Langiu di yaom biar oh ka bhian mboh yau nan, dom po bein daok having akaok haong bruk oh hu labik pablei. Kadha vak “baoh rilo pablei oh abih ngak brei cam sành di Vĩnh Long laik yaom” di urang vak Bá Dũng hu ba tagok báo Nhân dân điện tử. Da-a mikva saong taong abih gauk tui pang.

Dom thun jaik di ini, huyện Trà Ôn, tỉnh Vĩnh Long hu maong lac “pasak cam sành” di miền Tây, kayua taneh pala di labik ini tagok tal jaik 10.000ha. Urak ini, yaok rabau héc-ta cam daok tasak min oh hu menuac mai blei, ngak ka rilo po bein mbang ndih oh jeng. Dahlau di Tết Nguyên đán, yaom cam trun tagok meng 8.000 tal 10.000 đồng sa kg, min rilo po bein oh pablei, caik veik cang yaom tagok glaong ngak ka baoh cam taha nao oh daok bingi.

Ong Huỳnh Văn Sang hu angan lac “tỷ phú cam sành” di xã Vĩnh Xuân, huyện Trà Ôn, khan lac: “Meng puac bilan 11, akaok bilan 12 thun blaoh, yaom laik gam gam, meng 17.000 đồng sa kg daok oh ka tal 5.000 đồng sa kg; urang blei salih takik blei, tok pablei hu 1 dalam 10 sản lượng, nan ye kol dahlak caik veik baoh cang tapa Tết. Urak ini, cam tasak kanyik abih phun min urang blei salih jeng blei takik”.

Ong Nguyễn Văn Thắng – Akaok Kapul urang ngak nong xã Vĩnh Xuân, huyện Trà Ôn brei thau, dalam xã hu 2.242ha taneh pala phun mbang baoh, dalam nan cam sành hu 1.666 ha. Meng dahlau thun 2010, cam pablei hu yaom, hu tuk tagok tal 35.000 sa kg ngak ka menuac urang ba gauk pala cam. Urak ini dalam huyện Trà Ôn hu labaih 9.560 ha cam sành, meblah jaik 44% taneh ngak nong di huyện.

Tui Sở Ngak nong saong Patagok palei pala tỉnh Vĩnh Long, phun cam sành lac sa dalam dom janih phun mbang baoh cakrok rilo abih dalam tukvak tapa, kayua dalam rilo thun, yaom cam sành tani tanat di tanut glaong (kuhria rah tapa, yaom labaih 10.000 đồng sa kg). Gam haong nan, po bein pandar ilamu pala bahrau nan ye năng suất cam sành tagok meng 70 tal 100 tấn sa ha.

Meng năng suất glaong gam haong yaom pablei siam nan ye urang pala cam sành hu laba glaong, meng 300 tal 500 triệu đồng yaok ha yaok thun. Nan lac makna ngak ka rilo menuac ba gauk pala cam saong pah rilo taneh jang, hu gam taneh ngak padai, piah pala cam sành. Urak ini, dalam tỉnh Vĩnh Long hu labaih 17.000ha cam sành, rilo jang jaik 3.000ha duk haong thun 2020.

Ong Nguyễn Văn Liêm, Phaok Yam ndok Sở Ngak nong saong Patagok palei pala tỉnh Vĩnh Long brei thau, dalam ngak nong jeng yau dalam bruk pala cam sành, gah ngak nong tuk halei jeng sangka tacei pato ilamu kỹ thuật ginup abih yaok thun brei ka urang ngak nong tapa dom mbang pato, pasram, ginum biai, brei thau yaom kaom pandap panda kaya nong... Min kayua kein laba di anak meta meng bruk pala cam sành dalam tukvak tapa lac biak glaong, nan ye rilo mikva “nduac” tui phun pala ini.

Anak meta mboh lac, piah salih janih phun pala, urang nong tuk halei jeng pilih ruah phun hu kein laba glaong di anak meta. Cam sành lac janih phun mbuan pala, lagaih haong rilo janih taneh nan ye hu urang nong pala rilo. Duk haong quy hoạch hu UB bhap bini tỉnh Vĩnh Long mbaoh tangin brei ngak ye taneh pala cam sành di dalam tỉnh yam tapa labaih 30% mbaok taneh. Urak ini, dom po bein pala cam di Vĩnh Long gaok kan kandah dalam bruk pablei, rilo meng lac dom sang bahrau pala mbang camereip, phun hu jaik 2 thun, daok tabiak baoh mbang camereip...

Langiu di nan, cam sành lac janih baoh tok pablei dalam taneh ia saong daok njauk meriak gauk haong rilo janih cam blei meng dom taneh ia. Cam sành urak ini tok lagaih piah mbang that, kan ba tame chế biến công nghiệp nan ye jeng gaok kan kandah ka bruk pablei. Meng bruk urang nong ba gauk pala rilo tui hatai yau tukvak tapa, ngak brei sản lượng cam sành kandaong labaih, ba tal laik yaom, ngak brei khat lahik ka urang pala. Tapa nan, caik ka karja dom pakat saong gah chức năng di Vĩnh Long brei patagok khik iek di karja ka bruk salih janih phun pala, anak meta lac ngan saong phun cam sành../.