Kadha vak di Gia Khang, urang vak di rayo sap ndom Viet Nam daok di ban raya HCM hu ndom ka bruk ini:

Huyện Châu Đức hu labaih 2.220 sang haong 9.460 menuac lac urang bangsa takik, meblah 5,8% menuac sia dalam huyện. Bhap bini daok di Châu Đức lac menuac di 13 bangsa yau ye: Châu Ro, Hoa, Nùng, Khmer, Mường, Tày, Thái, Chăm, H’Mong ..... Rilo thun dahlau, bruk ngak mbang duah jien di mikva rilo meng lac ngak nong, pala drak saong raong glang sit sot. Hu dom sang oh hu taneh atau kurang taneh ngak mbang, pala drak, gaok rilo kan kandah.

Meng tuk peih ngak Sarak ka 108 thun 2021 di HĐND tỉnh Bà Rịa- Vũng Tàu brei peih ngak Danak dak bruk ngak negar patagok KTXH ka bhap bini bangsa takik tukvak 2022-2025, tal urak ini, jaik abih dom sang bhum bhap bini hu sang daok khang kajap, hu jaman, hu điện pandar, hu daong phun pajaih, anek pajaih saong rilo cơ sở hạ tầng pabak ka raidiuk. Ong Tòng Văn Chiến, bangsa Châu Ro, huyện Xuyên Mộc brei thau:  “Điện, ia dahlau daih oh hu, jalan mbak nao mai oh hu, sit sot lo…, urak ini hu karja daong brei, urang bangsa kol dahlak uan tabuan lo. Urak ini nao mai mbuan lagaih, bui sambai lo, chreih chrai lo”.   

Ông Nguyễn Tấn Bản, Chủ tịch UBND huyện Châu Đức brei thau, dom sarak daong hu pablak tame haong dom asal padang ngak palei pala bahrau, đô thị văn minh di dalam huyện nan ye peih ngak hu siam lagaih. Tal urak ini, raidiuk urang bangsa takik hu salih bharau mboh di anak meta, mikva kham merat yam tagok dalam raidiuk: "Karja daok khang hatai tui jalan daong ka bhap bini, tame bruk cambaih laih, kapul nyaom halei,  đơn vị halei, chi bộ halei tui iek brei tacei tabiak cambaih laih, bruk ngak di akaok palei. Gam haong nan, pambak tame bruk daong di taha palei, akaok puk, dom urang hu angan je dalam bhap bini bangsa takik ye hatai sahneng di bhap bini daok hu salih bahrau biak siam".              

Yaok thun, Bà Rịa- Vũng Tàu brei labaih 200 tỷ đồng piah ngak yaok ratuh danak dak ba mai kein laba ka bhum bhap bini bangsa, yau ye: pakhang pasiam jalan nao mai, ngak dom danak dak điện trung thế, hạ thế, thủy lợi... Tỉnh jeng hu buh tabiak jaik 25 tỷ đồng yaok thun piah peih ngak dom sarak daong tapak ka sang bhap bini bangsa takik lac sang kan kathaot padang bahrau saong ngak pasiam sang daok, pagam điện, ia pandar, patagok bruk ngak mbang, pala drak… 

Tal urak ini, bhum hu rilo bhap bini bangsa jeng mek hu tanut chuẩn palei pala bahrau, hu jaik abih dom sang urang bangsa takik hu pandar điện negar, taong abih dom sang hu pandar ia hacih saong labaih 80% dom sang hu pandar ia mac, 99% sang hu sang daok meng meteh khang kajap taok.

 Tỉnh Bà Rịa- Vũng Tàu daok pamaong ngak brei trun kathaot samar saong khang kajap, haong bruk dui trun meng 4 - 5% dom sang kathaot dalam bhap bini bangsa takik yaok thun. Piah ngak hu bruk nan, Bà Rịa- Vũng Tàu daok hu jalan ngak, daok brei buh tabiak meng kadung jien karja labaih 222 tỷ đồng peih ngak dom jalan jhul KTXH bhum bhap bini bangsa takik cakrok patagok, pataom tame gah: y tế, thủy lợi, ilamu, pato megru, jalan mbak, sang daok. Ong Đỗ Đình Quốc, Akaok mban Bangsa tỉnh Bà Rịa- Vũng Tàu daok brei thau lac: "Tỉnh biak sangka peih ngak rilo sarak bangsa. Tal abih thun 2022 meda lac oh daok sang kathaot tui tanut chuẩn negar dalam bhap bini bangsa takik. Raidiuk mikva jeng oh padeih hu glaong tagok, cơ sở hạ tầng pabak hu bruk patagok ngak mbang, pala drak, pabak ka raidiuk".    

Tame dom bhum hu rilo urang bangsa takik di Bà Rịa- Vũng Tàu dalam dom harei akaok thun bahrau ini, meng mboh hu abih bruk salih bahrau di dom bhum taneh ini. Yaok ratuh sang bahrau, praong, siam, điện hu dui tal sang, rilo jalan palei hu tuh nhựa tapak, samu, dom bein phun mbang baoh daok tame bilan paik baoh...Taong abih yau daok brei mboh sa thun ginup meda di mikva urang dom bangsa adei sa-ai daok pak ini./.