Rilo sang urang bangsa takik daok di xã Đăk Tơ Re eng drei halan hatian likau tabiak truh angan sang kan kathaot

Mai tal xã Đăk Tơ Re (huyện Kon Rẫy, tỉnh Kon Tum) sa xã kan kandah hu labaih 1.300 sang, dalam nan hu jaik 500 sang kan kathaot, bruk ngak mbang duah jien di mikva pak ini rilo meng lac ngak nong, jaik abih mikva jeng daok gaok rilo kan kandah. Yau nan bo rilo sang bhap bini bangsa takik dalam xã halan hatian ngak harak likau tabiak truh kan kathaot. Yaom lac jeng thau, tabiak truh angan sang kathaot ye sang oh daok hu mbang tui dom sarak daong jien điện, bảo hiểm y tế… min urang halan hatian ba gauk ngak harak likau tabiak truh angan sang kathaot.

Sang sa-ai A Thinh (umo 51 thun, daok di palei 8 xã Đăk Tơ Re) hu 7 urang anek, bruk ngak mbang duah jien pagam pambak tame 3 sào bei plom, 3 sào padai haong labaih 800 phun cà phê. Sang sa-ai tok ginup mbang, min sa-ai jeng likau tabiak truh sang kathaot, haong hatai sahneng lac, drei daok prein ngak bruk, oh khin pagam pambak tame Karja.

Dreih yau nan, diuk pasang sa-ai Y Nghiệp (umo 29 thun, daok di palei 5, xã Đăk Tờ Re) urak ini daok haong 2 urang anek dalam baoh sang tok praong jaik 30m2. Baoh sang ini dom thun dahlau hu karja daong ngak brei. Sang sa-ai Nghiệp hu 1ha bei plom saong 1 sào padai. Salah bilan padai blaoh, diuk pasang sa-ai njauk nao ngak mbang pah piah hu jien mbang cai tapa harei. Meng hatai sahneng lac drei daok ranaih, daok hu prein ngak bruk, nan ye diuk pasang sa-ai Nghiệp likau tabiak truh kathaot, caik bruk daong, bruk mbang tui dom sarak di karja brei veik ka dom urang taha, urang jaoh jo saong kan kandah jang drei.

Oh njauk lac dom baoh sang urang bangsa takik eng drei halan hatian ngak harak likau tabiak truh kathaot bo sang sa-ai Phạm Quyết Chiến, njauk jaoh jo 2 gah takai meng sit mai, hu 2 anek sit, raidiuk daok kan kandah jeng halan hatian ngak harak likau tabiak truh kathaot. Oh caik ka bruk kan kandah kateik trak dua gah bara di drei, sa-ai Chiến ngak biak rilo bruk yau ye phụ hồ, bốc vác, ngak puh… thei pah hagait ye ngak nan piah duah jien raong dom anek mbang bac.

Sa-ai Chiến khan lac, sang sa-ai hu mbang tui sarak sang kathaot meng thun 2017 saong hu karja daong phun jien meng sraiy yaom laba lap, daong pajaih phun pala, athur raong, daong palagaih cakrok kinh tế… Meng kham merat ngak mbang di sa-ai saong hu bruk daong di karja, kinh tế sang sa-ai jeng hu mbiah ginup. Urak ini, sang hu 1ha bei plom, 1ha cao su saong 5 drei limo menek.

Tui ong Huỳnh Quốc Thái - Chủ tịch UB bhap bini xã Đăk Tờ Re, huyện Kon Rẫy, thun 2019-2020, dalam xã hu labaih 50 sang bhap bini eng drei halan hatian ngak harak likau tabiak truh kan kathaot. Piah salih jalan sahneng, jalan ngak, karja palei hu jhul khang bruk pathau khan, jak ba mikva ba ilamu kỹ thuật tame pala drak, raong glang. Tapa nan, hatai sahneng di rahra dak harei dak hu glaong tagok, oh daok hatai sahneng pagam pambak tame bruk daong, kham merat daong gauk cakrok patagok kinh tế sang. Bruk yaok pluh sang eng drei halan hatian ngak harak likau tabiak truh kathaot jeng ngak brei salih bharau khang bruk patrun kathaot khang kajap dalam huyện bhum kan kandah ini./.

Lang sap: Mousa Phương – 06/04