Ba Ria Vung Tau dok padang ngak tui jalan tasik 

Danak dak jalan 991B atah labaih 9,7km, hu ngak haong yaom jien labaih 3.951 tỷ đồng, dalam nan kadung jien Trung ương hu tal 3.232 tỷ đồng. Tal urak ini, danak dak ngak hu 60% bruk di nyu. Ong Đinh Trọng Huỳnh, Yam ndok điều hành Tập đoàn Cường Thịnh Thi, gah padang ngak 1 dalam 2 pok thầu di danak dak brei thau, tukvak tapa, yaom vật tư tagok glaong ngak kan kandah tal bruk ngak di nhà thầu. Gam haong nan, jit ruak rah tabiak srau kadau nan ye tuk camereip brei padeih ngak dalam 18 bilan. Urak ini daok pataom menuac, pandap piah jhul samar bruk ngak, piah ngak salah di bilan 6/2023 yau panuac sanya.  Ong Đinh Trọng Huỳnh daok brei thau lac:

Ini lac danak dak praong di Bà Rịa – Vũng Tàu piah pambuak haong jalan roya 51, hadei ini jeng pagam tame haong jalan nduac samar Biên Hoà – Vũng Tàu nan ye dom gah padang ngak biak thau yaom glaong di bruk ngak ini. Dalam tuk padang ngak, njauk brei padeih 18 bilan kayua jit ruak brei daok pa-atah di gauk. Yam tapa abih kan kandah, kol dahlak hu ieu pataom taong abih gah tame, ngak 3 ca gam gam, nan ye ngak njauk tukvak yau sanya haong po đầu tư.

Meng bilan 6/2020, urang ngak di mengaok dom jalan di danak dak daok kham merat padang ngak piah samar ngak salah, njauk tuvak ba tabiak. Sa-ai Nguyễn Văn Lin, urang ngak daok ngak bruk di danak dak brei thau, kapul urang ngak hu pataom mai biak rilo, mbang, ndih pak di labik ngak. Yaok urang jeng thau yaom glaong dalam bruk hu jao brei piah samar ngak salah danak dak:

Urak ini kol dahlak daok tuh bê tông ngak tatua, bruk ngak daok rah tabiak dalam mbuan lagaih. Kol dahlak kham merat pataom tame bruk ngak piah ngak salah bruk. Urak ini bruk ngak daok hu siam mekre jang dahlau.    

Gam haong bruk sami samar di dom danak dak padang ngak jalan 991B, bruk ngak tatua Phước An, pambuak pagam ban sit Phú Mỹ, tỉnh Bà Rịa – Vũng Tàu haong huyện Nhơn Trạch, tỉnh Đồng Nai jeng hu tỉnh Bà Rịa – Vũng Tàu daok peih bruk bayar jien mek taneh, pasang iek, ngak hồ sơ thiết kế kỹ thuật – kuhri kuhria dahlau yaom jien ngak. Tui kuhria, tỉnh brei peih đấu thầu, pilih ruah po thầu padang ngak dalam thun 2022.

Tui ong Nguyễn Công Vinh, Phaok akaok UB bhap bini tỉnh Bà Rịa - Vũng Tàu, bruk jhul samar tukvak padang ngak dom jalan mbak praong, nao mai rilo lac bruk njauk ngak. Ngan saong jalan 991B, tỉnh ieu po đầu tư pataom tame ngak brei samar, patagok bruk tui iek piah pakham nhà thầu. Daok bruk ngak jalan Long Sơn - Cái Mép, tal urak ini hu jao 88% mbaok taneh. Tỉnh hu ieu po đầu tư ngak tui jalan yau Yuan lac “cuốn chiếu” piah jhul samar bruk ngak.

Ong Vinh daok brei thau lac, dom nhà thầu hu prein ngak oh khang, ngak suai damuai, tỉnh ieu mBan khik ramik danak dak jalan mbak bhum Cái Mép - Thị Vải pathau khan samar piah hu jalan langyah chip, kham merat ngak salah bloh njauk tukvak ba tabiak:

Ong Mai Ngọc Thuận, Phaok Chủ tịch HĐ bhap bini tỉnh Bà Rịa – Vũng Tàu brei thau, dalam bruk đầu tư công trung hạn tukvak 2021- 2025 tỉnh meda brei pabak jaik 10 rabau tỷ đồng piah buh tame ngak 10 danak dak jalan mbak pambuak pagam yau: danak dak binah 3 di jalan nduac samar Biên Hòa - Vũng Tàu, 5 jalan tapen tasik (Tỉnh lộ 94), jalan vành đai 4 labik tapa tỉnh Bà Rịa - Vũng Tàu, jalan pagam tame cao tốc Biên Hoà - Vũng Tàu (meng jalan roya 56 tal nút giao Vũng Vằn), jalan Hội Bài - Phước Tân pambuak cao tốc Biên Hoà - Vũng Tàu haong jalan roya 51…

Tui ong Thuận, piah ngak dom danak dak nan, tỉnh brei padeih 21 danak dak karei ngak hadei jeng hu:

Njauk pakhang pasiam mBan khik ramik danak dak, pilih ruah po thầu njauk tui adat hukum saong brei hu jien padai, hu ilamu peih ngak dom pok thầu hu jao brei meng tư vấn tal padang ngak. Brei ngak ka nyu cambaih laih meng kapul nyaom, menuac urang halei taduan bruk, tukvak ngak, tukvak salah bruk saong tukvak peih brei jien, saong brei hu jalan peih brei jien tui yaok bilan.

Meda mboh lac, bruk tỉnh Bà Rịa – Vũng Tàu pabak 10 danak dak jalan mbak angaok nan tame bruk đầu tư công trung hạn vaktu 2021-2025 hu brei mboh bruk khang hatai  buh jien tame bruk praong piah padang ngak dom danak dak jalan mbak pambuak gauk, ngak jeng prein khang cakrok bahrau, jeng dom labik patagok khang kajap saong suai lavik ka Bà Rịa - Vũng Tàu./.

Urang lang: Hanipha- 21/7