Ban raya HCM meda tagok biak glaong jang dalam tukvak anak tal

Peih pabah mbang veik dalam tuk jit ruak daok catang, ban raya HCM dang anak kan kandah tuk bhap bini daok biak glaih glar, kinh tế daok gaok kan kandah biak trak. Dalam 2 thun gaok kan kandah di jit praong, ban raya HCM khat lahik labaih 273.000 tỷ đồng. Tuk ban raya haong dom tỉnh gah meraong peih pabah mbang veik, Rajaei patabiak Sarak 128 salih jalan ngak meng “Zero COVID” tapa “Diukrai lagaih, salamat, sami samar pasang iek hu jit COVID-19” daong ka bruk pasiam veik di ban raya hu mbuan lagaih jang.

Tapa bruk di anak meta brei mboh, oh lac pasang iek hu jit ruak, ban raya daok brei kham merat dui tagok veik nền kinh tế hadei di jit praong meng dom sarak yaih khan, peih bruk pablei salih, jhul khang talei pambuak bruk, nao taom gaok piah samar lang talaih kan kandah ka doanh nghiệp. Di mbang họp báo brei thau ka KTXH 7 bilan akaok thun ini, Akaok UB bhap bini ban raya HCM Phan Văn Mãi khang hatai ndom lac: “Tal tukvak ini, KTXH di ban raya HCM meda lac siam veik hu samar, samu gauk, abih gah. Bruk patagok GRDP 6 bilan akaok thun mek hu 3,82%, duk haong kuhria rah tapa dalam taneh ia ye biar min ngan saong ban raya, ini jeng lac 1 bruk siam veik hu biak rilo kham merat”.

UV Bộ Chính trị, Bí thư Thành uỷ ban raya HCM Nguyễn Văn Nên mboh lac, bruk ngak hu dalam tukvak tapa, lac jalan piah ka ban raya TP patagok kinh tế, tani tanat xã hội, paglaong raidiuk di bhap bini, lac takai yam biak siam tuk camereip piah kham merat ngak hu dom bruk ba tabiak di thun 2022 saong vaktu 2020- 2025. Tapa nan jeng brei mboh ka hatai khang oh salih karei dom bruk ba tabiak di thun 2022 bo ban raya hu pilih ruah meng akaok thun lac biak njauk. Ong Nguyễn Văn Nên lac: “Meng hatung hatai kol dahlak mboh lac brei kham merat rilo jang, patagok ilamu meng kan, jum pataom gauk, sami samar, sahneng duah bahrau, anit ranam gauk, khang hatai ngak abih drei, dak padang saong patagok ban raya HCM dak harei dak patagok, raidiuk di bhap bini dak harei dak hu paglaong. Saong tuk halei jeng sahneng lac, ban raya HCM kayua taneh ia, gam haong taneh ia”.

Bahrau ini, dalam mbang ngak bruk di ban raya HCM, Tổng Bí thư Nguyễn Phú Trọng tadhau ayuh saong taong yaom glaong dom kham merat saong dom bruk bo Đảng bộ, karja saong bhap bini ban raya HCM ngak hu. Dalam tuk bruk dalam taneh ia saong dunya hu rilo kan kandah, ban raya kham merat khik ramik, pasiam veik, patagok kinh tế mek hu glaong di abih dalam prein meda ngak hu.

Tui dom chuyên gia kinh tế, dom bruk ngak hu siam di ban raya HCM tukvak tapa brei mboh lac, dom jalan ngak bo Rajaei saong ban raya ba tabiak ngak, nyu patagok hu kein lagaih. Dom bruk ngak hu di thun ini, meda lac jalan piah ka ban raya patagok jang dalam thun hadei. Bruk brei hu dom sarak karei ka drei, glaong jang piah ka ban raya patagok hu abih prein khang daok kandauk dalam. Biak di nyu yaom lac ban raya hu dom takai yam tagok biak glaong, min daok suai jang duk haong dom labik karei. Makna lac kayua COVID-19 nyu ngak brei rilo urang ngak nao palei plaih jit saong duah hu bruk ngak bahrau, tani tanat di palei. Tiến sỹ kinh tế Võ Trí Hảo mboh lac: “Ban raya HCM njauk ngak jeng sa pasak gah jien padai, ilamu công nghệ glaong, oh njauk lac ngak taong abih. Dom janih karei yau ye takhaok kalik, jhik, menyim, công nghiệp..., dom janih ieu lac low-tech (công nghệ biar) njauk caik ka dom đô thị vệ tinh ngak. Drei jeng mboh lac yaok janih daok rah tabiak siam mekre, tok hu bruk lac nyu oh chreih chrai yau dahlau daih, nan jeng lac bruk oh hu hagait piah ndom”

Saong meng ilamu meng kan “gah Meraong nao dahlau mai hadei”, “ban raya HCM kayua taneh ia, gam haong taneh ia”, tantu ban raya HCM meda tagok biak glaong jang dalam tukvak anak tal, piah daok khik kajap bruk lac akaok kapal di taneh ia./.

 Urang lang: Mousa Phương – 04/10