Urang tong ikan hu pathau khan bruk tong chap tui njauk adat hukum 

Ban Vũng Tàu lac labik hu kapul gilai taong kaya ikan dang ka 2 di tỉnh Bà Rịa - Vũng Tàu ngan haong jaik 2.140 sruh. Meng thun 2018 tal ini, ban hu pambuak bruk haong dom gah chức năng duah mboh, taong phạt 51 bruk ngak suan IUU haong yaom jien taong phat abih tih labaih 1,5 tỷ đồng.

Bruk njauk uan tabuan nan lac, meng akaok thun 2022 tal ini, oh hu gilai taong ikan halei lih tame bhum tasik di negar langiu. Tapa nan, daong ngak brei salih bahrau hatai saneng tal jalan ngak di urang taong ikan saong po gilai. Ong Nguyễn Đình Ngọc daok di xã Phước Tỉnh, huyện Long Điền, po gilai taong ikan di kreh tasik atah ndom lac, tukvak jaik di ini bruk taong mek kaya ikan gaok biak rilo kan kandah, abih di nyu lac yaom menyek tagok glaong, min urang taong ikan tuk halei jeng ngak njauk tui adat hukum, oh kayua caong khin taong mek hu rilo kaya ikan bo lih tame bhum tasik negar langiu:

"Urang taong ikan khaol dahlak thau lac, meyaih daok thẻ vàng ye biak kan ka bruk pablei kaya ikan tabiak negar langiu, yaom jien mek tame meng bruk taong mek kaya ikan tui nan oh glaong. Kayua yau nan ye taong mek njauk adat hukum, ngak mbang siam mekre piah ka pandap panda di drei pablei tapa hu EU piah paglaong yaom jien mek tame, meng nan mikva taong mek ikan patagok hu jien mek tame'.

Tui pasang iek di dom puk palei di Bà Rịa- Vũng Tàu, yaom lac dom sruh gilai lih tame bhum tasik negar langiu trun khang min jeng daok gilai taong ikan suan adat hukum. Thun 2021 saong 3 bilan akaok thun 2022, hu 5 bruk ngan haong 8 sruh gilai saong 92 urang taong ikan njauk cap mek kayua taong cap suan adat hukum di bhum tasik negar langiu. 

Amuk Trần Thị Thu Hường, Akaok jabat Kinh tế ban Vũng Tàu brei thau, piah pacang cakak, yam tal lahik abih bruk ngak suan ini, labaih 3 thun tapa, Vũng Tàu hu pambuak haong dom gah chấp pháp angaok tasik hu peih rilo mbang pathau khan ka urang taong ikan thau piah pasiam veuk panuac cảnh báo di Ủy ban châu Âu – EC ka pacang bruk taong mek kaya ikan suan adat hukum, oh pathau khan saong oh ngak tui adat hukum.

Uỷ ban Châu Âu hu mboh bruk gilai taong ikan di Việt Nam lih tapa bhum tasik di negar langiu hu trun, min oh ka brei peih talaih thẻ vàng kayua jeng daok hu gilai ngak suan. Piah yam tal peih talaih thẻ vàng, Sở Ngak nong saong patagok palei pala tỉnh bhian peih bruk pasang iek di dom pabah lamnge, pasang iek angan yaok gilai ikan daok taong cap, ieu caik thiết bị tui iek jalan nao. Ong Lê Tòng Văn, Akaok Chi cục Thủy sản tỉnh Bà Rịa-Vũng Tàu brei thau:

"Lê Tòng Văn: Urak ini hu 3 tal khik iek, kasa lac jao bruk ka Chi cục Thuỷ sản, meyah gilai ikan oh caik jamraik tui iek jalan nao ye oh brei adat nao tabiak taong mek ikan; meyah tapa vòng ini ye tal dom kapul nyaom di pabah lamnge oh brei tabiak tasik; meyah dauk nao ye gah Biên phòng cap khik. Meyah cố tình nao tabiak tasik suan adat hukum ye gaok pak halei xử lý pak nan. Bruk ini daok peih ngak biak siam, urak ini daok veik kan kandah nan lac hatai saneng di bhap bani".

Piah lahik abih bruk gilai ikan lih tame bhum tasik negar langiu, tỉnh Bà Rịa – Vũng Tàu jeng thau lac, dahlau di abih njauk ngak brei salih jalan saneng di urang taong ikan saong po gilai. Langiu di bruk pathau khan, jak ba, tỉnh daok peih ngak catang bruk pasang iek, taong phạt dom  urang halei ngak suan. Taphia di nan, pambuak bruk saong bhian klah rabha khau tin haong dom tỉnh Bình Thuận, Ninh Thuận haong Kiên Giang… saong dom gah chấp pháp angaok tasik piah thau cambaih saong xử lý dom urang, dom po gilai taong mek ikan suan adat hukum, lih tame bhum tasik di negar langiu./. 

Urang lang: Jasi -30/6