Meng harei 1/1/2025, huyen Long Điền saong Đất Đỏ tame jeng huyen Long Đất. Xa Lộc An (huyen Long Điền klak) jeng patame xa Long Mỹ (huyen Đất Đỏ) jeng angan xa Long Mỹ, daok di huyuen Long Đất. Jabat ngak bruk hu padang di xa Long Mỹ.

Tui UB Bhap bini xa Long Mỹ, dom harei akaok meti hadei bruk pagam patame saong gauk, hatai caong langyah ka harak gar jabat karja hành chính di rahra mboh samar drah jang, rilo di nyu dalam bruk langyah di dom harak gar ka baoh sang, hukum karja tư pháp, taneh riya, alam langik… Ong Phạm Hoàng Phương, urang jakar gah hộ tịch - tư pháp xa Phước Hội, huyen Long Đất brei thau:

“Hadei Tet Nguyen dan, rahra jeng mai tal xa piah pambuak bruk. Min tukvak ini oh hu rilo pacoh tui dahlau Tet. Urang jakar di gah sa pambang jeng hu kham merat, langyah dom harak gar, oh luai ka suai damuai, bayar abih 100% harak gar ka rahra.”

Hu jak jeng yau nan kayua mai meng hatai gul pataom, kham merat di meng urang dang akaok, Ndang uy xa tal yaok urang jakar, urang pan akaok dalam bruk ngak.

Amuk Nguyễn Thị Hiền, Akaok UB Bhap bini xa Phước Hội, huyen Long Đất brei thau, tukvak akaok meti pagam patame gauk, kapul urang dalam UB Bhap bini xa hu kuhria dahlau lac hu gaok kan kandah dalam dom bruk ngak. Min, tal tukvak ini, hu jak jeng langiu di hatai caong, dom bruk hu ngak siam lagaih meng bộ máy karja, kapul đoàn thể, chính trị…

Amuk Hiền hu ndom mayai lac, tui jalan ngak tal thun 2028, tinh hu brei trun 20% urang ngak bruk dalam karja (labaih meng 7 - 8 urang). Bruk ini jeng ngak ka pakat tinh kan si kuhria kayua bruk ngak daok siam lagaih. Min, bruk pasiam palagaih jabat kajar ieu lac asal kadha njauk ngak, piah duh ka rahra bhap bini siam jang:

“Meng ini tal thun 2028, tinh hu dom jalan ngak, danak dak piah rami ramik urang ngak ka njauk ka nyu lagaih. Dalam nan mboh lac tuk patakik urang ngak bruk karja dalam taong yaom urang jakar yaok thun brei taong yaom ka njauk ka tani tanat di tamat dalam thun, adei sa-ai urang jakar prei ta-eng taong yaom drei, tuk ini meng thau urang halai njauk brei rami ramik yau habar ka lagaih.”

Tui amuk Nguyễn Thị Ngọc Trâm, Akaok UB Bhap bini phuong Phước Trung, Ban Ba Ria, hadei pagam, phuong hu mblang taneh praong jang, manuac urang rilo jang, hu rilo jabat Ndang, Karja di tinh saong ban padang pak di ini… saong hu rilo labik ngak bruk mbang pablei salih, jien padai. Kayua yau nan, bruk an ninh pakaro salamat, gheih ghang siam mekre di ban hu rilo salih bahrau, mada mbuan si rah tabiak rilo kanjah jhak.

Amuk Trâm ndom mayai brei thau lac, asal kadha nan lac kapul urang dalam UB Bhap bini brei hu gul pataom dalam bruk ngak, dang akaok pato tacei, kham merat di dalam bruk ngak.

“Tuk bahrau patame gauk jeng gaok rilo kan kandah ka bruk dang akaok pato tacei, kayua yau nan ye njauk brei abih pakat chính trị njauk biak gul pataom, brei salih bahrau, hadah krah, hu hatai thau ka bruk di drei saong kham merat ye meng mek hu siam lagaih glaong. Jeng yau khik kajap bruk ngak hu makna ka gah kinh tế - xã hội - quốc phòng - an ninh, khik kajap bruk gheih ghang siam mekre dalam ban.”

Hadei padeih padei Tet Nguyen dan 2025, tinh Ba Ria - Vung Tau daok hu dom jalan ngak piah tuk ramik padak labaik hanh chinh lac pasiam palagaih jabat karja. Tinh jeng yau rilo tinh, ban karei dalam taneh ia ngak bruk ramik padak pasiam palagaih jabat karja pakat huyen, xa brei pasiam palagaih jabat karja saong pok yam tal bruk kuhria glaong abih lac duh siam ka bruk patagok taneh ia saong hatai caong di rahra bhap bini./.