Dom harei akok thun birau, tuk lahe, muk H Lep Niê (daok hu angan ieu lac amí Khuýt), daok di palei Buôr, xã Hòa Xuân, ban Buôn Ma Thuột daok la tame janeng menyim. Muk daok menyim brei salah blah khan hu rilo bingu mekre meta bingu baoh tamun. Ini lac bingu meng kan, biak takik mboh, muk birau bac hu meng tal pato menyim.

“Urang Ê đê hu rilo bingula yau sole, jalan gam dua, dhar kayau, siu, biak ralo janih. Dom janih nan dahlak hu ngak tapa blaoh paje. Urak ini, duah thau hu bingu hagait birau ye bac pasram veik, yaom lac drei umo praong ye min khin thau rilo jang nan ye  tut angan tame bac”.

 Tal bac pato menyim kayua muk H Bion Buôn Krông,  buôn Cư Dluê, xã Hòa Xuân tacei pato. Umo labaih 60 thun, muk Hbion hu jaik 50 thun pambuak haong bruk menyim khan bai. Muk sahaneng lac meda patua veik dom hagait drei thau ka dom adei sa-ai patui khik ramik saong patagok bruk menyim khan bai meng kan.

 “Caong khin tuk halei jeng hu prein yawa khang kajap piah pato veik ka dom adei sa-ai, anek kamuan bruk menyim khan bai, bruk sro merai, bruk jhik khan ao. Dahlak pato bruk palih mrai, dak mrai, dak bingu, palong janeng menyim, pok bingu, menyim bingu, meng bingu sit tal bingu praong, meng bingu mbuan tal bingu kan. Ka dua, lac caong khin dom anek taco pachreih ngak tui, khin bac menyim bac jhik piah khik ramik”.

 Tal pato bac bruk ngak lac sa dalam dom bruk di Kalup kapol Menyim khan bai meng kan di urang Ê đê palei Drai Hling, xã Hòa Xuân. Tui nan, hadei di tuk padang tabiak di bilan 9 thun 2023, kalup kapol  pataom hu jaik 30 adei sa-ai kumei hu hatai takre, caong khin bac saong patagok bruk menyim. Dom adei sa-ai hu nghe nhan pato bruk menyim, tagok janeng menyim, dak mrai pok bingu saong ngak brei janeng praong atau sit tui pandap menyim tabiak. Gam haong nan, kalup kapol  hu daong janeng menyim, mac vatso, mac jhik…piah urang bac pasram. Sa-ai H Nga Byă, Akok Kalup kapol  brei thau:

 “Anak tal, khol dahlak jak ba adei sa-ai pataom tame menyim dom blah khan bai bangsa yau khan ao, kadung teik, kadop tui ilamu meng kan piah oh var klak, oh lahik nao bruk ngak di ong muk kei drei meng kan caik rai”.

 Tui ong Từ Văn Hợi, Chủ tịch UBND xã Hòa Xuân, bruk tabiak rai di Kalup kapol menyim khan bai bangsa tui bruk ba tabiak di Sở Ilamu, The thao saong Du lịch Đắk Lắk ka danak dak “ Khik ramik, patagok ilamu siam gheih meng kan di dom bangsa takik pambuak haong bruk cak rok patagok dulich”, di danak dak pakat negar patagok bruk ngak mbang kinh te xa hoi bhum urang bangsa takik saong bhum ceik, vaktu 2021- 2030. Tacei jalan ka bhum palei patagok ilamu pambuak saong dulich bhap bini.

 “ Padang kalup kapol Menyim khan bai bangsa piah patagok ilamu siam gheih  saong pamong tal bruk suai lavik lac pambuak haong dulich bhap bini piah yaih khan dom pandap, dom ilamu siam gheih memg  kan di urang Êđê di xã Hòa Xuân, rik tame pambuak haong bol bhap bangsa di tỉnh, ban  yaih khan dom ilamu siam gheih  di urang bangsa  takik khik ramik, pato veik”.

Bilan xuan ini, sap janeng menyim daok hu mboh di ala baoh sang tuan atah di dom adei sa-ai kumei bangsa Ê đê xã Hòa Xuân, ban Buôn MaThuột. Dalam bilan xuan chreih chrai bui sambai, dom sap yawa meng janeng menyim, dom tangin gheih menyim sami samar ngak jeng rilo sambo mau hadah tanyak ba tui dom caong khin angaok dom blah khan bai Ê đê./.