Ban raya HCM meda ba tame pandar rilo danak dak jalan mbak hu makna praong piah duh ka bhap bini

Hu mbaok di jalan Võ Văn Kiệt labik gah mala takai tatua Calmette tuk jala pandiak, khol dahlak mboh biak rilo janih radaih nao tapa labik ini. Dom janih radaih pataok cang vaih tapa gah ieu tame jalan Ký Con piah nduac tame pasak Quận 1 dui atah ngak ka dom janih radaih tapa ini nao mai biak kan kandah. Dom kapul cảnh sát jalan mbak njauk hu mbaok piah tacei ba gam gam.

Min dom harei tra, bruk nan oh daok tuk jalan tapen jalan Võ Văn Kiệt (gah hanuak, pambuak meng jalan Nguyễn Thái Học tal jalan Pasteur, Quận 1) ngak salah saong ba tame nduac. Tuk nan radaih nao tame pasak meda nao tame jalan gah hanuak jalan Võ Văn Kiệt saong nao tapak tal jalan Pasteur, plaih gaok dom janih radaih nao tapa hầm Thủ Thiêm, trun takik radaih nao mai di labik nan. Urak ini jalan hu ngak salah binah khang saong daok ngak dom bruk puac abih yau ye tuh nhựa, pala bingu phun cảnh… Dom biển báo tacei jalan jeng hu padang tagok saong daok cang ba tame pandar.

Dalam tuk nan, di labik daok ngak tatua Thủ Thiêm 2, pambuak pagam Quận 1 haong ban Thủ Đức, dalam kreih pandiak bhang di bilan hè, dom urang ngak daok kham marat ngak dom bruk puac abih yau ye padang dom biển báo, hệ thống điện, kẻ làn, pala phun hijao… Tatua hu ngak salah bruk nduac iek saong daok dalam tuk hu dom jabat chuyên môn pasang iek, taong yaom. Dom urang ngak, dom kỹ sư daok biak chrieih chrai kayua hadei di rilo kan kandah di jit ruak COVID-19 gam haong dom tavak tavaiy, tal urak ini, tatua hu ngak jaik salah piah duh ka bhap bini. Ong Vũ Mạnh Hà, Phaok Yam ndoc danak dak di Liên danh po thau padang ngak danak dak ndem lac: “Tatua Thủ Thiêm 2 lac sa dalam takik dom danak dak daok hu padang ngak oh padeih harei halei dalam abih tih tukvak rahtabiak jit praong, kuhria gam tuk jit kan kandah di abih. Tal urak ini khol dahlak jia lac dom kham marat nan jeng hu pabak brei abih.”

Tui Sở jalan mbak pajeng ba TP.HCM, tukvak lễ 30/4 saong 1/5 thun ini, langiu di 2 danak dak nan, danak dak pasiam, papraong jalan Tỉnh lộ 9 (daok ieu lac jalan Đặng Thúc Vịnh, huyện Hóc Môn) atah 5,2 km ngan haong mbaok jalan praong 30m, hu 2 jalan radaih hỗn hợp, 4 jalan radaih cơ giới jeng hu ba tame pandar. Langiu di nan, mbaok jalan Lê Lợi (Quận 1) labik meng jalan Nguyễn Huệ tal canah 4 Pasteur jeng hu bayar veik mbaok jalan hadei di 7 thun pacang veik piah padang ngak jalan metro ka 1. Hadei di tuk biyar veik mbaok jalan, labik jalan nan pambuak haong Jalan nao takai Nguyễn Huệ ngak jeng sa labik main, sambai, pablei salih chreih chrai di labik pasak ….

Ong Phan Công Bằng, Phó Yam ndoc Sở jalan mbak pajeng ba TP.HCM brei thau, langiu di dom danak dak ba tame pandar mbang ini, urak ini Sở jeng daok pambuak haong dom sở, ngành piah langyah dom tavak tavaiy pambuak tal bruk paduan ba sang danaok, peih mbaok taneh… piah ka dom danak dak hu ngak njauk tui tukvak ba tabiak: “Tukvak tapa bruk pambuak gauk ini khok dahlak hu peih ngak biak siam saong samu gauk yau 3 danak bo khol drei ba tame pandar di harei 30/4 ini jeng hu bruk pambuak gauk di dom kapul lac biak siam piah ngak samar gah ilamo saong bruk peih mbaok jalan. Min yaok danak dak jeng hu dom kan kandah, tavak tavaiy ye khol dahlak ieu kakei dom po buh jien tame saong bhian pathau khan haong UBND piah lang talaih”

Hadei di jit COVID-19, gah jalan mbak pajeng ba ban raya HCM daok pataom abih prein yava, jien padai tame jhul samar bruk ngak dom danak dak piah samar ba tame duh ka bhap bini. Langiu di dom danak dak hu ndem tal nan, bhap bini jeng biak caong tame dom danak dak biak praong, yau ye Vành đai 2, Vành đai 3, metro 1….jeng samar hu peih ngak saong ba tame pandar di anak tal piah ngak jeng jalan nao mai praong, siam, rik daong patrun bruk gar jalan saong bala di angaok jalan mbak./.

Urang lang: Thu Thao – 26/04