Kapol Van hoc nghe thuat dom bangsa takik Ban raya HCM hu labaih 250 urang, ngak bruk di dom gah yau ye: gah ilamu nghe thuat di bangsa Cam saong Khmer; dom gah Cih thaot, Thoat binguk, akayat Lo, cih huroh Thư Pháp, ariya, daoh tamia, daoh take kich bhap bini Lo. Sa-ai Mah Ghiem - urang dalam Dhar Kapul Van hoc nghe thuat bangsa Cam brei thau: “Ban raya HCM lac labik biak sambai suka, biak ralo bangsa min brei hu bruk taom gauk di dom urang van nghe si…”

Piah pabak ka bruk khik ramik saong patagok yaom glong ilamu bangsa, padang bruk jum pataom dom bangsa takik di Ban raya HCM, pataom urang piah patui veik, Kapol tuk halei jeng sangka paglong asar kadha saong jalan ngak bruk. Kapol khik hu siam bruk pabak, patagok kapol urang van nghe si, abih di nyu nan lac urang ranaih umo, tapa dom mbang pakacah paneh kadha birau, tal bac cih thaot, cih thư phap, thaot binguk saong pasram daoh tamia, kadha daoh bangsa Lo; tal bac akhar Cam, tal bac akhar huroh saong ilamu Khmer…

 Dom thun jaik di ini, Kapol hu peih bruk brei ka dom urang hoi nao rivang iek, labik paneh kadha cih vak, nao rivang dom labik yau: Glai Rừng Sác di Cần Giờ, palei Wa Ho, rivang kubo Đại tướng Võ Nguyên Giáp; rivang dom labik inem krung urang Cam di Ninh Thuan, Bình Thuận…Tapa dom mbang nao rivang nan, oh lac hu daong ka dom urang hoi sahaneng dalam jang ka bruk ngak cách mạng, ilamu mbak carak di dom bangsa, pambuak khang kajap bruk anit ranam gauk, daok ba pachreih chrai ka urang hội, văn nghệ sĩ paneh tabiak kadha akayat. Urang hu pataom  tame dalam bruk daok rah tabiak saong paneh tabiak rilo kadha siam gheih.

Tiến sĩ Phú Văn Hẳn, Phó akok Kapol VHNT dom bangsa takik di TPHCM khan lac: “Kapol VHNT dom bangsa takik Ban raya HCM pataom hu ralo urang takre ilamu bangsa, dom van nghe si, dom tri thuc, dom urang roh duah ilamu bangsa diukrai saong ngak bruk di Ban raya HCM. Urang hu rik prein yawa tame bruk roh duah, pataom mek, khik ramik , yaih khan ilamu, van hoc nghe thuat dom bangsa takik di Ban raya HCM. Kapol daok duah pataom, hu rilo kadha brei mboh dom siam gheih ilamu dom bangsa takik”.

Meng thun 2017 mbiah tal ini, Kapol hu buh prein tame paneh tabiak labaih 30 kadha birau nan lac akayat, ariya, my thuat, thaot binguk. Dalam nan, hu dom kadha roh duah pataom hu, yaih khan  ilamu meng kan di dom bangsa yau: “Ilamu urang Cam di Ban raya HCM”, “ Le hoi Đôn -Ta di urang Khmer”, abih di nyu lac rilo kadha paneh tabiak ngan haong angan “Bac megru saong ngak tui jalan sahaneng, jalan diukrai di HCM” dalam nan hu “ Baoh tapuk ariya Thư Họa - Nhật ký trong tù di CT Ho Chi Minh”, “Urang Cam ngan haong Wa Ho”…hu dom gah pambuak tal di T.Ư alin brei giải thưởng. Kapol daok daong pabak, yaih khan dom kadha di dom van nghe si, pachreih dom urang hoi roh duah birau peih tabiak jalan nao birau lagaih haong bangsa  piah ba drei tame raidiuk xa hoi daok cak rok patagok yaok harei.

Sa-ai  Thạch Na-Ry urang dalam Dhar Kapol Van hoc nghe thuat bangsa Khmer khan lac:“ Hu tame Kapol, dahlak hu bac da-a, klak rabha ka gauk panuac ndem, akhae huroh, lagaih piah yiah khan ilamu di bhap bini drei. Dahlak biak bui sambai saong chreih chrai ka bruk ngak di Kapol”

Yaok dhar kapul hu bruk ngak karei di gauk piah khik ramik ilamu bangsa drei, patagok ilamu bangsa dalam ilamu di taneh ia, yau: Peih tal pato cih thư pháp, pato sap Lo oh mek jien; pato daoh, tamia ilamu meng kan di bangsa Lo; tal bac sarak bingu la di bangsa Khmer; tal bac tamia Hương Champa…Langiu di dom bruk ngak chuyen nganh, kapol van nghe si dom bangsa takik tuk halei jeng kham merat ngak bruk halan hatian yau peih tal bac thư pháp, sap Lo piah rik tame kadung jien daong anek saih kan kathaot, jaoh jo, rik daong urang bhum gaok bala meng langik tasik…Yaok thun, Kapol urang hu alin pandap ka dom urang abih drei daong ka bruk paneh kadha birau, hu kadha gheih abih. Meng nan, rik dong sumu pachreih dom urang hoi,  pabak prein khang daong ka urang roh duah paneh tabiak rilo kadha birau, patagok dom ilamu meng kan di dom bangsa takik di Ban raya HCM./.