Tuh kadung kanduh lon, kalaok katak tame labik pak meta pacang vil val meng halam pasei hu tabung pacang, urang likei dam angan Nguyễn Chí Tâm, daok di palei Đắk Ri, xa Tân Thành, bui sambai brei thau: ini lac “Baoh sang 100 dong” kayua kapul dam dara padang ngak. Meng yaok kanduh lon hu yaom 100 dong, dam dara dalam xa pataom ngak jieng kadung jien daong ka dom urang kan kandah:

 “Drei nao pataom nhom nhua di urang tui jalan “pataom sit jeng praong”. Saong drei jeng jak ba dam dara daok di palei dalam xa ba gauk ngak piah meda daong mikva hu dom thau dom”.

 Bruk pataom nhom nhua klaak di kapul dam dara xa Tân Thành hu urang taha, urang sit pachreih tui biak rilo, ngak jeng bruk bhian randap siam dalam bol bhap. Chreih chrai haong dom dam dara palei Đắk Ri nao pataom nhom nhua, urang dalam kapul Đặng Văn Hiếu, bangsa Dao brei thau, dom bruk ngak di dam dara yau Harei adit hijao, bilan he halan hatian, padang mblang me-in ka uranaih…hu daong ka dom dam dara diukrai hu siam mekre jang:

 “Dahlau di abih lac bui sambai, ka dua lac hu makna siam gheih. Dahlak hu taom gaok, ndom biai nao mai haong rilo menuac urang nan ye ndom puac daok dang hu siam mekre jang”.

Sa-ai Đặng Phúc Xuân, Bi thu kapul dam dara xa Tân Thành brei thau, “Baoh sang 100 dong” pataom kanduh lon, nhom nhua klaak hu kapul dam dara xã peih ngak meng bilan 4/2022 di labik pasak xa. Taduan hu bruk hu mbaok tame di rilo rahra, bruk ngak ini samar drah hu peih praong tabiak taong abih labik dalam daok di rahra. Hadei di dom bilan, tuk “sang” hu pataom bak, dom nhom nhua hu ba nao pablei mek jien padang kadung jien daong ka uranaih kan kandah, alin hadiah khan aw, tapuk siphau, the bao hiem y te ka anek saih sang kathaot, daong phun jien ka dam dara sang kathaot patagok bruk ngak mbang. Sa-ai Đặng Xuân Phúc, khan lac:

 “Ngak hu kadung jien nan piah sa thun kol dahlak alin hadiah pandap 4 mbang di tuk Tet Nguyen dan, tet uranaih, harei tame thun bac bahrau saong harei trung thu. Hadei di nan taduan hu bruk daong di rilo rahra nan ye kol dahlak padang hu hasit kadung jien ka dam dara masraiy oh mek jien laba piah blei pajaih phun pala patagok bruk ngak mbang.”

Tui ong Trần Doãn Hiếu, Pho Akaok UBND xa Tân Thành, “Baoh sang 100 dong” lac hatai sahneng di kapul dam dara, bruk ngak sit min hu makna praong hu pambak tabiak rahra, ngak jeng bruk bhian randap patak pataom saong daong khik pacang alam langik tasik. Gam haong kapul dam dara, kapul urang kamei dalam xa hu padang bruk rik pataom phun jien daong gauk ngak sang, patagok bruk ngak mbang di sang saong taduan hu bruk chreih chrai hu mbaok tame di rahra. Ong Trần Doãn Hiếu khan lac, dom bruk ngak pambuak pagam haong bol bhap hu ba mai rilo siam lagaih di xa hu jaik 2/3 rahra lac urang bangsa takik:

 “Ini jeng lac jalan pathau khan jak ba biak gheih, gam ngak gam ba jalan ngak, sarak di Ndang, Karja mai tal yaok urang dalam kapul, urang doan saong taong abih rahra, meng nan rahra jia tame saong anit ranam jang he thong chinh tri di xa. Abih di nyu nan lac dom kapul hu pambuak khang haong rahra, lac tangin pambuak atah di Ndang Karja mai tal rahra”.

 Bruk njauk hatai di rahra hu daong ka xa bhum atah bayah Tân Thành mek hu 16 asal kadha Palei pala bahrau. Mikva 7 bangsa dalam xa daok buh prein sa hatai haong karja padang palei pala bahrau, kham merat tal abih thun 2025 mek hu angan palei pala bahrau./.