Tukvak ini, bruk mek veik taneh hu rahra njauk hatai, pachreih tui, piah ka danak dak hu padang ngak njauk tukvak di harei 30/4 anak tal. Kadha vak di Lưu Sơn, urang vak di rayo sap ndom Viet Nam daok di TP.HCM hu ndem tal bruk ini:

Ong Lê Văn Ánh, ấp Bắc 1, xã Hoà Long, ban Bà Rịa khan lac, sang ong lac sang sarak kanja nan ye hu kanja brei 6 sào taneh piah ngak padai. Jaik 50 thun kak kajap haong mblang taneh, min urak ini kanja ngak jalan ye sang ong halain hatain pambuak bruk, jao taneh piah ka danak dak samar drah hu peih ngak, yaom lac thau lac mblang taneh daok veik 1,5 sào biak kan kandah dalam bruk pala drak. Bahrau ini, UBND xã ieu nao mek jien daong ka taneh njauk mek veik, ong Ánh biak uan tabuan saong caong khin kanja mek abih mblang taneh daok veik saong daong jien njam patam, pandap panda di mangaok mblang taneh: "Jalan cao tốc hu padang ngak piah cak rok patagok kinh te taneh ia ye rahra biak pachreih tui. Min kanja jeng njauk hu sarak lagaih ka rahra, kayua mblang taneh daok veik lac biak sit, bo daok  njauk jalan cao tốc neh tabiak jeng 2 nan ye oh ngak hagait hu veik. Kanja njauk daong abih  mblang taneh daok veik, atau hu jalan ka rahra pala phun mbang baoh hagait nan".

UBND ban sit Phú Mỹ brei thau, jalan cao tốc Biên Hòa - Vũng Tàu nao tapa 4 xã, phường ngan haong 1.089 sang, kapul nyaom saong 410 baoh sang tavak tame. Urak ini, ban sit Phú Mỹ hu biyar jien bồi thường ka 160 sang rahra ngan haong paok jien jaik 120 tỷ đồng. Karja palei ini jeng hu brei tapa bruk biyar jien bồi thuờng, daong tái định cư ka 476 sang saong 1 kapul. Tui ong Đào Danh Sửu, yam ndok Pasak cak rok patagok kadung taneh ban sit Phú Mỹ, bruk biyar jien peih mbaok taneh di pak ini hu peih ngak siam lagaih, rilo rahra hu taneh njauk mek veik jeng pachreih tui. Taong abih dom baoh sang dalam phường Mỹ Xuân hu taduan jien bồi thường blaoh saong njauk hatai jao mbaok taneh.

Jeng tui ong Sửu, bruk mek veik taneh meda ngak kan kandah biak praong tal raidiuk di rahra. Dalam tuk peih ngak, jabat khik ramik taneh riya tuk halei jeng ngak bruk abih drei, ngak njauk tui dom adat hukum saong khik kajap kein laba di rahra: "Urang jakar, urang ngak di kol dahlak ngak bruk gam harei sanecar, dom harei dalam adit ye ngak tal maong 8 melam. Kayua yau nan ye, tal tukvak ini kol dahlak meda lac ngak hu bruk ba tabiak, njauk tui  adat hukum. Dom panuac di rahra, kol dahlak jeng hu ba tagok likau jabat hu thẩm quyền piah khik kajap kein laba di rahra saong dom menuac hu pambuak tal".

 Danak dak jalan cao tốc Biên Hòa - Vũng Tàu labik nao tapa ban Bà Rịa atah 3,77km ngan haong mblang taneh njauk mek veik lac jaik 23 ha. Urak ini bruk peih mbaok taneh di danak daok hu karja palei ngak samar drah. Ban Bà Rịa hu patabiak harak mek veik taneh saong  brei peih bruk biyar jien bồi thường 151 urang hu taneh njauk mek veik ngan haong yaom jien abih tih labaih 290 tỷ đồng. Gam haong nan jeng daok pataom tame ngak salah dahlau hạ tầng labaih 100 lô taneh piah langyah bruk tái định cư ka rahra, rik daong bruk peih mbaok taneh danak dak saong tani tanat raidiuk ka rahra hadei di tuk njauk mek sang, mek taneh.

Ong Trần Việt Dương, akaok UBND xã Hoà Long, ban Bà Rịa brei thau, bruk biyar jien bồi thường saong langyah bruk tái định cư ka dom baoh sang daok hu samar drah peih ngak. Mikva biak pachreih tui bruk ngak jalan cao tốc nan ye bui sambai taduan mek jien daong: "Tal tukvak  ini, jaik abih dom sang gam tame danak dak jeng pachreih tui, taduan jien bồi thường, jien daong.. UBND xã daok parabha tukvak tabiak piah daa dom baoh sang tagok taduan jien. Jeng hu dom baoh sang daok ka oh njauk hatai ka bruk daong pandap panda di mblang taneh, nan ye ka oh taduan jien. Bruk ini ban daok pambuak gauk langyah."

Bà Rịa- Vũng Tàu daok kham marat peih bruk padang ngak danak dak jalan cao tốc Biên Hòa-Vũng Tàu di harei 30/4 anak tal. Kayua yau nan ye, tỉnh daok pataom prein tame bruk peih mbaok taneh, biyar jien daong tái định cư, paduan ba dom danak dak ilamo rah tui jalan njauk tui adat saong khik tani tanat raidiuk, khik kajap kein laba di rahra./.