Sang amuk Ngưu Thị Hạnh, umo 60 thun, daok di ấp Nước Vàng, xã An Bình, huyện Phú Giáo, tỉnh Bình Dương daok dalam baoh sang biak kathaot. Thun 2003, karja palei brei 1,5ha taneh piah pala drak, sang amuk meng tabiak truh bruk nao gam daok sang mikva jaik taphia dalam palei. Harei nao ngak pah, melam mai diuk pasang amuk caoh rok taneh bein, pala bei saong raong pabui, limo. Meng tari tarieng, oh huac glaih glar, tal harei ini, sang amuk patak pataom hu jien blei hu taneh pala cao su, 8 urang anek hu bac ta-a saong hu bruk ngak tani tanat. Amuk Ngưu Thị Hạnh khan lac:“Tuk nan dahlak saneng dalam hatian lac rilo menuac – bui sambai -  mbang abih rilo min tok tai nyu drei njauk van rup drei piah ka anek bhik hu baoh akhar huroh. Dahlak pachreih dom anek, jhui sahneng hagait, kham merat bac ka nyu tal labik tal dhua nan ka amaik ame bui paje. Urak ini, dom anek di dahlak bac tamat blaoh saong hu bruk ngak, hu hadiuk hu pasang nan ye biak uan tabuan, oh thau ndom yau habar ka nyu abih " 

Jeng lac urang bangsa Khmer saong mai xã An Bình meng thun 1960, sang ong Ngưu Bư hu rai diuk kaya meda jang sang amuk Hạnh tuk daok hu taneh peih balau piah ngak padai. Hadei di nan, ong hu urang jakar tacei pato ilamu nan ye salih tapa pala amariak kalu, pa-aok blait, cao su. Pala phun kong nghiệp abih takik khak, takik pren mong iek bo jien mek tame glaong jang nan ye ong Bư hu jien blei taneh paraba ka 4 urang anek, yaok urang 1ha, diuk pasang ong khik veik 2ha piah raong rup taha. Langiu di nan, lac urang hu angan je dalam bhap bani Khmer, ong Ngưu Bư hu jak ba mikva kham merat piah ba gauk tabiak truh kan kathaot, ngak kaya meda:“Dahlak ndom lac taneh bo Karja brei, mikva njauk khik piah pala drak piah tabiak truh kathaot. Dahlak biak uan tuk karja sangka nan ye jeng klaak tukvak, prein yava tui iek mikva, gam daong ka mikva ngak mbang cak rok patagok kinh tế sang dak harei dak siam jang. Meng bruk dahlak hu pato pathram nan ye hu tacei pato mikva raong glang, pala drak mek hu năng suất glaong"

Dalam xã An Bình, huyện Phú Giáo urak ini hu 266 sang urang bangsa takik ngan haong jaik 1.100 urang, ta-eng mikva Khmer hu 250 baoh sang haong 996 urang, dalam nan hu 2 sang kathaot lac urang taha, daok sa drei. Amuk Bùi Thị Thúy Thơm, Phaok akaok UBND xã An Bình brei thau, bruk paglaong akaok saneng ka anek kamuan urang bangsa takik lac bruk biak prong piah daong ka mikva salih bahrau rai diuk, urang jarka xã hu “nao tal yaok canah jalan, taih pabah mbang yaok baoh sang” pachreih ba dom adei tame sang bac. Tal urak ini, anek saih lac anek kamuan urang bangsa takik nao bac đại học, cao đẳng, megru bruk ngak biak rilo. Hadei di tuk bac tamat, dom adei mai gilac veik puk palei piah ngak bruk:“Dom anek kamuan urang bangsa takik nao bac dom pakat bac biak rilo, ilamu jeng hu patagok. Bac đại học blaoh, jaik abih dom adei mai gilac veik puk palei piah ngak bruk saong hu xã, huyện, tỉnh daong palaghaih ka dom adei ngak bruk. Urak ini, ngan haong dom sang bac di xã An Bình ye sang bac halei jeng hu gru pato lac urang bangsa takik mai dang pato."

Rai diuk di mikva urang bangsa Khmer di xã An Bình, huyện Phú Giáo hu tani tanat meng pandap panda tal hatai sahneng, yau nan min mikva jeng biak caong khin hu bruk sangka daong ba di dom pakat karja, dom ban ngành, kapul nyaom piah yam tagok glaong jang, oh daok thei gilac veik haong kan kathaot. Anak bruk yau nan, tukvak anak tal, ngan haong dom baoh sang daok kan kandah ka sang daok meda hu huyện Phú Giáo jak ba, buh jien karja tabiak piah padang ngak sang alin brei; peih tal pato bruk ngak ka urang ngak di palei pala, daong jien ndo ka mikva nao bac. Gam haong nan, peih ngak dom bruk daong ka mikva khik ramik ilamo. Ong Nguyễn Tuấn Vinh, Phaok chánh văn phòng UBND huyện Phú Giáo ndom lac:“Yaok thun huyện jeng hu peih dom bruk ngak bui, me-in sambai, daoh tamia, the thao ka mikva bangsa takik hu mbaok tame ma-in. Bahrau ini, huyện hu peih ngak Harei pataom ilamo – the thao bhap bani bangsa takik di tỉnh, mikva biak chreih chai, hu mbaok tame ma-in. Dalam huyện jeng hu padang ngak baha di urang Khmer, tuk lễ, tết di urang Khmer ye urang pal akaok huyện hu mai rivang, tadhau ayuh”

Bruk jak jeng ini mek hu mai meng bruk karja samar pasang iek, brei taneh ka dom sang kan kathaot, tacei pato palih ruah phun pala, anek athur raong ka nyu laghaih. Gam haong nan lac bruk kham merat, khang hatai di mikva bangsa takik dalam bruk yam tagok tabiak truh kan kathaot, oh daok pagam pambak tame sarak di karja./.