Labik rahra daok jaik taphia bilai dân quân thường trực xã Lộc Hòa, huyện Lộc Ninh, tỉnh Bình Phước hu 34 sang, dalam nan hu 33 sang lac urang bangsa S’tiêng. Yaok sang hu Quân khu 7 padang sang brei, yaom 90 triệu đồng sa baoh. UBND tỉnh daong 30 triệu đồng sa baoh sang, dom gah hu daong phun pajaih, anek pajaih meng 6-15 triệu đồng sa sang. Gah tapon nyaom bol pan phao kraong tỉnh hu daong menuac ngak sang, jak ba doanh nghiệp daong pandap padang ngak piah abih takik jien padai.

Sang sa-ai Điểu Minh Hiếu daok di labik ini meng thun 2019. Langiu di baoh sang hu padang brei, sang sa-ai daok hu karja palei brei 5.000 m2 taneh piah pala pa-ok blait. Bein pa-ok blait thun blaoh hu baok mbang camereip, tok mek hu dom pluh ký asar. Mboh raidiuk di mikva daok rilo kan kandah, urang jakar, urang lin Bilai dân quân thường trực xã Lộc Hòa bhian salih gauk mai duah thau, daong ka mikva jah tak hareik hareim, pasiam bein pala, pacang khuah bilan padiak thu, tacei pato ilamu pala saong iek glang bein phun pa-ok blait hu rilo baoh, rilo asar.

Sa-ai Điểu Minh Hiếu saong diuk kumei di drei lac Thị Mước, lac sang kaya meda abih di labik ini. Langiu di bein pa-ok blait  praong 5.000m2, diuk pasang sa-ai daok hu 5 sào padai saong tapon kubao lamo 7 drei. Nan lac drap ar praong ngan saong mikva urang S’tiêng daok di labik tapen negar. Ini jeng lac makna bo diuk pasang sa-ai Hiếu khang hatai daok veik bhum tapen negar. Sa-ai Hiếu khan lac: “Daok luac rai di labik ini tal rai anek, taco, meyah labik ini hu bruk hagait rah tabiak, rahra kol dahlak jeng samar khan brei bilai, brei akaok palei pak ini thau”.

Xã Lộc Hòa hu 41% menuac sia lac urang bangsa S’tiêng. Ngan saong akaok bilai Đoàn Văn Quý, hu menek tabiak saong praong tagok di bhum taneh tapen negar daok rilo kan kandah ini, nan ye sa-ai tuk halei jeng thau hu dom kan kandah di mikva urang bangsa takik. Ngan saong dom baoh sang kathaot di labik ini, sa-ai bhian mai ravang iek, pachreih ba, caik hatai tui pang dom caong khin di mikva piah samar hu bruk daong brei. Gam mbang, gam ngak, gam ndom biai sap di mikva, nan ye sa-ai Quý hu mikva caik hatai jia, tuk dalam palei, dalam xã hu bruk hagait ye mikva khan brei sa-ai thau chip, abih di nyu lac dom bruk pambuak tal sron mbon salamat bhum tapen negar. Akaok bilai Đoàn Văn Quý, lac: “mBan chỉ huy di bilai pambuak haong gah dân vận trun taom gaok, duah thau bruk, duah thau hatai caong khin di mikva dalam labik daok jaik taphia, jak ba mikva ngak njauk tui hukum di Karja, khik caga jalan tapen negar, khik iek mốc giới piah khik siam bruk sron mbon, siam mekre labik tapen negar”.

Xã Lộc Hòa hu jalan tapen negar atah 12 km, jaik xã Titanu huyện Xanua, tỉnh Kratie, Negar Campuchia. Bilai hu brei bruk pambuak gauk haong dom gah Biên phòng pabah mbang negar pakat dunya Hoa Lư, Công an xã, gah khik iek glai nao pasang iek, duah thau bruk di tapen negar piah mboh saong pacang cakak samar kol ngak suan adat tapen negar, pathau khan mBan CHQS xã, Đảng ủy - UBND xã piah hu jalan tacei pato, langyah.

Mala pandiak khang labik jalan tapen negar, rup binguk ao hijao di dom urang lin patuk 4 mata jeng daok harei harei nao angaok jalan khik iek bhum tapen negar piah khik kajap sron mbon, salamat ka mikva ngak mbang, diukrai. Thun bahrau daok mai di yaok baoh sang dalam bhum tapen negar. Tuk halei, dom urang lin, dân quân jeng daok khang hatai pambuak haong dom gah, harei melam nao pasang iek, khik caga bilan “xuân biên cương” di taneh ia, palei negar./.