Tapei racam hu mboh dalam raidiuk di bhap bini xã An Ngãi, huyện Long Điền meng lavik mai paje. Hadei di yaok bilan padai, mikva jeng khik  veik meneing padai piah chai jeng tapung ngak tapei racam piah  mbang lavik harei. Tuk camereip lac piah mbang dalam sang, lavik lavik nao hu rilo urang ngak tapei racam piah pablei.

Sang ong Trương Văn Hiền daok di palei An Hòa hu 4 rai ngak tapei racam, urak ini ong patoa veik ka anek kumei. Ong Hiền khan lac, ngak tapei racam oh abih ralo jien buh tame ngak, tapung piah ngak hu bloh di sang, cuh pui meng pon nerang saong kam. Bruk tuh tapei racam hu ngak meng mong 4 sabuh mesup tal  mong 12 jala pandiak, dalam dom mong sa urang meda tuh hu meng 1.200 tal 1.500 baoh, yaom pablei 35 ribau đồng 100 baoh, kuhria  rah tapa yaok harei duah hu meng 200 tal 250 ribau đồng. Tal tuk Tết, yaok mbang tuh labaih 2.000 baoh.

Tui ong Hiền, urak ini rilo baoh sang hu buh jien blei mac điện salih ka ging cuh. Bruk chai tapung jeng hu mac chai nan ye oh abih rilo tukvak. Ong Hiền saong rilo sang tuh tapei racam di An Ngãi caong hu karja  daong padang angan piah paglong labik dang kaya pandap meng kan ini:

“Bruk ini hu meng lavik saman, khol dahlak caong khin jabat chức năng peih bruk pato pasram ka mikva piah palei ngak tapei racam An Ngãi hu tagok jang, jak ba mikva tame HTX piah bruk ngak  hu tani tanat, daok ngak yau urak ini oh hu tani tanat. Karja peih bruk jak ba mikva ngak mbang tui jalan OCOP piah pandap hu ba tabiak darak pasar rilo jang”.

Ong Phan Văn Hên, umo 65 thun daok di ấp An Lộc, jeng ngak randap haong bruk tuh tapei racam dahlau di ini labaih 40 thun. Ong Hên caong khin hu bruk daong meng karja palei piah khik veik bruk ngak meng kan. Urak ini hu rilo sang  dalam bhum oh ka hu jien blei mac chai tapung, nan ye urang nao pah mac chai. Bruk khik brei hacih sa-at pandap mbang jeng oh ka lagiah kayua oh hu mblang pambu ahar.

Tui Sở Ngak nong saong Patagok palei pala tỉnh Bà Rịa – Vũng Tàu, urak ini An Ngãi hu labaih 128 baoh sang ngak tapei racam, gam haong 260 urang ngak dalam xã. Yau rilo bruk ngak meng kan di palei, bruk ngak tapei racam An Ngãi daok ngak sit sot, ralo meng ngak tui sang, pandap piah ngak nyu klak saong oh lagaih, suai salih birau, kan pabak hu bruk hacih sa-at pandap panda.

Muk Lê Thị Hoàng Oanh, Akok UBND xã An Ngãi, huyện Long Điền brei thau, huyện daok hu jalan khik ramik palei ngak tapei racam An Ngãi. Tukvak anak tal, karja palei jak ba mikva xã An Ngãi paglong asar tapei racam, pataom tame ngak tui jalan yaok xã sa pandap palei ngak ( iew katut lac OCOP) piah paglong angan tapei racam An Ngãi, peih praong darak pasar:

  “Dom baoh sang ngak tapei racam di An Ngãi daok caong hu jamraik ngak. Meng blaoh Chi cục patagok palei pala pambuak saong huyện daong mikva jao brei công nghệ ngak tabiak pandap, meng ging tuh tapei racam meng njuh, meng kam ye urak ini hu dom sang salih tapa ging điện. Kadua lac daong mac chai meng điện saong liếp pambu ahar”

Tui ong Trinh Hàng, Yam ndoc Sở Du lịch tỉnh Bà Rịa – Vũng Tàu, palei ngak tapei racam meng kan An Ngãi yaom lac oh ka hu brei angan lac labik rivang ma-in dulich, min rilo thun tapa pachreih hu ralo tuai grauk labik mai rivang, duah thau, tuh iek tapei racam. Anak tal sở dulịch brei yaok pataom  dom palei ngak meng kan di tỉnh, dalam nan hu bruk tuh tapei racam di An Ngãi, tacei pato ngak salah harak gar piah hu brei angan lac labik rivang ma-in dulich.

Tỉnh Bà Rịa - Vũng Tàu kuhria padang HTX ngak tapei racam, ramik veik bruk pablei piah tani tanat yaom kaom, plaih khat lahik ka mikva, gam haong nan, daong phun jien piah dom baoh sang ngak bruk ini salih birau mac moc, yau ye; blei mac chai tapung, pasiam mblang pambu, pabak jalan ba ia hacih piah ginup bruk ngak tabiak racam, yam tal peih praong darak pasar saong pamong tal bruk pablei tabiak negar langiu./.

Urang lang: Ai Nghiem – 14/10/2022