Hưng Hội, huyện Vĩnh Lợi lac xã hu rilo urang bangsa Khmer, dalam dom thun tapa, kadung jien brei masaiy tui sarak xã hội hu daong ka sang kan kathaot, sang jaik kathaot mikva bangsa takik hu jalan cak rok patagok bruk ngak mbang, pala drak, padang ngak sang daok, dom danak dak ia hacih…palagaih ka rilo sang yam tapa kan kandah, tabiak truh kan kathaot, raidiuk dak harei dak hu glaong tagok.

Saai Danh Nhung lac urang dalam Kapul patak pataom saong brei masaiy jien di puk Cái Giá khan lac: “meng di tuk hu mbaok tame kapul masaiy jien patak pataom piah cak rok patagok bruk ngak mbang, pala drak, sang dahlak hu jien piah ngak pasiam veik taneh, buh jien tame blei pandap panda pabak ka bruk pala njam patam, blei asal pajaih… meng nan bo kinh tế urak ini hu tani tanat jang dahlau biak rilo.”.

Meng bruk hu mesraiy phun jien di sarak, mikva bangsa Khmer hu jalan piah cak rok patagok bruk ngak mbang, yam tabiak truh kan kathaot. Ong Nguyễn Hoàng Em, akaok xã Hưng Hội brei thau: “mayah thun 2016, xã hu 610 sang kan kathaot, urak ini tok daok 47 sang kan kathaot. Raidiuk, bruk ngak mbang di mikva Khmer dalam xã dak harei dak cak rok patagok, rilo sang padang hu sang danaok siam mekre, khang kajap, brei ka anek bik nao mbang bac tal labik tal dua.

Meng 16 danak dak brei masaiy jien, tal urak ini Gilang paraik sarak kanja (CSXH) Bạc Liêu hu 83.858 mbang tuai masaiy labaih 2.376 tỷ đồng, daong ka labaih 43.000 sang kan kathaot, jaik kathaot saong sang bahrau tabiak truh kan kathaot hu phun jien piah ngak mbang, pablei salih. Langiu di nan, gilang paraik sarak kanja tỉnh daok hu brei masaiy 256 tỷ đồng daong padang ngak labaih 15.800 danak dak ia hacih saong labaih 12.600 danak dak ngak hacih di puk palei...

Daok mikva Khmer dalam dom puk palei di xã Điền Hải (huyện Đông Hải), mikva hu pandar phun jien masaiy laba lap meng gilang paraik sarak kanja piah ngak padai ia, ngak pasiam veik mblang tasik gluh baok jeng danao raong hadang sú, ikan bống tượng, cak tok patagok bruk ngak meng kan. Raidiuk di mikva bangsa Khmer trei sil jang meng phun jien masaiy laba lap. Pagap yau sang ong Danh Sua, daok di puk Tân Ðiền, xã Điền Hải dahlau deih lac sang kan kathaot, tok hu 5 công taneh pala drak nan je jien mek tame oh glaong. Tuk hu masaiy 30 triệu đồng, ong Sua blei 10 drei pabe mai raong. Tal urak ini, pabe sang ong manek hu 20 drei. Kinh tế dak harei dak tani tanat, ong Sua hu ngak harak likau tabiak truh kan kathaot.

Ong Bùi Minh Túy, Phó yam ndok Sở Lao động Thương binh saong Xã hội tỉnh Bạc Liêu brei thau: Kapul patak pataom saong brei masaiyy phun jien, rilo thun tapa hu pagap yau gah tangin pambuak atah di gilang paraik sarak kanja hu parabha grauk dom puk palei saong brei masaiy, nao tal njauk manuac urang hu masait hu rik daong siam lagaih tame bruk cak rok kinh tế, an sinh xã hội, padang ngak palei pala bahrau di Bạc Liêu.

Meda ndom lac, bruk tabiak truh kan kathaot, yam tagok ngak kaya mada di mikva bangsa takik di tỉnh Bạc Liêu meng hu bruk daong ba di Gilang paraik sarak kanja, dom danak dak brei masaiy mek hu siam lagaih, rik tame bruk patrun kathaot khang kajap, khik tani tanat an sinh xã hội, daong mikva dom bangsa dak harei dak jia tame bruk par akaok di Đảng, kanja, rik prein tame padang ngak, cak rok patagok puk paga, palei negar./.