Tuk pahadar 76 thun Harei Thương binh liệt sĩ 27/7 thun ini ngan haong amuk Nguyễn Thị Ni (daok ieu lac Tư Ni), umo 84 thun biak karei jang dom thun dahlau. Amuk saong dom urang kumei daok guk chính trị dahlau deih hu taom gaok gauk di Côn Đảo, lac labik dom saai bhian njauk kol khamang mek kareik, taong paoh biak jhak. Taom gauk lac bui sambai praong, urang ba gauk ndom biai nao mai, ba gauk hadar veik dom bruk meng kan.

Tapa nan, amuk Tư Ni saong dom urang guk chính trị dahlau deih di Côn Đảo hu Akaok negar Võ Văn Thưởng tangi sua, alin pandap, pachreih ba ngak ka thei jeng biak drut druai. “Urak ini, dahlak daok sa drei di Côn Đảo, hu anai Quyên deih yau gauk gar dalam sang, yaok harei mai tal blei pandap mbang, njam patam baoh kraoh, puh ramik sang danaok biak haci hacih, nan ye dahlak mboh bui sambai. Urak ini dahlak mbang, ndik hu lo,  meyah oh hu thei sangka ye mebuk hatai lo, hu yau nan dahlak hu bui sambai”.

Thun ini umo 94 thun, amaik Việt Nam Anh hùng Trần Thị Đường, daok di puk Đông, xã Hoà Long, ban Bà Rịa brei thau, pasang saong anek likei kacua di amuk ndih trun dalam mbang mesuh Mậu Thân 1968. Taneh ia hu saron mbon, amuk tuk halei jeng hu taduan bruk sangka di Đảng, Kanja, sangka daong meng pandap panda tal mbang ngui daok dang, nan ye bruk duh hatai jeng hu cadu meneing.

Amaik Đường caong lac rairah harei ini daok tui jalan di dom rai dahlau, kham merat bac megru, rik prein di drei ka bruk dak padang taneh ia, palei negar: “Umo thun taha, pasang, anek oh daok bo hu Đảng, Kanja sangka, oh klak di gah likuk dom urang yau kol dahlak hulin lac biak bui sambai,  dahlak mboh biak sahanang hatai. Rai ranaih umo thun urak ini hu rilo mbuan lagaih, njauk kham marat yam tagok, bruk hagait ngak suan ye drei pahadar, tacei pato”.

Ong Nguyễn Văn Quang, Akaok Jabat Lao động – thương binh saong xã hội ban Bà Rịa brei thau, dom urang dahlau daih ngak bol lin, thương binh, urang guk chính trị dahlau deih lac sa dalam dom kapul ba akaok , jak ba rahra halain hatain pachreih tui dom jalan ngak, sarak di dang saong Kanja, lac kreih camin dalam raidiuk, ba akaok nao dahlau dalam bruk peih ngak dom bruk jak ba. Meng rilo bruk ngak hu makna, dom urang ini hu rik tame bruk pato veik ilamo meng kan ka rai hadei, taduan saong ngak tui dom bruk ngak di rai urang nao dahlau, rik prein ranaih ka taneh ia: “Rilo urang daok prein yava jeng hu mbaok tame dom bruk ngak di kapul nyaom di puk palei. Jeng hu dom urang yau ye sang sarak kanja, sang cách mạng, thương bệnh binh,… hu mbaok tame Kapul urang praong thun, dom kapul di dalam labik rahra, rik prein tame pato pakai ka anek kamuan  dalam palei ka ilamo cach mang meng kan”.

Yaok urang sa thar vak karei di gauk, min tapi dom urang daok guk chinh tri dahlau deih, thương bệnh binh, amaik Việt Nam Anh hùng di Bà Rịa - Vũng Tàu tuk halei jeng hadah mbaok mata ka ilamo cach mang meng kan di palei negar, kham marat yam tapa pandik harao, diukrai bui sambai chreih chrai, rik prein di drei meng yaok bruk  meda ngak hu. Hatai di urang  lin cách mạng hu pachreih ba ka rai harei ini, piah ka dam dara urang ranaih umo thun caong hu buh prein, ba tangin tame dak padang taneh ia dak harei dak cak rok patagok khang kajap./.