Bến Tre daok peih ngak catang, ngak samu gauk dom jalan ngak, pataom tukvak tabung glaong 180 harei ngak bruk pacang caga taong cap kaya ikan suan adat hukum, oh pathau khan saong oh tui adat (IUU). Kadha vak di urang vak Nhật Trường hu ndem ka bruk ini.

 Tỉnh Bến Tre  thau cambaih bruk ngak di anak mata saong bruk ngak di dom jabat, kapul nyaom, dom puk palei ka pacang caga taong cap kaya tasik oh tui adat (IUU), lac ngak pasiam tui dom panuac kakei di Ủy ban Châu Âu (EC), brei padeih abih bruk gilai taong ikan lih tame bhum tasik negar langiu piah caong hu taoh talaih “the kanjik” di Ủy ban  Châu Âu (EC).

  Tỉnh peih ngak biak catang jalan ngak 180 harei di Rajaei, di tinh ka bruk pacang taong cap ikan oh tui adat (IUU). Iek tui bruk di anak meta, yaok palei brei padang jalan ngak cambaih laih, parabha bruk ka nyu cambaih menuac, cambaih bruk. Tinh kham marat dalam 3 bilan tal meda ngak salah dom harak gar pambuak tal bruk pacang taong cap kaya tasik oh tui adat (IUU). Dom kapul hu pambuak tal njauk pataom tame pasang iek, pathau khan, jak ba piah peih ngak hu dom bruk tut angan, đăng kiểm gilai ikan; pasang iek catang gilai tame tabiak pabah lamnge. Ong Lê Đức Thọ, Bí thư Tỉnh ủy Bến Tre brei thau:  “Urak ini kol dahlak daok hu mbaok tame ngak biak catang dalam dom bruk ini, ngak habar kol drei pacang cakak saong padeih abih bruk urang taong cap kaya ikan di bhum tasik oh njauk haong dom adat. Gam haong nan jeng brei ngak njauk tui dom pato tacei di Rajaei piah peih ngak dom jalan ngak, piah kol drei anak tal hu taoh talaih “the kanjik”.

Urak ini, Bến Tre bahrau mboh tangin tame danak dak “Canh sat tasik nao gam haong urang taong ikan”, dalam nan hu bruk pambuak gauk pacang caga oh ngak tui adat (IUU). Trung tướng Bùi Quốc Oai, Bí thư Đảng ủy, Chính ủy Cảnh sát tasik Việt Nam ndem lac: “Jaik di ini, kol dahlak gam haong Bến Tre nao pasang iek bhum tasik tapen negar di Việt Nam- Malaisia – Thái Lan piah ka dom urang ngak praong pan akaok tỉnh mboh cambaih bruk di gah nan, piah hu jalan tacei pato dalam tukvak anak tal. Kol dahlak jia lac meng bruk ngak di tỉnh saong hatai kham marat di gah cảnh sát tasik dalam tukvak anak tal, dom jalan ngak, dom asal kadha hu peih ngak meda mek hu siam lagaih”.

Lac labik hu 65 km takai tasik saong hu bruk taong cap kaya ikan meng lavik rai, tỉnh Bến Tre daok kham merat ngak dom jalan ngak, dom bruk ba tabiak pacang caga ngak suan, oh tui adat (IUU), nduac pakacah haong tukvak piah peih ngak 180 harei ngak bruk piah taoh talaih “the kanjik” tui jalan abih drei ka bruk ngak, kham marat glaong saong jia lac meda peih ngak bruk ini hu siam lagaih, hu jak jeng./.