Tui chuyên gia kinh tế, piah mek hu jalan ba tabiak patagok di thun ini ye dalam quý 2, GRDP di Ban raya njauk mek hu 2 laik. Min, bruk ngak mbang, pablei salih di doanh nghiep daok gaok kan kandah. Tapa pasang iek di Kapul doanh nghiệp TP.HCM, urak ini hu tal 51% doanh nghiệp trun jien mek tame saong 62% doanh nghiệp trun kein laba. Dalam nan, dom pandap panda daok kadaong labaih dalam kho di doanh jieng tagok labaih 41%.

 Ong Nguyễn Ngọc Hòa, Akaok Kapul doanh nghiệp TP.HCM brei thau, pandap panda daok kadaong labaih, bruk ngak trun rilo di dom gah ngak praong, yau ye gah jhik menyim, kalik takhaok, ngak pandap kayau... Daok darak pasa dalam taneh ia, prein blei jeng suai kayua bruk ngak, jien mek tame di rilo urang ngak trun, nan ye bruk cai pandar jeng kuhri kuhria saong patak pataom jang. Anak dom kan kandah ini, ong Nguyễn Ngọc Hòa caong lac: “Daong ka doanh nghiep peih bruk pablei salih, danak dak khuyến mãi, jhul khang bruk pablei salih dalam taneh ia. Kol drei njauk roh duah, brei patrun dom janih je,  pagap yau trun jien je trước bạ…daong patrun jien sahui dalam bruk pajeng ba, pablei salih pandap panda.”

Daok tui ong Phạm Bình An, Phó Akaok Viện Roh duah cak rok patagok TP.HCM ye Ban raya njauk jhul khang bruk peih ngak samar bruk đầu tư công di tukvak anak tal. Dalam nan, Ban raya njauk samar drah ngak salah adat hukum piah peih ngak Sarak 98 di Quốc hội ka ngak iek dom jalan ngak, sarak karei cak rok patagok TP.HCM piah samar drah patagok kein lagaih, taoh talaih dom kan kandah dalam bruk peih ngak đầu tư công, jhul  patagok kinh te dom bilan puac thun: “Đầu tư công ye phun jien hu parabha brei blaoh paje, bruk praong abih lac dom adat tavak tavaiy abih di urak ini lac bruk peih mbaok taneh saong taneh riya. Meng dom adat bahrau dalam Sarak 98, tuk peih ngak asal kadha ini meda lang talaih dom kan kandah di urak ini ka bruk peih mbaok taneh. Pagap yau dalam sarak ini brei neh tabiak dom danak dak peih mbaok taneh tabiak karei ye meda jhul khang hu jalan peih ngak di danak dak”.

 Taphia di nan, piah daong ka doanh nghiệp duah đơn hàng pablei tapa negar langiu saong duah darak pasa bahrau, Sở Công thương TP.HCM daok jhul khang bruk pachreih pablei salih. Ong Lê Huỳnh Minh Tú - Phó Yam ndok Sở Công thương TP.HCM brei thau: “Dalam tuk karei drei tok hu khuyến mại 50%, min mbang ini khuyến mại pataom tame ngak praong nan ye tanut khuyến mại tagok 100%. Bruk kol dahlak peih nyaom biai pambuak cung cầu, dom bruk ngak pachreih pablei salih karei piah daong ka doanh nghiệp cak rok patagok darak pasa dalam taneh ia”

Meng dom jalan ngak samar drah di TP.HCM, gam haong bruk siam lagaih di darak pasa dunya tuk pandap panda daok kadaong labaih dalam kho daok trun saong lạm phát hu trun “pandiak” meda ba mbuan lagaih piah ka Ban raya mek hu bruk ba tabiak cak rok patagok kinh te dalam thun 2023./.