Tui dom chuyen gia, 200km jalan pasei đô thị tal thun 2035 lac biak kan kandah mayah oh hu dom jalan ngak bahrau. Anak meta mboh jalan metro ka 1, jalan camriep lahik tal 20 thun nan ye meda lac oh ngak hu 200km haong jalan sahaneng, jalan ngak klak. Dom chuyen gia mboh lac, TP.HCM brei pambuak rilo gah, ini oh njauk lac bruk taeng di Mban khik ramik jalan pasei đô thị. Dalam nan dom bruk meng quy hoạch, biyar jien, giải tỏa atau ba tame pandar hu pambuak khang kajap haong gauk. KTS Ngô Viết Nam Sơn caong lac, dahlau di tuk peih ngak dom jalan metro njauk ngak salah dom bruk biyar jien, giải tỏa piah khik tani tanat bruk padang ngak. Taphia di nan njauk padang kapul jalan pasei đô thị saong tập đoàn TOD: "Dahlak sahaneng lac tập đoàn praong yau ye sa công ty cổ phần, saong dom urang dalam cty camriep meda lac dom so, dom mban, dom gah hu mbaok tame danak dak. Nan lac urang padang tabiak danak dak jeng lac urang peih ngak danak dak saong khik ramik hadei di ini".

  TS Phan Hữu Duy Quốc, urang hu rilo thun kak kajap haong jalan metro ka 1 brei thau, tapa ilamo ngak jalan metro 1 TP.HCM, bruk ngak 200km tal thun 2035 tuk camriep maong mboh lac oh ngak hu min mayah ngak siam dom bruk ngak iek saong samar ba tame ngak samar drah ye meda padang ngak hu. Pagap yau ban Thẩm Quyến di Trung Quốc jeng bhian padang ngak hu 250km jalan pasei đô thị dalam 5 thun, ong Phan Hữu Duy Quốc brei thau, nan lac tukvak jhul patagok ngak samar hadei di tuk yaok sarak, jalan ngak hu peih ngak iek saong mboh lac ngak njauk: "Dahlak caong lac kol drei samar drah ba tame ngak iek saong yam tapa tukvak ngak samar drah meng caong lac dalam 7 – 8 thun puac tukvak Quốc hội brei adat kol drei meng ngak hu. Kol drei meda ngak hu tukvak jhukl pasamar. Nan ye njauk hu tukvak ngak iek piah meng nan bac hu ilamo saong jhul peih ngak pasamar".

Urang roh duah ilamo gah kinh tế ong Phan Chánh Dưỡng hu tacei tabiak ilamu meng bruk padang ngak Labik chế xuất Tân Thuận saong Labik đô thị Phú Mỹ Hưng mboh lac, bruk ba rahra hu mbang tui kein laba meng dom danak dak hu daong ka rahra pachreih tui. Nan ye, tuk hu blaoh danak dak 200km jalan pasei đô thị ngan haong yaok ratuh sang ga ye Ban raya njauk kuhria tal bruk “định cư” ka rahra hu sang danaok gaok tal di danak dak meda hu mbang tui kein laba di danak dak. Langiu di nan, Ban raya njauk likau dom sarak abih gah piah peih ngak danak dak saong kuhria gam bruk jien padai haong Trung ương. Ong Phan Chánh Dưỡng ndom lac, tuk ngak sa jalan camriep meda ngak biak suai. Min tuk ngak blaoh jalan nan, meda pandar dom urang nan ngak dua jalan, saong mbang ka klau meda ngak 4 jalan haong gauk. Kayua yau nan ye, mayah ngak tui jalan cuốn chiếu ini ye bruk ngak “200km jalan pasei đô thị tal thun 2035” meda ngak hu: "Ini lac jalan ngak cuốn chiếu, yaok mbang ngak blaoh lac sa jeng dua, dua jeng pak saong pato pakai anek menuac jeng meng ini. Kayua yau nan ye hadei di ini kol drei ngak biak samar kayua manuac ngak drei hu blaoh, parabha jeng dua. Saong hadei di ini meda hu mbaok di doanh nghiệp tư nhân tame ngak".

Akaok UBND TP.HCM Phan Văn Mãi ndem lac, ban raya meda oh salih tukvak ngak salah 200km metro di thun 2035. Ban raya kham marat ngak saong meda trun tagok 2 tal 3 thun min ngak haong hatai kham marat glaong di abih. Abih di nyu nan lac, dalam peih ngak, TP.HCM oh likau kadung jien Trung ương bo likau sarak, jalan ngak jien padai piah padang ngak. TP.HCM caong hu 10 tỷ USD piah ngak jalan metro min oh lac sa mbang blaoh bo yaok thun 1- 2 tỷ USD, TP hu jalan ngak gah jien padai lac langyah hu bruk:  "Kol drei likau lac likau jalan ngak, sarak jien padai. Ka dua lac kol drei ngak iek yau habar. Oh njauk lac ngak blaoh danak dak ngak iek blaoh meng ngak dom bruk daok veik, yau nan lac oh blaoh 200km dalam 11 – 12 thun. Ban raya kuhria ngak iek 1 – 3 thun, meng di tuk ngak iek dalam tukvak caga ngak danak dak. Tuk ngak salah tukvak caga danak dak ye kol drei ba tangin tame caga ka dom bruk daok veik".

Kapul langyah peih ngak Sarak ka 98 di TP.HCM jeng hu ba tabiak bruk roh duah pabak veik dom nyaom jalan ngak, sarak ka bruk pato pakai manuac ngak, pabak hu prein khik ramik saong peih ngak danak dak dahlau, dalam saong hadei di tuk danak dak hu padang ngak. Abih di nyu nan lac njauk pasiam veik prein khik ramik kanja saong prein ngak di dom jakar công chức urak ini piah peih ngak./.