Urak ini, ia mbăk 4‰ njaom tame tal tỉnh Bến Tre ndaoh di pabah kraong meng 44 - 53km; độ mbăk 1‰ njaom tame ndaoh di pabah kraong meng 52 - 70km. Di huyện Chợ Lách, angaok kraong Hàm Luông saong Cổ Chiên ia mbăk jaik 3 phần nghìn njaom tame kraong praong tal xã Hòa Nghĩa saong Long Thới, Hưng Khánh Trung B, độ mbăk jaik 2 phần nghìn daok nao tal xã Tân Thiềng, 1,4 phần nghìn tal xã Phú Sơn, glaong jang tukvak ini thun blaoh.

Anak bruk nan, UBND huyện Chợ Lách hu ba tabiak 4 jalan ngak piah pacang, dalam nan iek praong bruk mek ia taba tui yaok mbang ia ndik, tagok bruk khik piah ia taba, peih bruk kuac raok gluh baok dom ribaong, danao, bingun, jak ba ngak labaih 200 nắp cống khik ia taba.

Ngan saong huyện Chợ Lách, bruk pabak ia taba ka pala phun pajaih, bingu kiểng anak bruk mbuan njaom mbăk lac bruk njauk ngak chip. Dom thun tapa, rahra thau caga dahlau dalam bruk kuac raok yaok ratuh ribaong, bingun padang ia taba pabak hu ia pala drak dalam sa bilan. Ong Bùi Văn Lập, urang ngak nong daok di xã Vĩnh Thành, huyện Chợ Lách brei thau:“Ka sa lac drei hu bingun, hu danao, hu ribaong  drei pacang sa cống karei piah padang ia. Danao ini padang hu labaih 3000 mét khối, blaoh gah langiu padang ia tra, meda pruh hu 1 bilan”.

Di huyện Mỏ Cày Bắc, tỉnh Bến Tre, ia mbăk meng tasik jeng daok nduac mai. Bruk pacang mbăk, khik taba daok hu karja saong rahra ngak khang piah khik siam mekre ka bein phun mbang baoh, ka labik pala phun pajaih. Amuk Nguyễn Thị Vinh, xã Hưng Khánh Trung A khan lac: “Thun ini bruk pala phun pajaih di urang nong kan kandah lo, tok hu ngin yuk lac hala thu layau, oh ndom hagait tal bruk kurang ia. Drei hu khik piah ia min oh ginup, tal bilan 3 ye blei ia meng sà lan pajeng mai. Phun pajaih durian gaok ia mbak lac matai, oh diuk hu”.

Mbuan lagaih dalam bruk pacang caga mbăk njaom tame dalam thun ini di Bến Tre lac dalam tỉnh hu jaik 1.700 cống pacang mbăk hu pacang sre., pacang ia mbăk njaom tame ribaong dalam mblang hamu. Meng hu yau nan, bo labaih 8.000 ha padai Đông Xuân di huyện Ba Tri, Giồng Trôm thun ini biak njauk, pablei hu yaom. Ong Phan Thanh Sang, Phaok akaok UBND xã Mỹ Hòa, huyện Ba Tri, lac:“Padai ye dalam xã mikva ngak hu 350ha, urak ini daok caga yuak. Padai hu năng suất tani tanat, hadei di tuk hu pacang sre oh daok mbăk njaom tame, mikva sahanang hatai pala drak. Mikva urang ngak nong di xã Mỹ Hòa bac megru ilamu meng dom mbang ia mbăk dahlau jeng daok khik ia hajan, tuk abih hajan ye khik ia taba piah pala drak, raong glang”.

Urak ini bruk mbăk njaom tame daok rah tabiak srau kadau, bruk pacang haong bala meng langik tasik daok hu dom gah, dom pakat saong bhap bini ngak khang. Ong Trần Ngọc Tam, chủ tịch UBND tỉnh Bến Tre brei thau lac biak sangka tal sang mac ia Xuân Đông, kayua ini lac sang mac ia praong di tỉnh ba ia ka dom labik ngak kong. Bahrau ini, tỉnh jeng brei ngak baoh đập Cái Cỏ khik kajap bruk pabak ia ka domlabik ngak kong, khik ginup ia ka dom sang mac ia praong ngak bruk.

Meda ndom lac bruk pacang ia mbăk di tỉnh Bến Tre urak ini daok hu ngak khang, samar drah, meng dom jalan ngak cambaih laih tui njauk bruk daok rah tabiak di palei li-u, haong bruk hu mbaok di taong abih hệ thống chính trị. Tapa nan jia lac, Bến Tre meda trun hu khat lahik tal tanut biar di abih dom bala meng langik tasik./.