Rilo doanh nghiep brei thau lac, piah meda buh jien tame ka sa danak dak ngak mbang, pablei salih gah raong glang, njauk yam tapa rilo kan kandah gah harak gar, abih rilo tukvak, phun jien. Pagap yau, dahlau di abih, doanh nghiep njauk nao pasang iek, duah mbaok taneh lagaih, ginum manyai biyar jien njam patam, baoh kraoh, sang danaok di mangaok taneh piah salih quyen pandar taneh, blaoh ngak dom adat buh jien tame, padang ngak.

Dom danak dak pabak ka bruk pala drak, raong glang pandar công nghệ glaong njauk buh jien tame padang ngak sang halam, sang kreih, var raong bahrau, dom kho caik kaya nong, pandap panda dalam tuk ngak. Min, bruk likau adat padang ngak jeng daok kan kandah kayua tavak rilo adat ka oh lagaih. Amuk Trương Thị Lệ Khanh, Akaok Hội đồng Quản trị – Taong Yam ndok Cty Cổ phần Vĩnh Hoàn (VHC) brei thau: “Piah hu prein dui pachreih urang buh jien tame gah ngak nong, kaya nong ngak pandap ye kol drei ka oh khang. Kayua yau nan ye, dom tinh ban njauk hu sa sarak yau gauk, lagaih, samu gauk gah quy hoạch ngak nong, hu jalan cak rok khang kajap, plaih bruk mesuh gauk gah môi trường saong prein khang. Abih di nyu nan lac bruk njauk gauk dalam jalan pandar taneh hu tani tanat, suai lavik piah urang buh jien sahanang hatai buh jien tame.”

Dom thun jaik di ini, dom doanh nghiep praong buh jien tame ngak nong hu ba mai kein laba cambaih laih, ba yaom glaong saong angan je di kaya nong Việt tabiak darak pasa dunya. Min dom bruk salih bahrau siam mekre nan ka oh samu haong kein laba daok hu blaoh.

Tui Mintri ngak nong saong patagok palei pala, dalam taneh ia hu labaih 50.000 doanh nghiệp buh jien tame ngak nong, lac biak takikt duk saong abih tih labaih 900.000 doanh nghiệp daok ngak bruk. Tapa nan brei mboh, dom doanh nghiep daok buh jien tame ngak nong lac biak bier. Ong Võ Quan Huy, Yam ndok Cty TNHH Huy Long An ndom lac, quy hoạch ngak nong jeng daok peih ngak tui bhum palei, oh tani tanat, kurang bruk pambuak bhum, jeng lac sa bruk oh khang dalam dui pachreih urang buh jien tame: “Piah sa doanh nghiep praong ngak nong ye sarak taneh riya njauk hu mbuan lagaih, patui di nan lac adat hành chính, phun jien masaiy saong jalan pablei tabiak. Pagap yau Doanh nghiep huac di abih lac daok raong ikan ye kanja pablei quy hoạch ngak bruk karei, doanh nghiep meda khat lahik dalam tuk buh jien tame ngak praong blaoh. Thei jeng mboh bruk ngak nong biak kan, jien mek tame oh rilo nan ye rilo bhum palei tuk hu jalan salih bhum taneh nan ye urang ngak chip, tuk nan khat lahik lac doanh nghiệp”.

Bruk di urak ini lac cak rok patagok ngak nong di yaok bhum palei jeng hu quy hoach karei, kurang bruk ginum mayai di dom bhum palei jaik taphia. Kayua yau nan ye, bruk padang jalan ngak piah klah rabha khau tin, pambuak bhum saong pambuak dua gah di dom bhum palei piah ba gauk jhul patagok bruk buh jien tame gah ngak nong daok lac bruk biak njauk ngak.

Ong Đinh Minh Hiệp, Yam ndok So Ngak nong saong patagok palei pala TP.HCM brei thau, dalam bruk pambuak gauk nan, TP.HCM hu labik dang pasak, pachreih patagok dom tinh, ban gah maraong negar. Ban raya HCM jeng pambuak khau tin ka labik pambuak doanh nghiep negar langiu piah ba prein khang buh jien tame pambuak tal bruk padang ngak bhum pandap panda, ba brei công nghệ…tame dom bhum palei. “TP.HCM lac pasak ilamo công nghệ gam haong Cần Thơ jeng lac ban daok dalam Trung ương jeng hu kapul urang ilamo glaong. Kol dahlak caong lac tapa bruk pambuak gauk nan ngak habar  duah hu dom bruk ngak siam piah ba brei doanh nghiep, HTX jeng yau mikva urang ngak nong khik kajap dom asal kadha, jalan ba tabiak di dunya, min jeng lagaih haong dom bhum palei di drei. Dahlak sahaneng, nan lac bruk njauk ngak, bo kol drei njauk pambuak gauk ngak chip…”

Cak rok patagok ngak nong khang kajap njauk hu jalan ngak, sarak lagaih saong tani tanat. Kayua yau nan ye, jalan langyah siam lagaih abih lac pambuak hu jalan ngak, sarak di trung ương ba tame pandar tui yaok bhum palei saong yaok bhum palei njauk hu dom jalan ngak, sarak karei di drei piah pachreih bruk buh jien tame siam lagaih. Piah ngak hu ye dom bhum palei njauk hu jalan klah rabha khau tin. Tuk hu khau tin, thau hu dom caong khin di gah buh jien tame, lac gah hu mbaok tame bruk ngak ye bruk ngak mbang pablei salih dalam ngak nong meda hu kein laba siam lagaih./.