cawao, karo tui jalan ilamu… piah brei patabiak siam abih di nyu ndap nda ka darak pasar".

Tui ralo baoh sang urang ngak haong HTX raong glang, piah ndap nda raong glang pablei tabiak brei ka darak pasar taduan mek, nao tal bruk tut tangan pambuak bruk, urang raong glang njauk ngak siam danak dak meng pilih pajaih, ieik glang patame ro wan tani tanat, klauk jru vắc xin caga ruak kik sap janih.

 Langiu di nan, dom labih raong glang siam yau ye huyện: Châu Đức, Xuyên Mộc… daok pato ba rahra khik caga alam môi trường meng bruk ngak tui ilamu ngak kong glaong ba tame ngak mbang.

Ông Đỗ Chí Khởi, Akaok bilik ngak Nong haong patagok palei pala huyện Châu Đức brei thau, lac sa labik ngak siam dalam tỉnh, urak ini urang raong glang khang hatai oh huac buh jien tame padang ro wan win se (sư) (wan laan); raong pabui pandar ia tukik; pandar biogas, ngak khak vi sinh haong pandar vi sinh dalam pilih ruah haong patathuak ia: "Urak ini di palei jeng brei dakwah khan thau, pato ba urang ngak nong raong glang njauk tui adat hukum nagar. Langiu di nan, ieu lac brei pakhang bruk caga alam môi trường dalam bruk raong glang pacang caga susah ka urang vin taom dal. Gam tui di nan pandar ilamu barau, ilamu ngak kong glaong tame raong glang piah pakurang njom nerak tuh tabiak langiu".

Abih tinh Bà Rịa – Vũng Tàu hu 400.000 anek pabui, 6,7 triệu anek athur raong, gah raong glang thun 2023 pasamar labaih 47%, tagok glaong tuk danak dak 4,2%. Mada hu tagok min tapi gah raong glang daok sit sot, kurang khang dalam bruk mariak gauk ngak mbang. Langiu di nan, kayua oh khik hu karo ndap mbang ka anek raong jeng ye darak pasar pablei tabiak, dom baoh sang raong glang sit sot ini oh mariak hu haong dom urang ngak mbang hu phun jien praong.

Di jaman ngak mbang ini, bruk patagok angan ndap nda raong glang ieu lac sa janih njauk caik hatai, njauk ieu urang ngak nong njauk ngak tabiak ndap nda siam, njauk hatai brei ka darak pasar. Tui ông Trần Quốc Vỹ, Pasak Pachreih ngak nong, Sở ngak Nong haong patagok bhum palei tỉnh Bà Rịa – Vũng Tàu, padang angan ndap nda jeng ieu lac sa janih khik siam danak dak ngak mbang karo, lagaih tui jalan jaman ini di: " Angan ndap nda ieu lac janih siam praong, kayua urang ngak nong pagam angan ka ndap nda ye thau ba abih hatai jai tame bruk ngak jeng ndap nda jang, urang ngak nong thau khik caga angan je ndap nga di drei jang. Angan ndap nda, ndap nda hu angan brei ka urang pandar nyu sanang hatai jang. Min tapi bruk padang angan ndap nda njauk tui danakdak di nyu".

Tui jalan patagok brei ka gah raong glang, vaktu masa meng anak tỉnh Bà Rịa – Vũng Tàu pachreih raong glang brei pataom tui hamu apuh trang trại, brei pandar pakai jalan raong glang tui tanut ilamu VietGAP di dom bhum palei hu dalam danak dak. Gam tui di nan tỉnh mada ieik glang, taong yaom bruk ngak ekonomi, pambuak nao mai haong alam môi trường piah drak pala papraong bruk ngak mbang raong glang dalam baoh sang ka urang ngak mbang blei salih di dalam jeng ye langiu nagar./.